Read Alladian KEBANG RUUTUM KÍDÍ 19 Bible Online

KEBANG RUUTUM KÍDÍ 19 - Alladian bible

KEBANG RUUTUM KÍDÍ 19

¹Israel kídíke roja kamadí longe delo, mootenglo duuna adi among Ephraimlo Lebi ami duunakone, Judah lokke Bethlehem doolung lok éémépe mimeko laato.

²Idola mime koode bím akla, bím mepak geyéla agíke abu ekum dungko Bethlehemlo enlat sulangkula poolo appiko duusutoku.

³Depe duurongkudem amide bím duubokupe emla tomkupe mííto. Bí béérang kolang gado annyiko enboto. Mimede bím, abu ekumlo aaboto. Edílo abude bím kaatodí, delo bím ai-kamporupe iríkto.

⁴Ato abude bím duupodope pokum kolok, bí longe angum kokai, dola-tííla duuto.

⁵Longe appinana delo, rokompe bí erangdem, gerep bola enkupe lemoto. Dem ato abude kaala, “Nonyi kenomadope ato-siroko dogeyéla entokupíam,” emla potumkolok,

⁶amide dola-tííla ipotoku. Dekepe idoem ato abude, “Silokom duupong tokuka,” emla roguto.

⁷Idola dem tatla yimape edílo bí enkupe gerep tokudí, deloteng ato abude lutum dadala, bí yoh akondem doopong bitoku.

⁸Longe pilngo nana delokke roh demte gerepla enkupe idodem ato abude, “Sirodan anyongko dopong-tíípong geyéla, sudan entokuka,” emla mankukolok bí duupong bilangkula, bínyi dobi-tííbila duubitoku.

⁹Dekepe irodem edílo ami delang bík ééméde delokke béérangde enkupe emla itodí, ato abude, “Kaatola supak adenge ilenkai. Kamoe iyadakbong, iname siyoh doopong tokuka. Eríp-erappe duupopala nyampo roem enbosutokuka,” emla potoku.

¹⁰Idola amide yoh akonko duula yimala, Jebuspe (Emnamde Jirusalem) bíkke éémé demlang leemo líknam gado annyidem béérang delo lekope gíbo langkula entoku.

¹¹Longe pange kaimape adenge irodem, edílo bulu Jebus doolung anínlo píítodí, delo béérangde bík atodem, “Kaju, Jebus kídíke doolung so yoh sim doopong laju,” emla poto.

¹²Delo bík atode, “Ma, Israel ami kamangko mibo-miying doolunglo doomangkom, ngolu Gibeahlo gílape.”

¹³Depe empala bí potemtoku, “Kaju, ilayémílo ngolu Gibeah mamílo Ramahlo pííla doolape.”

¹⁴Depe embosula bulu entíto. Benjamin lokke Gibeah doolung anínlo pííduem doonyie uangkai.

¹⁵Delo bulu yohdem doopope emla aato. Aala bulu doolung delokke gídang delo duungato, idola sékoteng bulum mibope kaarík aala ina kamato.

¹⁶Yume adeng delo arík-anam itínglok píngkuna, adi among Ephraim lokke Gibeahlo duuna mijingkone aatoku. (Doolung delokke abíd ami kídarde Benjamin opínlok ito.)

¹⁷Mijing de doolung arangke gídanglo duuna ami kídíem kaala íngkíto, “Nolu ingkolok píína miboekeda delokke ingkoloda gíyéne?”

¹⁸Lebi amide poyansuto, “Judah lokke Bethlehem doolunglok ngolu píídung. Ngolu mooteng telo duuna adi among Ephraimlo duuna miboe. Ngo Bethlehem belo yépala RUUTUM ke ekumlo endakku. Idola ngome sékote mibope kaaríksuna kamang.

¹⁹Gado sokke legape ngolu ammung neyange kasudung. Ngok éémé legapelang ngokke delokke ngok béérang sokke legape dope-tíípe namemte bomsudung.”

²⁰Dem tatla mijingde, “Ngokke ekumlo nolum torík sudung. Noluke míínam kídíeme ngo kaabiyé. Idola so doolung gídang so siyoh duumapeka,” emla

²¹bulume agí ekumlo gíbo langkula, bíkke gado kídíem donam bila ito. Bulu ale-alagem írbín mobínsula irodem dola-tííla duuto.

²²Buluke dekepe ashéng-angam ibosudungem doolung delokke bíírík hamgo mana amieke ekumdem gargoobomla, eyabem pigala ekum ruutum mijing dem, “Nokkíng ami aanadem luyuso melento. Ngolu bíkkíng deemang-amo ibosuyé,” emla poto.

²³Ekum ruutum mijingde lenla bulume, “Ngok angong kídía, dekena atímana agér kídíem imangkom. Si ami kídísi ngokke miboe. Iname mibo teyonglo dekena lorímana agérem imapeka.

²⁴Sina ngokke mimumpe ina ome lang bíkke éémé mime. Bínyim ngo noluke keralo laalen biyé. Bínyike teyonglo noluke mííbape ika langka. Idola so ami sodan dekena belumnam agérem imapeka,” emla poto.

²⁵Idola ami kídíde bík agomem tatmato. Depeila Lebi amide bíkke éémé dem luyulo laalenbito. Bulu yoh ruubung dem, mime teyong delo ipusilééla, deemang amo ila roh deme melíktoku.

²⁶Doonyi arsang delo, mimede, bíkke milo dungko ekum delo aalangkula, eyab lamgé delo doonyi saadu deloope ketla dootíto.

²⁷Roh dem Lebi amide edílo gerepla bíkke bedang entíngpe enkupe emla gílen langkula eyabem siyyatodí, delo bík éémé dem, bík alag annyie eyab danpe ila, eyab luyu delo ketdope kaato.

²⁸“Kaju gereptola. Enlangkupe,” emla bí utto. Idola mimede atí poyan sumato. Depeila mime amíl dem bí gado konlo joolíkla ekumpe entoku.

²⁹Edílo bí ekumlo píítokudí, bí yoksik kolok bík mime simang amíldem tarong tarope tekmíkla, tarong íying kolang annyi kope ipala, Israel opín íying kolang annyilo tarong asak orgong líkto.

³⁰Dekedem kaana kídíde mipil miyongpe, “Ijipt among lok Israel kídíe lenrongkuem delokke ila, ngolu sikena irisinyona agérem kénkí petemang kangkí petemang delokke ikí petemang. Sim ngolu míngkí-kangkí bosupe aido,” emla poyin bosuto.