Read Alladian KEBANG RUUTUM KÍDÍ 7 Bible Online

KEBANG RUUTUM KÍDÍ 7 - Alladian bible

KEBANG RUUTUM KÍDÍ 7

¹Roh rokompe Jerubbaal (emnamde Gideon) lang bíkke ami kídíe Harod emnam rojik delo píídumsula notko ito. Midian kídíke maglíng notkode buluke línggíngdanlo kana, Moreh díítum anínke yiibe delo kato.

²RUUTUM bí Gideon me poto, “Nokke amilok ngo Midianem ikumdope, nokke ami kídar si bojé aloodung. Israel kídíe agí lakpong ralnamlok ipítsuto emla ngome atí-sirí kope mííyimape, yidsumadope ami kídíem sipe polangka,

³‘Séko bulu mimak momínem reyubrupe pesodudí, bulu gílat suladoku delokke Gilead díítum sok enladoku.’” Depe porodem midum éjar íying kolang éjar annyiko enlat sukaku. Delokke midum éjar íyingko notko delo duuto.

⁴RUUTUM bí Gideon me potoku, “Supakte amie bojé aloodung. No bulume koronglo tokbo langka, belo nok legape ngo amiem ipan subiyé. Si ami si nokkíng gímín geyé emla ngokke nom ponamde nokkíng gímín gepene. Idola séko memdí ngo si ami si nokkíng gímín gemayé emyédí, de amide gímín gepemane.”

⁵Depe emrodem Gideon bí ami kídídem asi korong delo tokboto. Delo RUUTUM bí bím poto, “Lebíng lok peldola asi tíína aralok séko buludí ekii kísa agí ayolok asiem yakyéne, dekena amiem no ipan sulangka.”

⁶Delo midum língko angumko agí lakpyolo asiem sukla tííto, abídde lebínge pelala asiem tííyinto.

⁷RUUTUM bí Gideon me poto, “Alaglok midum língko angum asi tíína delok ngo nome mopítla, nokke alag aralo Midian kídíem ruulíkyé. Abíd ami kídíem agí agí ekumlo enyin motokuka.”

⁸Depe lulíg kolok, midum língko angumke kékon ami tabudem agí agí ekumlo enmotoku. De língko angum amide bikul tapung kídí emla abíd donam-tíínamem kaabomto. Midian kídíke notkode buluke rumkíng danke yiibelo kato.

⁹Delo RUUTUM bí Gideonme lulígto, “Gerepla notko besime mimak iyabomlangka. Kapeila ngo notko besime nokke alag aralo ruulígto.

¹⁰No pesodumílo nokke béérang Purahme gíbola buluke lupo bosunamem tattokala.

¹¹Depe tatrongem no mimakpe iyang bompe míídukyé.” Depe lulík kolok Gideonla Purah bínyi notko luyu kerang delo tokto.

¹²Midian kídíe lang Amalek kídíe delokke sanggodan lokke opín-buang ami kídíde yiibe delo pemír mírbam kísape duubomto. Buluke uut simon kídíde sanam yimanam siyéng robeng lokke sulli kísape ito.

¹³Amikone bíkke angong konem immang manamem pobisudung pagem Gideon bí delo pííto. Bí podo, “Ngo immalo sipe maato. Ayag lok monam ettíng apí bottenakone ngoluke notkoso longala tombu konem tubla iyéname de tombude taalatla oyamkai.”

¹⁴Bíkke angongde dem tatla, “Si abídmang, Israel ami Joashke oo Gideonke yokse, Midian kídí emlang notko tabusim bíkke alag aralo Shédí bí ruulígtung,” emla poyansuto.

¹⁵Edílo Gideon bí immang demlang delokke gomroem tattodí, bí Shédíme kumsuto. Bí Israelke notko delo saalat sulangkula, “Gereplangka, noluke alag aralo Midian kídíem Shédí bí ruulígtung”, emla goggongtoku.

¹⁶Bí língko angum amidem opéé angumkope ipan sugeyéla mipilke alaglo bikul emlang aralo meru nyotla menam kédéng peking asak oryinto.

¹⁷Bí bulum poyilto, “Ngom kanggap langka delokke ngokke gíkolo gímín gelangka. Edílo ngo notko belokke luyu keranglo pííyédí, ngok ikam pakpe imín gelangka.

¹⁸Edílo ngo lang ngokke opééde ngoluke bikulem mutyédí, delo notko belokke kéényu-rego takamlok nolu bikulem mutla, ‘RUUTUM kepe lang Gideon kepe,’ emla togok langka.”

¹⁹Sontoripe dagnem ipéésurong pagem, yoh raajang kerang gampe Gideon lang bíkke midum língko opééde notko delokke luyu kerang delo píngato. Delo bulu bikulem mutla buluke alaglo bomnam kédéng peking kídíem gepénto.

²⁰Opéé angumde buluke alaglo bomnam kédéng peking kídíem gepén pén-yinto. Delo buluke lakké alaglo merudem bomonla, mutpenam bikul kídíem lakbík elenlo bomla, “RUUTUM kelang Gideonke yokse,” emla togogto.

²¹Mipile agíke dakkolo dagdungem, miru kídíde ulo gogla dugyin gekaku.

²²Edílo midum língko angum delokke bikulem muttodí, delo notko tabung delo miru kídídem buluke aralo pamín-níkmín sudope RUUTUM bí imoto. Miru sipaying kídíde Tabbath emnam anínlo duuna Abel Meholahke rísulo delokke Jererah danke Beth Shittah loope duknyok getoku.

²³Israel aralok Naphtali, Asher delokke Manasseh kídíem gogdum sula bulu Midian kídídem monbomto.

²⁴Gideon bí Ephraim adi among tabulo ami lulígla “Nolu menape ila Midian kídíem mimak ilangka. Jordan korongem bulume koomomadope Bethbara rojik beloope dakbomlangka,” emla pogo moto. Ephraim ami kídíde menape dumsula Bethbara rojik beloope ila Jordan korongem dakbomto.

²⁵Bulu Midian lokke ruutum bottena annyi: Oreb melang Jeeb me umto. Umla Orebme Orebke Lííreng emkolo petto delokke Jeeb me Jeeb ke Apong Kiipar emkolo mokato. Bulu Midian kídíem monbom teteto, delokke Oreb kelang Jeebke dumpongem bomla, Jordan korong sanggolo píína Gideonme bito.