Read Alladian KEBANG RUUTUM KÍDÍ 16 Bible Online

KEBANG RUUTUM KÍDÍ 16 - Alladian bible

KEBANG RUUTUM KÍDÍ 16

¹Longe konem Samson bí Gajalo tokla notii mimeko kaato. Bí notii delo yumeko ibbosupe emla gíto.

²Samsonke píínamem Gaja lokke ami kídíe tatla, bulu ekumdem gargo bomla, “Nyampoke doonyi sangarlo bím mokalape,” embosula yoh ruubung dem doolung yabgo delo totíbomto.

³Idola Samson bí yoh raajang petom delo duuríto. Bí gerepla gílangkula doolung yabgo delokke eyab emlang gaangem delokke íkkar kídíem itaksula, takamem puulangala, bí dekedem gordunglo joobom langkula, Hibronem kaapangko díítum teyonglo joolíkto.

⁴Longe ayoko irodem Sorek Yiibelo duuna Delilah emnam mime kolo Samson bí aapí-aange olíkkai.

⁵Deme kaala, Philistain kídíke ruutum kídíde mime delo aala poto, “Samsonme yééla, bím iyan sulayimadupe, bím ikum dope, bíkke siddípe ralnam leríng legang sim nome popang bidope no ségulok ilenkíto. No depe ilayémílo, mipil-miyong ngolu nome baldín nokdi éjar kolang língko asak biyé.”

⁶Depeila Delilah bí Samsonme ííto, “Nokke siddípe ralnam kanam leríngem pobika delokke kape kísa imílo nome yééla umlayén?”

⁷Samson poyansuto, “Ngome ere momanam iyyi aan kíníd kolok yéémílo, delo ngo moomem ami kísape ila ralnam kaimayé.”

⁸Delo Philistain ruutum kídíde ereng mangadana iyyi aan kíníd ko bomala mimedem bito. Delok mimede Samsonme yééto.

⁹Depe yéérodem pírtek konlo rusisula duuna ami kídíe tatdope érla bí Samsonme poto, “Samson Philistain kídíe nom aabomdung.” Idola emelo ennoem gutungnam kísa, bí iyyi aan kíníd dem menang asak kínyinto. Depeila bíkke ralnam leríngem kénla mato.

¹⁰Delo Delilah bí Samsonme poto, “No ngom agom mela bopolpe imoto. No arope ngom pobika, kape kísa ami akone nome yéélayén?”

¹¹Bí poyansuto, “Edílokom ina kímanam sotkya anílok amikone ngome edílo yééyédí, delo ngo moomem ami kísape ila ralnam kaimayé.”

¹²Delo Delilah bí sotkya anílok laala, Samsonme yééto. Depe yéérodem pírtek konlo rusisula duuna ami kídíe tatdope érla bí Samsonme poto, “Samson, Philistain kídíe nome aabomdung.” Dem tatla bí, sotkya kídídem enno kísa kínyinto.

¹³Samsonme Delilah bí luto, “Supak loope no ngome yatla bopolpe imotung. No arorupe pobika, kape kísa ami akone nome yéélayéné?” Bí poyansuto, “No ngokke dumíd sok akék kínídko ege sumnam kísape sumdum supala deme sépnanalok edíípe séplíkla iyémílo, ngo delo moomem ami kísape ila ralnam kaimayé.”

¹⁴Delilah bí Samsonme iyubpala, bíkke dumíd delok akék kíníd ko ilenla, deme ege sumnana delok sumla, dekedeme lekoda edíírupe sépnana lok séplík pala érla manto, “Samson, Philistain kídíe nom aabomdung.” Idola bí darngo sulang kula, sumnam delok bík dumíd kídíem pulen langkula, sépnam kídí demte eludope itoku.

¹⁵Depe irodem Delilah bí Samsonme luto, “Nokke aapí-aangem ngome bisumape, kapeda no ngome míídung emkan? No lengum kokai ngome bopolpe imo kabong. Supakte nokke ralnam leríngem ngome pobimang ada.”

