Read Alladian KEBANG RUUTUM KÍDÍ 9 Bible Online

KEBANG RUUTUM KÍDÍ 9 - Alladian bible

KEBANG RUUTUM KÍDÍ 9

¹Gideonke oo Abimelek bí, bíkke ane lokke ali-atod duupom doolunglo gíla bulume sikepe manto,

²“ ‘Jerubbaal ke oo íying kíníd takame ruutumpe yébonam emía nolu míídone, ma, atelko yébonam emía míídone?’ emla nolu Shekhem doolungke mipil miyongem ínggongtoka. Kapeila ngo noluke agíke adín iyyisue.”

³Depe polík kolok Abimelek ke ane lokke ali-atod kídíde Shekhem doolung lokke ami takamem íngkíto. Abimelek bí buluke erangpe itoname Shekhem lokke ami takamde Abimelek me buluke ruutumpe toríksuto.

⁴Bulu Baalme bonying moko ekum delok baldín abal eke íying kínídko laalenla bito. Delok abal delok bí, bíírík-hamgomana amiem laadumsula, bulu bíkke magpépe ibosukai.

⁵Bí agíke abu doolung Ophrahlo aala lííreng teyong atel kolo bíkke midum íying kíníd bírope ina Gideonke oo kídídem moka kayinto. Idola Gideonke oo aníyalum Jotham bí runyokgela bím mokamato.

⁶Depe irodem Shekhem lokke ami tabungela, Beth-Millo lokke dumsula Shekhem lokke kumpom ok sine delo gíla Abimelekme roja pe ullento.

⁷Edílo legí-sigangem Jotham bí tattodí, bí Gerijim díítum teyong delo resadola gogtongla ami kídíem poto, “Shédí bí noluke agom-aangem tatbidope nolu ngok agom sim tatbitola.

⁸Longeko, esing kídíe dumsudola buluke aralo rojako ulbosuto. Bulu olib esing dem poto, ‘No ngoluke rojape ilangka.’

⁹Olib esingde emto, ‘Nolume ngo yébodope ngokke arasok, lenna télem ngo nyokmope aiyé. Kapeila sok tél sok teyong ami kídí emlang taniem mínggenadung.’

¹⁰Delo esing kídíde tapang esing dem, ‘No dekemílo, ngoluke rojape itola,’ emla manto.

¹¹Idola tapang esingde, ‘Nolum yébodope ngokke dopona ayém éélen mokumape ipe aido,’ emla poyansuto.

¹²Delo esing kídíde onggur esing dem, ‘No aala ngoluke rojape ilangka,’ emla roguto.

¹³Idola onggur ane deteng bulume poyansuto, ‘Abíd shédí kídíemlang taniem erapmona apongem, nolum yébope imílo itumsupe aiyé.’

¹⁴Delo esing tabungde tanyum tatké esingdem, ‘No aala ngoluke rojape ilangka,’ emla roguto.

¹⁵Tanyum esingde bulum poto, ‘Nolu ngome arorupe rojape imope míídumílo, ngokke ugyum araso aayintola, nolu aala mayémílo, ngokke tang kídí sok eme lenla, Lebanonke Sidar esing kídí emteng gukape aido.’

¹⁶“Sok akampe, nolu Abimelekme rojape uldodem yidpenam aro aapí logía itone? Gideonke agér-aname aipe gérbitumílo, bíkke aina séguem míípasula mínggedumílo, bíkke edung erangem ai kampope mííbomdunía?

¹⁷Noluke legape, ngok abu lokke mimak imín sunamem míípa sutola. Midian kídí alaglok bí agí yénamem alaglo bomsula nolum mopítto.

¹⁸Idola silo, nolu ngokke abuke mirupe batlatdung. Nolu bíkke oo íying kínídem lííreng atel teyong kolo moka kayinto. Legade, bíkke béérang mimelok onam Abimelek bí noluke ali-atodpe itoname, nolu bím Shekhem lokke rojape imotung.

¹⁹Iname nolu yidpenam aro aapílok silo Gideon melang bíkke erangem itumílo, dekemílo nolu Abimelek kíng ashéng bosu langka delokke bíte nolukíng ashéng bosupe aido.

²⁰Idola depe imamílo Shekhem kelang Beth Milloke ami kídíem, Abimelek kelok eme dorlenla gukape aido demangke Shekhem kelang Beth Millo kídílok eme dorlenla Abimelek me gukape aido.”

²¹Depe emrongem, bíkke bíro Abimelekme peso kolok Jotham bí delokke duknyok gelangkula Bir doolulo dunggeto.

²²Abimelek Israelem toodí tagumko ruutumpe iboto.

²³Delo Shédíbí Abimelek melang Shekhemlok ami kídíem akmín sumola bulu bíkke mirupe irepto.

²⁴Bulu lang Abimelek bí, Gideonke oo íying kínídeme éésékré petnam dai ajéngem dorkunam legape sikepe imoto.

