Read Alladian KEBANG RUUTUM KÍDÍ 8 Bible Online

KEBANG RUUTUM KÍDÍ 8 - Alladian bible

KEBANG RUUTUM KÍDÍ 8

¹Delo Ephraim ami kídíde Gideonme luto, “Kape no ngolum sikepe ikan? Midian kídíem mimak imín sukolo kape no ngolumkom tomsuman?” Dekepe manla bulu bíme yagorupe lukaato.

²Idola bí bulum poyansuto, “Nolum ruupe suyéme, nolum pemílo ngo ingkoyangko ipekton? Ephraim noluke onggur arík pílruklok ayé pílta kunamde Abiejerke tongkum sunam onggur ayé kídíem pemílo gaiyamanía?

³Midian kídíke ruutumpe ina Oreb melang Jeebme noluke alaglo Shédíbí ruulígmanía? Depeila nolum ruupe suyém ngo íngkokoda ilaton?” Dem tatla buluke bík teyolo aklíde omapkaku.

⁴Deddípe apéélateng Gideon lang bíkke língko angum amide miruem monmín gela Jordan korongem kooto.

⁵Bí Sukkotke ami kídíem poto, “Ngo supakte Midianke roja Jebah melang Jalmunname monmín gedung. Ngokke maglíng kídíe apéé alongkai. Iname bulume donam-tíínamlok ibilangka.”

⁶Idola Sukkot lokke ruutum kídíde poyansuto, “Nolu Jebah melang Jalmunname ummangada, iname nokke maglíngdem kape kísa ngolu donam-tíínamem biríkyén?”

⁷Delo Gideon bí bulum poyansuto, “Aiyé, edílo RUUTUM bí Jebah melang Jalmunname ngokke alag araso ruulígyédí, delo nolume yépol mooruk lokke tanyum loklang tang kana aséklok itngééyéku.”

⁸Delokke Gideon bí Penuello gíla akampakpe roguto. Idola deloteng Sukkot ami kídíke kísape Penuelke ami kídí deteng agom-aangem poyansuto.

⁹Depe emkolok bí bulum luto, “Edílo ngo ai-kampope píílat suyékudí, delo noluke kedonna tawar [2] ekumem bénpak biyéku.”

¹⁰Karkor doolunglo maglíngem yébola Jebah lang Jalmunna bínyi yéto. Bínyike maglíng aralok midum 120,000 amiem mokato delokke midum 15,000 ami petomko turla yéto.

¹¹Gideon bulu Nobah kelang Jogbehake sanggodanke yépol mooruk abe delokke bedang lok gíla miru maglíngdem mamam sudope mimagem iyato.

¹²Midian roja Jebah lang Jalmunna bínyi duknyokgeto. Idola Gideon bí bínyim monbomla, umla, bínyike maglíng tabungdem ikumto.

¹³Edílo Joash ke oo Gideon bí mimak ipala Heres dííte delok entokudí, delo,

¹⁴Sukkot doolung lokke yaamé koo konem umla bím íngkíto. Delo koo de Sukkot doolung lokke miro togena midum íying kíníd kolang kíníd amiko amínem atbito.

¹⁵Depe irodem Gideon bí Sukkot doolung delo píngala ami kídídem poto, “Noluke ngome igullímape topaksunamem míípasutola. Jebah melang Jalmunname umma tetedem, nokke apééna maglíngem donam-tíínam iríkmayé emla nolu manto. Supak kaatola, sina bínyi.”

¹⁶Delo bí yépol mooruk delok tanyum tatké aségem laala Sukkot doolungke miro kídíem itngéétoku.

¹⁷Penuel lokke kedonna tawar ekum kídíemte bí bénpak bila, doolung delokke ami kídíem mokato.

¹⁸Dekepe irongem Jebah melang Jalmunna me Gideon íngkíto, “Taborlo noluke mokanam amide kape kísa neke?” Bínyi poyansuto, “Bulu nok kísa ila, buluke mipil miyongde roja lokke kísa ine kíai.”

¹⁹Gideon bínyim poto, “Bulu ngokke ane atellok obosunam bíro kídí ekíai. Ngo pésula mandung, nolu bulum turmotuamílo ngote nolum mokamayai.”

²⁰Delo bí bíkke oo obíng yalum Jetharme, “No darepla bínyim petto,” emla lulígto. Idola koode yoksaem hatsula pakamato. Bí koope ikolok aapíe mííne-míngola ito.

²¹Depe inamem kaala, Jebah lang Jalmunna Gideonme poto, “No agísue aala ngonyime pakatoka. Mine amide mine amike agérem ila sudung.” Depe emkolok Gideon bí bínyim mokala, bínyike uut simon alínglo paknam lunggu tadok kídíem laato.

²²Depe irodem Israel tabungde Gideonme roguto, “No ngolume, Midian kídíke alaglok mopítkunam legape nolang nokke oten siirek loope ngoluke ruutumpe yébolangka.”

²³Gideon bulum poyansuto, “Ngo noluke ruutumpe imayé delokke ngok oo kídíete imayé. RUUTUM petom noluke ruutumpe iyé.”

²⁴Depe empala bí bulum agomko potoku, “Nolum ngo roguko kadung, nolu mipil miyongpe, noluke ruupon tekbang lanam kídíem ngom bilangka.” (Yépol mooruklo duuna abíd opín-buang ami kísape Midian kídíete uunlok monam ruupon tekbang atíem geto).

²⁵Dem tatla bulu, “Dekedem ngolu ashépe nome bidung,” empala, bulu yamboko tamla, buluke lííla ruupon tekbang lanam tabungem melík biyinto.

²⁶Dekepe Gideonke uunlok monam ruupon tekbang paanamde kilogram íying annyikope ito. Idola so arang so abíd paanam lunggu, tadok delokke Midian roja kídíke genam yamukna gasor kídí emlang uut simon alínglo tulíknam lunggu tadokdem hantak sulíkmato.

²⁷Méélam dem Gideon bí uun kídí delok, Ephod mimang kope píla deme bíkke dungko doolung Ophrahlo meto. Israel daadi tabung amie Shédíme mepaksula Ephod mimang deme kumyinto. De atode Gideon melang bíkke edung erangem batjémkuna etku-edape ikaku.

²⁸Sikepe Israel kídíe Midian kídíem ikumla, bulu pesopenam amipe iyimato. Dekepe ila asi-amongde takying appikope, Gideon ke sidolope eetet-monetpe yétoku.

²⁹Joashke oo Gideonbí agí ekumlo enlat sulangkula duutoku.

³⁰Bí mimem bojéko bomla bík agí kelok midum íying kínídko uem olento.

³¹Shekemlo duuna bíkke éémé mimepe bomnam delok oo ko bí kato. Delokke amínem bí Abimelek emla mínto.

³²Joash ke oo Gideon bí mijing turtengem turpala sikai. Abiejer opín kídíke dungko Ophrah doolunglo, bíkke abuke agolo bíme yusutoku.

³³Gideon ke sironge oolko imang adape, Israel kídíe Baal uyu kíng kumsu-joosula ilentoku. Bulu Baalme bonying ila,

³⁴bulum dunggo bomna miru ami kídílok mopítna RUUTUM buluke Shédíme míngke suyimape yétoku.

³⁵Sok kékon loteng Israel legape aina agérem gérbina Gideonke edung-erangem aipe mííyimape, míípakla yétoku.