Read Alladian KEBANG RUUTUM KÍDÍ 2 Bible Online

KEBANG RUUTUM KÍDÍ 2 - Alladian bible

KEBANG RUUTUM KÍDÍ 2

¹RUUTUM ke kotokide Gilgal lokke Bokimlo gíla Israel kídíem poto, “Noluke buku kídílo ngokke bisuyé emla togesunam asi-among so, ngo nolum Ijiptlok laalenla saabotungku. Ngo, ‘Ngokke nolukíng daapong ibosunamem edílote ngo benmayé delokke,

²nolu edílote among sokke ami kídílo daapong ibosumapeka delok ayanpe, buluke runggu kídíem benpaklangka,’ emla poto. Idola nolu ngok agomem tatbimang. Nolu kape dekepe ikan?

³Depeila ngo nolum podung. Noluke keraloge ngo bulum mon-gé bimayé. Noluke ayir-agolo tang kísa bulu iyé, buluke uyu kídíe nolum etku-edape batbomyéku.”

⁴Sim agom kídísim edílo RUUTUM ke kotokide potodí delo Israel takamde yagorupe kapto.

⁵Depeila dem moolop dem bulu Bokim (Kapko-ríngkoe) emla mínlíkla RUUTUM kelo ipagem ilíkto.

⁶Joshuake Israel kídíem gímorongkuem, bulu agí-agíke moole yétasulo enyintoku.

⁷Joshuake yédo longe delo ami kídíe RUUTUM me agér ibito. Joshuake sirong emte, Israel kídí teyolo RUUTUM ke irisinyo inamem kaana kídí delokke Joshuake kékonlo turtíl mínna miro kídíke yédutete deloteng Israel ami kídíe deenampe yéto.

⁸Nunke oo Joshua bí dítak língko kolang íyingko turpala sikai.

⁹Gaash dííte línggíngdan lokke adi among Ephraimlo duuna, Timnath Heres emnam Joshuake agí yétasupe paasunam doolung delo bím yuto.

¹⁰Miku siirum kídíke siyin rodeme mibuk siirumde RUUTUM me kangkénkuna kamape delokke Israel legape bíkke agér ibinam emte míípasuna kaimato.

¹¹Israel kídíde uyuem kumsula delokke agér ibila RUUTUM ke kangkolo atímape yéto.

¹²Ijipt amonglok laalenkuna RUUTUM buluke buku kídíke Shédíme mepaksuto. Bulum dunggo bomna ami kídíke uyu kídíem kumsu goola igoto. Depeila buluke ségu kídíde RUUTUM me marmoto.

¹³Kapeila bulu RUUTUM me mepak geyéla Baal uyu melang Ashtaroth uyu mimedem agér ibila ikai.

¹⁴Israel teyolo RUUTUM bí aklíla, bí bulume línggoona maglíng kídíke alag aralo ruulígla, bulume dunggo bomna miru kídílo kolígla, de ami kídarde bulume itung-iréla, bulu ami kídíem atí iyan sulamape ito.

¹⁵RUUTUM bí agíke pésunampe, edí-edílodí Israel kídíe mimak imínsupe gílentone delo RUUTUM ke alage buluke mirupe ila, bulum mirue ikumla bulu ankang aloosuto.

¹⁶Dekepe iyém RUUTUM bí kebang ruutum kídíem ullenla línggona miru kídí alaglok mopítdungai.

¹⁷Idolateng kebang ruutum kídíke agom kídí emteng bulu tatbimape uyu kídíem kumsula dekena uyu kídílo notiipe ibosuto. RUUTUM ke lulígem kape kísa buluke buku kídíe tattuadí, dekepe imape bulu tatmape yépatsutoku.

¹⁸RUUTUM bí, kebang ruutum kídílo yémín gela kebang ruutum kídíke turdu tetedem bulume miru kídíke alaglok mopítto. Kapeila bulume tujét-saayétla yébona miru kídíke aralo bulu adír along gela ankí-kítíto. Depeila buluke teyolo RUUTUM bí ayasutoku.

¹⁹Idola edílo de kebang ruutum kídíde sitokudí, buluke sirongkuem ami kídíde pakyape uyuem kumsula, agér ibila, buluke atímana miké aapí-aangem mepaksumape buluke abu kídíem pemílo atíyamape yétoku.

²⁰Depeila RUUTUM bí Israel teyolo yagorupe marlíla poto, “Si ami kídísi ngok agom-aangem tatmape, buluke buku kídílo ngokke daapong ibosunam ayon kídíem igemape inam legape,

²¹Joshuake sidolo íngkona mibo-miying amiemdí monpak matone, dekedem ngo monbín biyimayé.

²²Israel kídísi buluke buku kídíke yékorpe yéyékudí, yékumayédí dem kaangímape, sim mibo-miying ami kídar sim, Israel teyolo darkaanana atope ngo imoyé.”

²³Depe emla dem ami kídídem RUUTUM bí turmoto. Bulume menape monbínmape delokke Joshuake alaglo ruulígmape ila yémoto.