Read Alladian KEBANG RUUTUM KÍDÍ 3 Bible Online

KEBANG RUUTUM KÍDÍ 3 - Alladian bible

KEBANG RUUTUM KÍDÍ 3

¹Depeila Kanaan amonglo midu-mimak kénkímana Israel kídíem ikang-darkang nanape mibo-miying opínem ayoko RUUTUM bí turmoto.

²Midu-mimagem kénkí hényimana Israel kídíem siirum-siirumlo mimak legí-sigangem luyil-poyilnape RUUTUM bí ito.

³Among delo turmonam kídíde: Philistain roja pilngode, takam Kanaan ami kídíde, Sidonlok ami kídíde delokke Baal Hermon dííte lok ila Hamath gééjongke Lebanon amonglo duuna Hibit ami kídíde.

⁴Mosi kelok bilíkla buluke buku kídarem binam RUUTUM ke lulíg kídíem igedodí igemadodí emla kangkínape sim ami kídar sim turmoto.

⁵Dekepe ila, Israel kídíde, Kanaan, Hittit, Amorit, Perijjit, Hibit delokke Jebus ami kídíke pénsam raadanglo duubosukai.

⁶Bulu miying kídíke ome kídílo omum-nyameng ibosula delokke buluke ome kídíemte buluke oo kídílo omum-nyameng ibosula buluke uyu kídíem Israel kídíe kumla yéto.

⁷Israel kídíe RUUTUMke kangkolo deemana agérem ito. RUUTUM buluke Shédíme bulu mitpansula Baal uyu melang Asherah uyu mime deme kumsuto.

⁸Depeila Israel teyolo RUUTUM bí marla Mesopotamia lok roja Kushan Rishathaim ke alaglo RUUTUM bí Israelem kolígto. Depeila Israel kídíde roja delokke rumkílo dítak píínyiko agér ibito.

⁹Edílo bulu ankasula RUUTUM kíng kapgu sutokudí, delo RUUTUM bí Kalebke aní Kenajke oo Othnielme mopítkuna amikonpe ruulenla, bí Israelem mopíttoku.

¹⁰Bík teyolo RUUTUM ke Aide aala bí Israelke miram amikonpe ila mimaklo gíto. Mesopotamia lokke roja Kushan Rishathaim me RUUTUM bí Othnielke alag aralo ruulíkla Othniel bím ikumto.

¹¹Depe irongem Kenajke oo Othniel ke sido loope takying appiko Israel amongde eetetpe yétoku.

¹²Lekoda Israel kídare RUUTUM ke kangkolo deemape yétoku. Dekepe yégangku legape RUUTUM bí bulume Moab ke roja Eglonke rumkílo yédope ruulíkto.

¹³Roja Eglon bí, Ammon kídí emlang Amalek kídíem makpépe aabola Israelem mimak iyala Kejur doolung emlate mínnam Jeriko doolung dem laato.

¹⁴Israel kídíe Moab ke roja Eglon ke rumkílo dítak íying kolang píínyiko agér ibito.

¹⁵Depe irodem Israel kídare ankí-kenola RUUTUM ke keralo kapgu-rogutoku. Delo RUUTUM bí, Benjamin erang lokke Gera ke oo Ehud me mopítna amipe ullento. Ehud bí agér anamem lakképe idungai. Israel kídíde Moab ke roja Eglon kíng aman bilíkla bíme melíkto.

¹⁶Dekepe gído delo Ehud bí, yogí-yogarpe aar kana lakdu kísape bodonge ina yoksako mola geto. Deme bí lebík arkéng delo éélík sula egelok polumsula geto.

¹⁷Aman dem bí, Moab ke roja Eglon me bomala bito. Eglon bí ngelna amikuai.

¹⁸Aman deme birongem, deme bombina kídíem agí-agí ekumpe enmotoku.

¹⁹Idola Gilgal anínke mimang tuplíknam elíng kako deloge bí agí sude gílat sulangkula roja deme posito, “E roja, nome ngo posi-poro bosupenam agomko kadung.” Delo rojade, “Nolu gígéépoto,” emla agér ibina kídídem pola, bulu gígébito.

²⁰Depe emrodem edílo rojade ekum deme teyongke rengamko pírtek delo agí atele duusutodí, delo Ehud bí roja delo aanínla poto, “Nok legape Shédí kelok agom pobipenam ko kadung.” Dem tatla dungko delok rojade darepduem,

²¹Ehudbí, lebík delo genam yoksadem lakké delok laalensula roja delokke akii delo níklíkto.

²²Yoksa delokke yokle deteng aataksula yoksake attínge lamku danlo paddokupe níklíkto. Yoksadem Ehud bí hatkumato. Níklum rodem una adíne ilumbomtoku.

²³Depe ipala Ehud bí, luyupe lendo langkula eyabem sittum líkla sabi etkablíkto.

²⁴Ehudke gírong kudem agér ibina kídíde saala teyongke roja dungko lok eyabem etkabtupe kaato. Depe kaala bulu, “Bík ekum sokke arang pírtek delo bí apééla duudupe,” emla pobosuto.

²⁵Buluke aapí-aange apéé bomsudílope bulu toyato. Idola edílo pírtek arangke eyab kídíem siyya yimape itítodí, delo bulu sabi matala eyabdem eyyato. Depe eyyaro delo buluke ruutum dem oletla sidope bulu kaasuto.

²⁶Idola buluke toyadung delo Ehud bí ennyok gedíkue kato. Bí mimang tuplíknam elíng delo píílang kula Seirahpe dukpí sugeto.

²⁷Bíkke delo píírong kudem bí, adi among Ephraimlo bikul mutgoto. Delo Israel maglínge bíkkíng adi among delok oi mínto.

²⁸Bí Israel maglíng dem gíbodola emto, “Ngokkíng gímín gelangka. Noluke miru, Moab amiem RUUTUM bí noluke alag gooralo rulígtung.” Depeila bulu Ehud kíng gímín gela Moab ke Jordan korongem koopeko alopdem aajétbomto. Bulu séko meteng koongge kumomato.

²⁹Delo longe delo bulu gairuna Moab sipayingem éjar íying kope petto. Buluke, midum atelkokom turna kamato.

³⁰Delo longe delo Moab kídíem ikumto. Depeila Israel amongde takying píínyi kope eetetpe yétoku.

³¹Ehudke méélamlo Anath ke oo Shamgar bí mirampe yéboto. Bí ruboem iyilnana asék kolok Philistain kídarem midum língko akké amiko petla Israelem mopítto.