Read Alladian KEBANG RUUTUM KÍDÍ 6 Bible Online

KEBANG RUUTUM KÍDÍ 6 - Alladian bible

KEBANG RUUTUM KÍDÍ 6

¹Lekoda Israel kídíde RUUTUM ke kaangkolo atímana agérem itoku. Depeila bulume Midian ami kídíke alag aralo dítak kínídko RUUTUM bí yémoto.

²Midian ami kídíde, Israel ami kídíem yagorupe irééla, bulu dííte ponyuk kídílo, líípík kídílo delokke abíd-abídlo runyok geyinto.

³Israel kídíke ali-ayé ilíkyémte, Midian kídíe lang Amalek kídíe delokke sanggodanke abíd mibo-miying opín kídíe mimakpe aatíbomto.

⁴Bulu among delo aabomla, notko idola, ali-ayém ongkut bila, delokke gooru, mér delokke gado kídíem atel koteng turmomape nyokyin motíto.

⁵Bulu, agíke simon sili kídí emlang tombu kídíem hogo bomla pemír mírbam kísape aatíbomla asi among deme líítí bito.

⁶Midian kídíke adír binamem sulang geyimala Israel kídíde RUUTUM kíng igul matala kabbomto.

⁷Midian kídí legape Israel kídíke RUUTUM kíng rogula kapnamem tatla,

⁸RUUTUM bí kaaluna miriko lulígla bí sikepe popato, “RUUTUM Israelke Shédíbí sipe podung, ‘Noluke abílpe yéko Ijipt among lok ngo nolum laalentoku.

⁹Ijipt lokke migang gangko aralok lang nolum irééna kídílok ngo holentoku. Ngo noluke mibo-miying kídíem noluk keralok monpakla nolum buluke asi-amongem bito.

¹⁰Ngo nolum poto, “Ngomin RUUTUM noluke Shédíbí, noluke supakke dungko Amorit kídíke uyuem kummapeka.” Idola nolu ngok agomem tatbimato.’ ”

¹¹Delo RUUTUM ke kotokiko Ophrah emnam doolung delo aala, Abiejer opín lokke Joash emnam amike ok esing rumkíng kolo dungato. Delo Midian kídíem kangko sumape, runyok gedola apong kiipar kolo géhueke atangpe Joashke oo Gideon bí kétdo.

¹²Delo RUUTUMke kotokide bím lengkansula lupoto, “Midu-miram runa, nokke teyolo RUUTUM bí yémín gedung.”

¹³Gideon bí poyansuto, “RUUTUM bí ngolukíng yémín gedumílo, kape sikena duk-adíre ngolukíng kakan? RUUTUM bí ngolum Ijipt amonglok laalen kumanía? emla ngoluke buku-neku kídíe popanam RUUTUM ke irisinyo kídarde íngkoloda? Supak RUUTUM bí ngolum mepakla Midian kídíke alag rumkílo duumotung.”

¹⁴RUUTUM bí bíme kaasudola lulíkto, “Nokke ralnam takam dem gelangala gílangka, delokke Midian kídílok Israelem mopít langka. Ngo agísue nome melíkdung.”

¹⁵Gideon poyansuto, “Idola RUUTUM, kape kísa ngo Israelem mopítyén? Manasseh opín arang lokke ngok pínmík si ralma yalumne delokke teyolo, erang kídí arang lok ngo amín kamana améyalumne.”

¹⁶RUUTUM bí poyansuto, “Ngo nokkíng yémín geyé. Midum atelem petnam kísa Midian kídíem no petyinyé.”

¹⁷Gideon poyansuto, “Ngo nokke kaangkolo kaabangnampe supak idumílo, no agísue ngome luposudung emla iyodko lengkan langka.

¹⁸Ngo gílangkula ngokke amanem laalangkula nok keralo boma langkula ikuma tetelope no gíkumape toyalangka.” RUUTUM bí poyansuto, “Nok angkuma tetelope ngo duuyayé.”

¹⁹Gideon bí ekumlo gílangkula bénbo bopangko keelangkula, atanglok kilogram íying kope laala, delok siiyé ilíkmanam ettípe ila adín demla ettídem aapékolo ilíkla, alangdem peking kolo ilíkla, dekedem ok esing rumkínglo duuna RUUTUM ke kotoki keradelo bomala leebito.

²⁰Teyong kotokide bíme, “So líídung teyong so adín demlang ettíng dem megeyéla alang deme deke delokke teyolo purlíkto,” emla lulíkto. Gideon bí depe ibito.

