Read Alladian KEBANG RUUTUM KÍDÍ 20 Bible Online

KEBANG RUUTUM KÍDÍ 20 - Alladian bible

KEBANG RUUTUM KÍDÍ 20

¹Depe irongem Dan lokke ila Beersheba loope delokke Gileadlok ila edítko Israel ami kadudí, bulu takam amíl atel kope Mijpahlo RUUTUM ke keralo gídumsuto.

²Israelke opín-buang tabungke ruutum kídíe so gídum so pííyinto. Sikepe Shédíke ami dumsudo delo midum 400,000 ko alelok gídola mimak ina sipayinge kato.

³Mijpahlo Israel kídíke gídumem Benjamin ami kídíe tatto. Israel kídíde, “Kape kísa sikepe atírumana agérem iton? Ngolum popalangka,” emla ííto.

⁴Mime mokanam delokke milode pokanto, “Ngo lang ngok méngde Benjamin among lokke Gibeah doolunglo yohdem doopodope emla gíto.

⁵Ngoluke dongko ekumdem Gibeah lokke ami kídíe yohdem aabomla gargoola língang bomto. Bulu ngom mokape ituai, idola delok ayanpe ngok mimedem ipusilééla sidope ito.

⁶Ngo mime delokke simangem tarongpe tekmíkla Israelke opín íying kolang annyilo orto.

⁷Nolu takam Israel amie, sim legang sim kape imílo aiyén?”

⁸Delo dumsuna tabungde lekope embosuto, “Sékokom agí agíke ekumlo enkumayé.

⁹Ngolu sipe ibosupe aido, ngoluke aralo lotoripe gingkíbosula, amiem ullenla Gibeah esim mimakpe iabompe aido.

¹⁰Israel opín takamlo midum língko aralok midum íying kope saplenla bulu maglíngke donam-tíínamem kaabidope delokke abíde gídope ipe aido. Israel aralo edíloteng ikímanam agérem igang legape Gibeahlo aabomla bulume ingéng kupe aido.”

¹¹Dekepe Israel tabungke amie doolung atelem edo rakupe ami atel kísape leko bosuto.

¹²Bulu Benjaminke opín-buang tabunglo ami megoolíkla, sipe pogomoto, “Sikena belumrunam agérem kape nolu ikan?

¹³Israel aralok sikena atímangeme ikutdope, Gibeahke deemana ami kídardem nolu ngolukíng bomalangka.” Idola Israel kídíke agom dem Benjamin kídíe atí tatbimato.

¹⁴Delok ayanpe buluk doolung miyonglok Gibeahlo bulum mimak imínsupe emla píídum suyinto.

¹⁵Benjamin kídíde buluke doolung takamlok midum 26,000 amiko gíníng yoksa bomnem uldumsuto.

¹⁶Gibeah doolung agísu delokke aipakpe ullennam amie midum 700 ko kato. Bulu lakké lok agér ina amieke delokke bulu dumíd míyyong atelemte abakmape elíng iyyilok apjina amiekíai.

¹⁷Israel kídíde aipakpe mimak ijiina amiem midum 400,000 amiko dumsumoto.

¹⁸Israel kídíde Bethello gíla Shédíme íngkíto, “Benjaminem mimak imín supe ngoluke aralok íngko opíne gíge yalumyén?” Delo RUUTUM bí, “Judah opíne,” emla pobito.

¹⁹Delo rohkon delo Israel kídíde gíla, Gibeah doolung anín delo notko ito.

²⁰Bulu Benjamin maglíngdem mimakpe aabomla, maglíng kídíde Gibeah doolungem gekasula dagato.

²¹Delo Benjamin lokke maglíngde lenla mimak ila longe gíyin mangadape Israel maglíngem midum 22,000 ko mokato.

²²Idola kerang longe delokke kísa Israel kídíde aapíe erbo sulangkula kerangke dakkolo dagatoku.

²³Israel kídíde RUUTUM ke keralo kapla-rííla yume loope RUUTUM kíng agom íítala bulu, “Ngoluke bíro Benjamin kídíke mirolpe mimak ikupía?” emla ííto. RUUTUM bí, “Aiyé, gílangka,” emla pobito.

²⁴Delo longe annyinape Benjaminem mimak ipe Israel kídíe aabomto.

²⁵So longe soteng Benjamin kídíde Gibeahlok lenbomla Israel maglíngem midum 18,000 ko mokato.

