Read Alladian KEBANG RUUTUM KÍDÍ 17 Bible Online

KEBANG RUUTUM KÍDÍ 17 - Alladian bible

KEBANG RUUTUM KÍDÍ 17

¹Adi among Ephraimlo Mikah emnam amiko duuto.

²Longe konem bí agíke anedem poto, “Nokke baldín nogdi éjar kolang língko nyokgape doppyona delo béélíknamem ngo tatto. Kaatola, abal kídíe sina. Ngomoko laasinade.” Dem tatla anede, “RUUTUM bí nok teyolo utepooroem ruudaklangka,” emla poto.

³Edílo bí anedem abal kídíem bilat sutokudí, delo anede poto, “Ngok oo teyolo ngok béénamde aamadope, dem abal kídídem ngo RUUTUM kíng tolíkdung. Delok esing mimangko inala deme baldín nogdi delok yollíkla inadope nome nogdi kídísim bilat yéku.

⁴Depe emrodem bí nogdi abal kídí deme ane delo bitoku. Anede nogdi abal língko annyiko laalenla arem-yogmo pína kolo bila, deme pínade esing lok mimangko gatpala, nogdi kídí deme yollíkla mimang kope idope píto. Deme Mikahke ekumlo meto.

⁵Mikah emnam ami si agíke ateksu kumpomko kasuto. Bí mimanglok píla, Ephod omla, agíke oo konem miripe imoto.

⁶Delo longe kídí delo Israello roja kamato. Depe ila mipil miyongpe, agíke mííbang-kaabang supe yéyinsuto.

⁷Dekepe yédo delo Judah among lokke Bethlehem doolunglo Lebi ami yaamé koo ko duuto.

⁸Bí agí doolung deme megeyéla angu konlo duupe-dakpeko mata gooto. Bíkke dekepe magoodungem, adi among Ephraimlo duuna Mikah ke ekumlo bí aato.

⁹“No ingko lokke?” emla Mikah bím íngkíto. Delo bí, “Ngo Judah among lokke Bethlehem doolung lokke Lebi amiko delokke duupe koko ngo matadung,” emla poyansuto.

¹⁰Delo Mikah bím poto, “Ngokke miri pelang poyilnape ila no ngokkíng duumín getola. Nom ngo donam-tíínam, ege galug emlang dítaklo baldín nogdi balying kope biyé.”

¹¹Dem tatla, bíkkíng duumín gedope Lebi amide elíkto. De yaamé koode bíkke oo akon kísa ikai.

¹²Yaamé koo Lebi ami dem Mikah bí, miripe imola bí, Mikah ke ekum delo dungkai,

¹³Depe irongem dem Mikah bí, “Lebi amiko ngokke miripe irodem RUUTUM ngok teyolo aiyé emla ngo kénkai,” emla posuto.