Read Alladian KEBANG RUUTUM KÍDÍ 18 Bible Online

KEBANG RUUTUM KÍDÍ 18 - Alladian bible

KEBANG RUUTUM KÍDÍ 18

¹Delo longe kídí delo Israel kídíe roja kabosumato, delokke delo longe kídí delo Dan opíne buluke yépe-dakpeko asi-amongem matagoola yéto. Kapeila Israel opín kídí aralo buluke bomyar supenam asi-amongem paamape ipoto.

²Dan ami kídarde, buluke opín aralok miram pilngoko ullenla, “Nolu asi-among sime kanggotoka,” emla Jorah delokke Eshtaol lok lulíkla melíkto. Ami kídarde adi among Ephraimlo aala, Mikahke ekumlo pííngala yohdem mibope doopatto.

³Buluke Mikahke ekum anínlo píngaduem yaamé koo Lebi delokke adud em tatkénla, bíkkíng gíala bím, “No so kape idun? Nom so séko aabotun?” emla agom íngkíto.

⁴Delo bí bulume, “Mikah bí ngom tomla, ngo bíkke miripe ibidung,” emla popala bík teyolo Mikahke inam legí-sigangem pokan bito.

⁵Delo bulu bíme, “Ngoluke entíng-gíting si aiyédí emla RUUTUM me íngkíto,” emla poto.

⁶Delo Lebide bulume, “Aapíe eetetla en-gong kalangka, kapeila noluke gígong bomsunam sim RUUTUM bí elík dung,” emla pobito.

⁷Depe embosurongem, ami pilngode delok gílen langkula, Laishlo pííto. Delo bulu delokke ami kídíem Sidon ami kísape eetet-monet ruupe duudupe kaato. Bulu ami miyinglo lumín-momín sumape eetet ruupe buluke paape dopenamem paasu-dosula yédo. Bulu Sidon ami kídílok, mootengoope duudo. Sok teyolo bulu mibo-miying ami kídí loteng agér-anam atí kabosumado.

⁸Buluke Jorah lolang Eshtaollo píídokuem, buluke opín erangde, “Kape kísa nolu kaapaton?” emla bulum íríktoku.

⁹Bulu poyansuto, “Kaju, ngolu mimakpe Laishem aabomlaju, aapíe mííne-mííngomape, asi among esim enbomla laalaju.

¹⁰Edílo nolu elo pííyédí, elokke ami kídíe míngummape eetetpe yédupe nolu kaayé. Esi gaina, mooya-pesana amongko. Esi pííram-simo atí kamangkoko, esime Shédíbí nolume ruubitung.”

¹¹Depe irodem Dan opínlok, midum língko akké amiko mimak lemoem gela Jorah delokke Eshtaol lok enlento.

¹²Buluke bedang lo endungem, Judah among lokke Kiriath Jearimlo notko ito. Depeila Kiriath Jearimke anggodan moolop dem Mahane-dan[6] emla silo peteng emdung.

¹³Delokke bulu adi among Ephraimlo gíla Mikahke ekumlo pííto.

¹⁴Kerape Laish amonglo rokang goonade buluke bíro kídíem, “Ekum kídí arang sokke akonlo baldín lok píket líknam mimang ko kadung. Delok teyolo teng tuplíknam abíd mimange kadung. Delokke mimang ayoko lang Ephod ege kote kadung. Sikesim nolu kéndudí? Ngolu kape imílo aiyén?” emla popato.

¹⁵Dem tatla bulu Mikahke ekum arang delo gíala, yaamé koo Lebi duuna dem ashéng lupuem poaato.

¹⁶Depe idoem mimak lemo gela, midum língko akké Dan amide eyablo dagyato.

¹⁷Amongem rokang goona midum pilngode aralo aala baldín pílíknam mimang demlang abíd mimangem delokke Ephod dem laato. Depe laadoem miri delang, mimak leemo gena abíd ami kídíde eyab delo dagyato.

¹⁸Edílo ami kídarde Mikahke ekumlo aala kumbomnam ato-siro kídídem laadungem miride bulum, “Nolu ingkueke idun?” emla íítodín,

¹⁹delo bulu, “Asoope atí agom manmape, ngolukíng enmín gela ngolum poyilnape lang ngoluke miripe ilangka. No erang atelke miripe idumem pemílo Israel tabungke miripe ilíímanía?” emla bím poyansuto.

²⁰Dem tatla miride ashéla kumbomnam ato-siro kídídem bomla bulukíng enmín geto.

²¹Bulu gílat sulangkula, buluke ome-oo kídíem, taro kídí emlang ekuserang kídíem buluke keralo megedola bulu enlentoku.

²²Bulu Mikahke ekumlok gílen langkula mootenggamko gídoem, Mikah bí, kumrí donggongem tomdumsula Dan ami kídardem píímín geto.

²³Buluke érmín gela lumín gekolok, Dan kídíde dakkutsudo langkula, “Ingko koda ikan? Kape mirolpe imín gedun?” emla Mikahme ííto.

²⁴Bí poyansuto, “‘Ingko koda?’ emla kape nolu íílatkan? Nolu ngokke pínam uyu emlang ngokke miriem kape bomkakun?”

²⁵Dan ami kídíde poyansuto, “No ngolum agom pomín sumapeka. Depe imílo, ngoluke sokke marpona ayokone aklíla nok edung-erang kídíem paka-níkkala ipe ipelo.”

²⁶Mikah bí bulum mimak imín sulamayé emla kaasula buluk agomem asoope tatla enlatsutoku. Delokke Dan kídíde buluke entíngpe enyarto.

²⁷Dekepe bulu, Mikahke pínam atoem bomlangala sidum-dengepe duusuna Laish ami kídí teyolo mimak iyala, paka-níkkala, doolung dem eme ríto.

²⁸Laish ami kídíde séko kíngkom ajung kabo sumangko teyong loteng buluke doolungde Sidon lok mooteng along toname séko kíteng igul paamape bulu ikai. De doolung de Beth Rehob ke yiibelo katuai. Dan ami kídarde doolung dem isi-imolangkula delo duungato.

²⁹Buluke buku, Danke amín lok doolung dem Laish emnamem megeyéla Dan emla míntoku. Dan bí Jakob ke oo koníai.

³⁰Delo Dan ami kídíde uyu mimang dem kumsudope ilíkto. Delo Gershom ke oo, delokke Mosike oten Jonathan lang bík oo kídíde delokke miripe ito. Bulu miri agér dem, ami kídí tabungem abílpe umla bomdoku deloope ilíkto.

³¹Shiloh doolunglo Shédíke Tombue duudo deloope, bulu Mikahke pínam mimangem bomtíto.