Read Alladian KEBANG RUUTUM KÍDÍ 5 Bible Online

KEBANG RUUTUM KÍDÍ 5 - Alladian bible

KEBANG RUUTUM KÍDÍ 5

¹Delo longe delo Abinoam ke oo, Barak lang Deborah bínyi sim ashéng miri sim luto:

²RUUTUM me yidgedung, Israelke ruutum kídare mimak iperung emla mínggapkai. Ami kídí tabunge ashépe togesuyinto.

³Roja kídí nolu tatgaplangka, ngo Israelke Shédíme, RUUTUM bíme tapung mutbila miri lubiyé.

⁴E RUUTUM, edílo no Seir díítelok lenbomtodí, edílo no Edom amonglok gílentodí, amonge ton-gela talenge pedong oto, arope doomuglok pedonge olento.

⁵Sinai dííte lokke RUUTUM keralo, RUUTUM Israelke Shédíke keralo dííte kídíete engen geto.

⁶Anathke oo Shamgarke longelo, Jaelke longelo gípeko bedang aroemte mepakto. Enna kídíe bekén-berénlok ento.

⁷Israelke doolung kídíe rongngam geto. Deborah ngokke, Israel anepe ila aama tetengem rongngampe igeto.

⁸Edílo ami kídíe uyu kumsuyékudí, delo amonglo midu-mimak kato. Israelke jarying appi maglíng aralo, tamte atel koteng demangkom gíníng atel koteng kaapamato.

⁹Ngok aapíe Israelke maglíng ruutum kídílo, delokke togesulenna kídílo kamín gekai. RUUTUM me yidgedung.

¹⁰E yalunna gadolo duuna no, ege-yamboem tamla duuna no, elo-belo gígopena no míngíng kílangka.

¹¹Tattola asi-sirunglo yéna milung kídíke adudem; ena bulu RUUTUM ke ikumem yidgedak, Israel kídíke ikumem rínggedak. Depeila RUUTUMke ami kídare, buluke doolung yabgolok gílendak.

¹²E Deborah, gereptol, gereptol. Gerepla miripe lulento; E Barak gerepla, nok umnamem; E Abinoam ke oo no umabomtoku.

¹³Delo edíírupe míngkesuna kídíe buluke ruutum kídílo aayinto. RUUTUM ke ami kídíe mimak makdope bíkkíng aato.

¹⁴Bulu Ephraim lok aala yiibe delo aato, nom gímín gena ami kídílo Benjamin bí kato. Makhir lok maglíng ruutum kídíe píngato. Jebulun lok migom kídíe pííngato.

¹⁵Issakharke ruutum kídíe Deborah kíng yémín geto, aroe Issakhar bulu Barak kíng yémínto. Bíkkíng bulu yiibe loope oimínto. Idola Reuben bulu aapí pííram bosuto.

¹⁶Reuben nolu kape mér yépomlo yétíton? Kape mér kaabomna kídíke adud-ayudem tattíton? Aroe Reuben nolu, míngkén-míngo bosumato.

¹⁷Jordanke sanggolo, Gad opínde asoope yéto. Asi jajilo Gad opínde duutíto. Asher opínde siyéng robelo eetet-monetpe yétíto.

¹⁸Idola Jebulunla Naphtali bulu, mimak kerangem dagge bito.

¹⁹Roja kídíe aala bulu mimak ito, Megiddoke asi robeng Taanaklo, Kanaanke roja kídíe mimak ito, idola bulu líínam ekurang, delokke baldín atí bomkumato.

²⁰Siserake mirupe taleng telokke takar kídíe agí dakkollo dakdola, mimak imínsuto.

²¹E ngokke aid, no miga-mirampe gíbom langka, konnying-mennying kake biitína, Kishon koronge bulum biipak bomkai.

²²Delo guré kídíke dukbomla, buluke ale tudude yagokai,

²³RUUTUM ke kotokie emto, “Meroj melang bíkke ami kídí teyolo atímang bééname píílangka. Kapeila miru kídíem imín sukolo bulu RUUTUM me igulpe aamato.”

²⁴Kenit opínke Heberke mime Jael bí mime kídí aralok gaiyalumne. Bí tombulo dungkína mime pénsam lokke gairune.

²⁵Siserake asi koduem bí gakírem bomabito; kamporupe monam kaglaklo bí tekyakna gakírem bomabito.

²⁶Bík alag konlo tombu lokke kiliem laala, delokke alag konlo martulem laala, bí Sisera kíng demlíkla Siserake tukkueme bardope demkélíkla, among loope kilidem upatlíkdope demlíkto.

²⁷Sisera bíkke ale kerang delo oletla asoope ketkai. Bíkke ale kerang delo Sisera bí oletgela, oletla otínglo sikai.

²⁸Siserake anede kirkilok kaabong dola, delokke kirkilok gasor aradan delok érla lulento: “Kape bíkke guré gaaride adol alongkan? Kape bíkke gaari adude menape píngkuman?”

²⁹Delo bík kaabomna mime kídí lokke kénya yalumne, bím poyansuto. Bí agísuete agíem posutíto.

³⁰“Bulu líínam ekuranglo matala moomang alooduupe, sipaying miyonge agíke supe mimum lok, ako annyi matasudupe, Siserake legape gairuna ege-galugem, kampo-kampope pooré appun ilíknam egem rani amíllo gedope, línggoodupe.”

³¹E RUUTUM, nokke miru kídíe nyokyin daklangka, idola nome ayanade angunpe saana doonyi kísa ikalangka. Depe irodem asi amongde dítak íying appi kope eetetpe yétoku.