²¹Delo RUUTUMke kotokide, bíkke alag delo asék bomnam attíng delok, adín kídí demlang ettíng kídí dem itetto. Depe iro delo, líídung delok eme lenla adín kídí demlang ettíng kídídem gubomkai. Delo RUUTUM ke kotokide nyokkaku.

²²Edílo Gideon bí, de RUUTUMke kotokiko emla kénkadí, delo bí peso-ríandola, “E RUUTUM Shédí, ngo RUUTUM ke kotokiem migmoe geríksula kaaríksuto,” emla manto.

²³Idola RUUTUM bí bíme poto, “Pesomapeka, aapíe eetet langka. No simayé.”

²⁴Delo Gideon bí RUUTUM kíng deena rungguko pílíkla, RUUTUM bí eetetmone emla amín mínlíkto. Silo peteng de deena runggude Abiejer opín lokke Ophrah doolunglo duudung.

²⁵Delo yoh delo Gideonme RUUTUM bí poto “No nokke abulok ruboko, delokrongem dítak kínídna rubo konko laala, nok abuke Baal uyu kíng píbinam uyu runggudem bénbila delokke abelo díínam uyu mime Asherahke gaangdem papak langka.

²⁶Depe irongem, so pongonko so, aipakpe pínam deena rungguem RUUTUM nok Shédíkepe pílík langka. Depe ipala rubo annyi nanadem laala, papak tonam Asherahke gaangdem esingpe ila, rubo dem apíípe, romnam amanpe romlangka.”

²⁷Delo Gideon bí, agíke aralo yébonam midum íyingko gíbola RUUTUMke políknampe ito. Gideon bí agíke edung erang emlang doolung repe-sinyingem pesola bí longem imape yoem ito.

²⁸Rodem edílo doolung ami kídíe gereptodí, delo bulu Baal uyuke rungguem dírpakdope delokke Asherah uyu mimeke gaangem pamík tupe delok teyolo aní runggu teyolo rubo annyi nanadem romtupe kaato.

²⁹Depe kaala buluke aralo, “Séko sikepe itune?” emla pobo lubosuto. Bulu agom-aangem jikkí-rokpakpe ííbosula, Joash ke oo Gideon min sikepe itun emla kénlento.

³⁰Delo bulu Joash kíng gíla, “Ngoluke Baalke rungguem dírpakla, ampenglo dakna Asherah ke gaangem pamíkbina, nokke oo sim ngolu mokadope luyuso solento,” emla luto.

³¹Idola Joash bí bím gargo bomna aklína milung dem poyansuto, “Nolu Baalke legapía dagadun? Baal uyumía nolu mopítpe míídun? Sékodí Baal kepe doola mimak iyéne, bím roh angun kamang adapekai mokayé. Baal bí aro Shédí kuamílo bíkke rungguem akone lííbiduem bí iyasulatuai.”

³²Delokke ila Gideonke amínem Jerubbaal emlate mínkai, kapeila Joash bí, “Baal bí agísue iyangsupe aido, kapeila bíkke rungguemmin bénpak bitone,” emla poto.

³³Depe irodem takam Midian kídíe lang Amalek kídíe delokke sanggodan lokke mibo ami kídíe dumsula, Jordan korongem koola mimakpe magang bomla Jejreel Yiibelo notko ito.

³⁴Delo RUUTUM ke Aide Gideon kelo aato. Gideon bí Abiejer ami kídíem bikul tapung mutla bíkkíng gímín gedope tomgooto.

³⁵Delok teyolo bí ami melíkla, Manasseh takam lolang Asher, Jebulun delokke Naphtali opín-buang daadiem mimak leemo gela aadum suyindope gogdumsuto. Depe gogkolok bulu takam, bíkkíng píídum suyinto.

³⁶Gideon bí Shédíme poto, “No ngokke alaglok, Israelem mopítpe emla míídumílo kaalangka,

³⁷ngo gehuem yikkollo mér sobén amídem ayoko meyé. Nyampoke roem tangare, siipyak petom delo kala delok kékon amongde pítíl yémílo, nokke pokan sunampe, ngok alagsok no Israelem mopítyé emla ngo mííyé.”

³⁸Dekepakpe ikai. Rohdem rokompe Gideon bí gerepla mér sobén amíd kídíem laala ekung kolo bíídope tangar asiem mér sobén amíd kídí delok nyumlento.

³⁹Depe irodemte lekoda Gideon bí Shédíme pokaku, “No ngokke teyolo marmapeka, ngo nom lekoda rogudungku. Ngome mér sobén amíd kídísok lekoda ikang kímokui. So irum so, amíd kídí sim erengmola, among sim tangar kamolangka.”

⁴⁰Delo yoh delo Shédí bí dekepe ibito; amíd petomde pítílto delok kékonlo, among tabude tangare kayinto.