²⁶Depe ikunam legape Israel tabungde Bethello gílangkula RUUTUM ke keralo kapla-rííla, doma-tíímape longe ruubungem nyobomsula ito. Bulu romnam amanem ila eetet kumona amanem RUUTUM kelo bila ito.

²⁷Bulu RUUTUM me íngkíto, (Delo longe delo Shédíke Daapong Sonduge delo duutuai delokke,

²⁸Aaronke oo Eleajar delokke bíkke oo Phinehas bí delo longe kídí delo miripe ibomto.) “Ngoluke bíro Benjaminme mimak ipe ngolu gímílua gímamílua.” Delo RUUTUM bí “Aiyé, nyampo nolu gílangka, noluke alag aralo bulume ruulíkyé,” emla pobito.

²⁹Depe irodem Israel kídí ayokone, Gibeah em togobomla duubomto.

³⁰Abíd maglíngde lembíd ikampe longe angumnana delo Gibeahme mimakpe aabomtoku.

³¹Benjamin kídíde mimakpe lenbomla doolung delok moodogampe bulu imoto. Kerangke kísape bulu Gibeah bene-bepong delo lang Bethel bedang delo Israel kídíem midum íying angumkope moka lendola, “Kerangke kísape ngolu bulum ikumdung,” emla pobosuto.

³²Buluke dekepe mimak idula pobosuduem Israel kídíe, “Kaju ngolu ngétkut sulangkula bulume doolung lok mooteng modola bedang arang kídí so aamolape,” embosula,

³³maglíng arorude ngétkutsuyin gedokula Baal Tamar emko delo ngétdum sutoku. Depe idokuem Gibeah doolungem togobomna maglíngde buluke ruukolok lenbomto.

³⁴Israel arang lokke miramyalum midum 10,000 ko Gibeah doolungem dugabomto. Mimakde yagorupe imínsula Benjamin kídíde agíke nyokpenamemte kénsumato.

³⁵Benjaminke maglíng teyonglo Israele ikumdope RUUTUM bí ruubito. Delo longe delo Israele Benjaminem midum 25,100 ko mokato.

³⁶Depe irodem bulum ikum kai emla Benjamine kaasuto. Gibeah doolungem rula togobomna miram kídí delo Israelke maglíng arode mííte sulíkla bulu mimak idola ngétkut sutoku.

³⁷Tona ami kídíde menape doolung dem dugabomla, doolung delo duuna ami kídíem mipil miyongpe moka kayinto.

³⁸Israelke maglíng arod delang tona kídarde iyodko ibosuto. Edílo maglíng arode, doolung delok doomug alem kísape míkkíem saadope kaatodí,

³⁹bulu dakrík sudolangkula momínsutoku. Dekepe idoku delo Benjamin kídíe Israelem midum íying angumko mokala, “Kerangke ikampe ngolu bulum ikumdungku,” emla embosuto.

⁴⁰Dekepe bulu embo sudungem doolung delok doomug agen kísape míkkíe saadope, iyodde ilenbikai. Benjamin kídíde kangkut sulang kula buluke doolungem míkkí agenpe saadupe kaasuto.

⁴¹Delo Israel kídíe bulum aabomtoku delokke Benjamin kídíe lomgosuto, kapeila bulu kelo adíre píídak emla bulu kénsuto.

⁴²Bulu mimak delok dugge langkula yépol mooruk amongpe duggeto. Idola mimak delok dukpísulang gemato. Bulu Israel lokke maglíng aro kelang doolung delok lenkuna kídíke pénsam delo ipét sulíkto.

⁴³Israel kídíde Benjamin kídídem monsép subomdola, Gibeah ke sanggodan loope pamín geto.

⁴⁴Delo longe delo midum 18,000 ko Benjamin lokke mirame sikai.

⁴⁵Ayokone Rimmon lííreng díítumlo duggeto, idola bedalo 5000 amiko bulum Israele mokato. Israel kídíde mondan tete mínla Gidom loope 2000 amiko pakamínto.

⁴⁶Delo longe delo Benjamin miram kídíem 25,000 ko pakato.

⁴⁷Idola buluke 600 amiko Rimmon lííreng delo dukpí sugela poolo appiko duunyok geto.

⁴⁸Israel maglíngde gílat sulangkula abíd Benjamin kídíke mime-milo dak ome-oo dak moka kayin gooto delokke Benjamin doolung takamem bulu emepe ríyin gooto.