¹⁶Sikepe ebín-esonpe lodí mipíke mantíbomla, Samson bí tatyémlok sina kísa igekai.

¹⁷Dekepe tatyém kotírlok méélamyalum deme aroem pobito, “Ngok dumíd sim edílokom ngíkímang. Ngome odo longe delokke ila Najiritpe Shédí kíng tolíkla ngo onamko. Iname, edílo ngok dumíd sim ngíyédí, delo ngo moomem ami kísa ngokkíng ralnam kaimayé.”

¹⁸Edílo Delilah bí, aro agomem pokansukai emla kénkadí, delo bí Philistain ruutum kídíem, “Supak bí ngome aro agomem pokan suto. Iname lekoda aalat subilangkuka,” emla gogtoku. Depeila bulu abalem boma langkula aalatsutoku.

¹⁹Samsonme bík kerang delo iyubrodeme, bí amiko tomala bík dumíd akék kíníd dem ngíbínto. Depe irodem Samsonke ralnam de nyokla bím ikup ilatla mimede ibomdola,

²⁰érla manto, “Samson, Philistain kídíe nome aabomdung.” Bí darngo sulangkula mííto, “Ngo lembít kísa ipak supala asarpe magooyé.” Idola RUUTUM bí, bím mepakto emla bí kénsumato.

²¹Delo Philistain kídíde bím umla, bík amigem ilenla, Gajalo enbotoku. Delo bíme patek aralo, pitol ikolilok yééla donam kétpom kolo kétmoto.

²²Idola ngíkut rodemte bík dumpo delo dumíde saarepkaku.

²³Philistain lokke ruutum kídíe dumsula buluke uyu Dagon kíng ipak botteko idola, ashéng-angam imanko ibosudope píídum suyinto. Bulu píídumsula lubosuto, “Ngoluke miru Samsonme ngoluke alag aralo ngoluke uyue bito.”

²⁴Edílo ami kídíe Samsonme kaatodí, buluke uyu Dagonme yidla emto, “Ngoluke uyue ngoluke miruem, ngoluke alag aralo bilíktung. Bí ngoluke asi-amongem atírumape imola, ngoluke deddína amiem mokato.”

²⁵Buluke yagorupe erdukdo delo, “Samsonme bomala ngolume ashéng motoi,” emla érla manto. Depeila Samsonme patek ekum delok laalenla bí buluke iman kangkepe ito. Edílo bulu bíme gaang kídí pénsamlo dagamotodí,

²⁶delo bím alaglok gagla gíbona koodem, “Ngo tapdasula dakdope ekum sim gena aane gaangem ngo ukpaadope gíboi,” emla poto.

²⁷Ekum delo mime-milope amie bíísét alooto. Philistain kídíke roja pilngo takame delo kato. Delokke míílong teyong delo mime-milope éjar angum amie Samsonme ngilkala lupu-luléla, kaala duuto.

²⁸Delo Samson RUUTUM me kumsuto, “E RUUTUM Shédí, ngome míípa sulangka. E Shédía, lekoda ngome ralnamem ruubilangka. Ngokke nyokkana amig annyi legape, kídnam atellok, Philistain kídí teyolo, ngome edoem ramo langkuka.”

²⁹Delo Samson bí ekum delokke aane gaang annyi delo pííla, delo raada delo dagala, alag kone akonlo, delokke alag kone akonlo ugda sudola

³⁰manto, “Philistain kídílo ngomkom simin gemolangka,” emla aane gaang annyidem bí agíke ralnam takamem melíkla nííto. Depe nííyé deme ekumde bénla oletla delo duuna ami takam emlang ruutum kídí tabungem ojémla okakayinto. Dekepe, Samsonke turdungem edítko amiem pettuadí, dem pemílo pakyape, bíkke sidoku delo amiem mokatoku.

³¹Bíkke bíro kídíe lang abuke erang takame bík simangem laape tokto. Bíkke simangem, bulu bomlangkula Jerah kelang Esthaol raadalo, bíkke abu Manoahke agolo bím yutoku. Bí Israelem dítak íying annyiko yéboto.