Read Alladian KEBANG RUUTUM KÍDÍ 21 Bible Online

KEBANG RUUTUM KÍDÍ 21 - Alladian bible

KEBANG RUUTUM KÍDÍ 21

¹Edílo Israel kídíe Mijpahlo dumsutokudí, delo RUUTUM ke keralo bulu pésuto, “Ngoluke aralok ome atel kokom bulukíng omum-nyameng ibosumomayé.”

²Depe irongem Israel kídíde Bethello gíla, Shédíke keralo yagorupe kapla-rííla adeng loope itíla,

³“E RUUTUM, kape ngoluke pénsamlok Benjamin opínde nyokpe emla ikan?” emla kumtíto.

⁴Longe kondelo rokompe ami kídíde deena rungguko píla aapí eetet legape ashéng aman delokke romnam amanem ila,

⁵buluke aralo, “Israel ngoluke opín takam aralok, Mijpahlo RUUTUM ke keralo dumsuduem sékoi aamatone?” emla ííbosuto. (Mijpahlo séko bulu aamayéne dem mokayé emla bulu pébosutuai.)

⁶Israel ami kídarde buluke bíro Benjamin opín legape aang ola, “Silo Israel ngolu, opín konem nyokmodak.

⁷Turkína Benjamin legape kape kísa mime mabimíloi? Kapeila RUUTUM ke keralo; ngoluke ome kídíem buluke mimepe sékokom bimayé emla pébosuto.” emla manbosuto.

⁸Mijpahlo dumsuduem ingkona erang kídíedí gímatone emla buluke mata bomsuduem Gilead lokke Jabesh ami kídíe aamato emla bulu gaglento.

⁹Depeila maglíng kídíem amín gogyinduem Jabeshlok sékote elíkna kamato.

¹⁰Depeila kebangde miram amiem midum 12,000 kope ullenla, “Nolu gíla Jabesh lokke mime delokke koo-kíang emte itaksula mipil miyongpe mokalangka.

¹¹Idola milo kénkímana mimum kooem megeyéla abíd milokong delokke mimeme mokalangka,” emla lulígto.

¹²Bulu Jabeshlo gíla milo kénkímana mimum kooem midum 400 ko umlangala Kanaan amongke Shiloh doolung delo aabotoku.

¹³Rimmon lííreng díítumlo duunyok gena Benjamin ami kídíem kebangde daapong ibosutoku.

¹⁴Depeila Benjamin kídíde aabito. Israel kídíde bulume Jabeshlok umnam mime koo kídídem buluke méngpe bito, idola bulu takamke legape de pííramto.

¹⁵Benjamin kídí legape Israel tabungde ankíbito, kapeila RUUTUM bí buluke aralo pénsam kadope ruupan subito.

¹⁶Depeila kebang ruutum kídíde, “Benjamin kídí legape mime pííramkai. Pííramnam buluke legape kape imílodí aiyén?

¹⁷Israelke opín íying kolang annyide apíípe duudope, Benjamin kídí legape, ngolu mime mabila bulum attíng-ayyin kaimadope imope aimang.

¹⁸Idola ngoluke ome kídíem bulukíng sékodí omum-nyameng imoyéne, imona teyong delo bééname aadope emla ngolu péyin bosutung,” emla pobosuto.

¹⁹Dekepe embosugeyéla bulu, “Shilohlo RUUTUM ke dítak adeng-apee píídak,” (Shilohde Bethel lokke línggíngdanlo delokke Lebanonke sokkolo delokke Bethel lola Sekhem bedang lokke sanggodanlo katuai.)

²⁰depe embo sulangkula Benjamin kídíem, “Adeng-ape moodí delo baarietor kídílo nolu ruusi sulangka delokke airupe kaabomlangka.

²¹Edílo Shiloh lokke mimum kídíe miri mope lenyédí, delo ruusi supom delok lenla nolu mipile agí míínampe mimumem sola delokke Benjamin amongpe gíbo langkuka.

²²Edílo buluke abu-bíroe aala luayédí delo ngolu, ‘Mimak ila noluke omem mimepe lamang, iname ngolum kaasula bulum bommotoka. Kapeila mimak idoem bulume mime mabi lamato delokke nolute agí míínampe noluk omem bisumang. Dekepe imamílo nolu imemyé,’ ” emla poyilto.

²³Benjamin kídíde deme igeto. Adeng-ape delo Shiloh doolung delo mimum koo kídíe miri modungem Benjamin kídíde agí agí mííbape mimumem méngpe umla enbotoku. Dekepe bulu agíke among yétasulo gísu langkula, buluke doolungem isaa sulangkula duuyin sutoku.

²⁴Depe irongem Israel kídíeteng delok gílangkula, agí agíke yétasulo, edung erangsulo delokke opín-buanglo enyin sutoku.

²⁵Delo longe kídí delo Israello roja kamato. Mipil-miyonge agí agíke mííbang-kaabang supe yéyin bosuto.