Read Alladian KEBANG RUUTUM KÍDÍ 4 Bible Online

KEBANG RUUTUM KÍDÍ 4 - Alladian bible

KEBANG RUUTUM KÍDÍ 4

¹Ehudke sirongem, lekoda Israel kídíe RUUTUM ke kaangkolo deemang amo agérem itoku.

²Depeila Hajorlo rojape duuna Kanaan ami Jabinke alag aralo Israel kídíem RUUTUM bí kolígto. Jabinke maglíng ruutumpe Sisera bí ito. Bí Haroseth haggoyim emnam doolunglo duunakuai.

³Bíkkíng língko konang kokai aremlok pínam guré gaarie kato. Bí Israel amiem takying annyikope itung-iréla yéto. Dekepe igape Israel kídíe iguldope RUUTUM kíng kapgu-rogu suto.

⁴Delo longe kídí delo Lappidoth ke kaalu-kangorna miripe ina mime Deborah bí Israelem kebang ruutumpe yéboto.

⁵Adi among Ephraim lokke Bethel kelang Ramahke pénsamlo Kejur esing kolo bí notko ila, Israel kídí aralokke kelíng-kebang agérem lubituai.

⁶Longe konem, Naphtali lokke Kedesh doolunglo duuna Abinoam ke oo, Barakme bí tompala poto, “RUUTUM, Israelke Shédíbí sim lulígdung, ‘Jebulun loklang Naphtali amilok midum éjar íying ko laala Tabor díítumpe gílangka.

⁷Ngo Jabin rojake maglíng ruutumpe ina Sisera melang bíkke maglíng emlang guré gaari kídarem yatla Kishon korongpe aabomla nokke alag aralo ilíkyé.’ ”

⁸Barak bí poyansuto, “No ngokkíng gímín gemílo ngo gíyé, idola no gímín gemayémílo, ngo gímayé.”

⁹Deborah poyansuto, “Aiyé, ngo nokkíng lekope enmín geyé. Idola ikum amínem no togemayé, kapeila RUUTUM bí Sisera me mime alag aralo rulígbiyé.” Depe emla Kedeshlo Deborah bí Barak kíng enmín geto.

¹⁰Delo Barak bí Jebulun loklang Naphtali lok midum éjar íyingko maglíngpe tomlenla gíboto. Delo lekope Deborahteng gímín geto.

¹¹Dekepe ido longe kídí delo Mosike yigo Hobabke oten ome-oo kídí aralok Heber emnam Kenit amiko gíngusulenla Kedesh anín lokke Jaanannim emko delo duuna ok sine leríng delo bíkke tombuem sola duuto.

¹²Abinoamke oo Barak bí Taborke díítumpe maglíngem gíbola aadung emnamem Siserame edílo popatodí,

¹³delo Sisera bí bíkke maglíng emlang aremlok inam guré gaari língko konangdem laadum sugeyéla Haroseth haggoyim lok gílenla Kishon korongpe ento.

¹⁴Delo Barakme Deborah bí lulígto, “Nokke kerang kerape RUUTUM bí gígemanía? Gílangka, siloke longe so moko RUUTUM bí nok alag aradelo Sisera me ruulígtone.” Delo midum éjar íying dem gíbola Barakbí Tabor díítum lok oito.

¹⁵Edílo Barak bí mimakpe iyabomtodí, delo Sisera melang bíkke maglíng dem delokke guré gaari kídí dem akén-ayén yimadope RUUTUM bí imoto. Sisera bí guré gaari delok oila dugnyokgeto.

¹⁶Idola Barak bí, guré gaari kídí emlang maglíng dem Haroseth haggoyimpe monmín geto. Siserake maglíng dem ami atel koteng turmomape yoksa lok pakayinto.

¹⁷Sisera dan agísue alelok dugnyok gela Kenit ami Heber ke mime Jaelke tombu delo dugang geto. Legangde Hajorke roja Jabin lang Kenit erang lokke Heber opínde ajung bosuto.

¹⁸Jael bí Sisera me gíríkdola emto, “Ngokke tombu araso aatola. Kaju atí pesomape aatola.” Depe emkolok bí arang delo aato. Delo bíme ege kolok donkapto.

¹⁹Bí mime dem, “Ngo asi tíílíng aloodung. Ngome asiko bí,” emla roguto. Mimede ayo gadumko taala, delo gakír duunem bím tíímo pala lekoda bíme rumtoku.

²⁰Sisera lulígdola poto. “No tombu elokke eyab elo daklangka. ‘Amiko araso duudun?’ emla íngkínako kayémílo, ‘Ma’ embilangka.”

²¹Depe empala Sisera bí apéé kootír lok kedala ipto. Delo Jael bí, martul kolang tombu ege rínnana kililok laala Sisera ke anín delo beiyope maangala bíkke tukkudem patla among loope uket líkdope kili dem demlíkla Siserame petto.

²²Edílo Siserame matala Barak aatodí, delo mimede gírík dola emto, “Nokke mata bomnam amiem ngo lengkanyé. No araso aatola.” Edílo Barak bí tombu aradelo aatodí, delo Sisera me, bíkke dumpong raadanglok kilie upattokla among loope uketla sidope kaato.

²³Delo longe delo Kanaanke roja Jabinke teyonglo Israelem ikumdope Shédí bí ruuto.

²⁴Israel kídíde mimagem igit yayangai iyabomla Jabinme nyokmoto.