²⁵Shekhem lokke ami kídíde Abimelekme akla díítum teyonglo atímana amiem melígla bedanglo gína takameme líítí bito. Sikepe ebínpe inamem Abimelekme popato.

²⁶Dekepe ido delo Ebed ke oo Gaal bí, bíkke bíro kídíem aabola Shekhemlo byagato. Shekhem lokke ami kídíde bíkkíng míídíng sulíkto.

²⁷Buluke ríkséng kídílo bulu gíla, onggur ayém pílla, deke delok apong ila, buluke uyu kumpom delo adeng-apeko ito. Buluke dekepe tííla dola idungem, bulu Abimelekme lupu luléto.

²⁸Delo Ebed ke oo Gaal bí poto, “Abimelek bí séko? Shekhem ami kídí nolu íngkueda? Kape bíkke ale rumkílo ngolu yépene? Bí Jerubbaal ke oo arokua? Bíkke lulíg-luangem Jebul bí tatpenía? Nolu agíke buku Hamorme sékodí noluke opín-buang lokke lenkue, bíkkíng aipe gyaptola. Kape ngolu Abimelek me agér ibiyén?

²⁹Sim ami sim ngo yébosumílo, ngo Abimelek me ipakboyai. Ngo bím sipe emyai, ‘Abimelek no maglíngem tomdum sutola, mimak imín sulape.’”

³⁰Gaalke agom kídídem tatla, doolung delokke ruutumpe ibona Jebul bí markai.

³¹Bí adud-ayud kamape Abimelek kíng kotoki melíkla popato, “Ebed ke oo Gaal lang bíkke bíro kídíe Shekhemlo aala nokke mirupe rukuplíkdung.

³²Depe ila nolang nokke maglíngde kaamo-yoem aala aríklo runyokla tobom potoka.

³³Nyampo roem doonyi saayém doolung dem mamam sudope mimak iya bomtoka. Edílo Gaal lang bík ami kídíe gílen yédí delo nokke ibanampe itoka.”

³⁴Depeila Abimelekla bík maglíngde kaamo-yoem aala Shekhem doolung luyu delo opéé appikope tobomto.

³⁵Edílo Gaal bí, doolung yabgo delo lenla daktodí, bíme Abimelek lang bík maglíngde kaala, buluke tobomko delok lenbomto.

³⁶Gaal bí bulum kaala Jebulme manto, “Kaatola dííte elok bosi-borang amieke aadak.” Idola Jebul poyansuto, “Eke esi amimang dííte lokke ugyumemin.”

³⁷Gaal bí lekoda mantoku, “Kaatola ami maglíng eke raadangke díítum elok aadung, delokke opéékone líímé-tagil kaapom esing dungkodan elok aadak.”

³⁸Delo Jebul bím poto, “Nokke bottepe míísula, ‘Ngoluk béérangpe agér ibipena Abimelek bí séko?’ emla agom mannamde íngkoloda? E ami kídar esim no luyé-luléla imanía? No bulum gíríksula mimak momín sutola.”

³⁹Gaal bí Shekhem ami kídíem lenbola Abimelekme mimak magmín suto.

⁴⁰Mimak delo deddína amie tarí-tape geyinto delokke Abimelek bí bulum doolung yabgo deloope monlíktoku.

⁴¹Depe irodem Abimelek bí Arumahlo duuto, delokke Jebul bí Gaal melang bíkke bíro kídíem Shekhem doolunglo duuyimadope doolung delok monpakto.

⁴²Longe kondem Shekhem doolung lokke ami kídíe aríklo enyé emnamem Abimelek bí tatpaato.

⁴³Depeila bí, bíkke maglíng kídíem opéé angumkope ila arík kídí delo rula tobomto. Edílo bí ami kídídem doolung delok lendope kaatodí, delo bí bulum mokape aabomto.

⁴⁴Abimelekla bík opééde doolung yapgodem dagbomdope edílo dugabomtodí, delo bíkke maglíng opéé annyide ami lenna kídí dem aabomla moka kayinto.

⁴⁵Mimakde longe ruubungem ito. Doolung dem Abimelek bí umla ami kídídem moka kayinto, ekum kídíem bénpak bila among dem alope pitjéng jéyinto.

⁴⁶Legí-sigang kídíem edílo Shekhem lokke yabgolo duuna miro kídíe tattodí, delo bulu, mirue aalamadope yapgo mola iko, Baal uyume bonying ipom El-Berith ekum delo rugeto.

⁴⁷Buluke delo dumsu kunamdem Abimelek bí tatla,

⁴⁸Jalmon díítum delo bílang bík ami kídíde resala, egínglok esing aagko beela, gordulo deme joobom dola, dekepe idope maglíng demte lulígto.

⁴⁹Abimelekke pokampe ami tabungde esing aagem benggeyéla dekedem yabgo delo kumdasula kumto. Depe kumgeyéla, emepe rílíkla, aralo duuna ami tabungdem guka kayinto. Gukanam kídí de milo mimepe midum éjar amiko ito.

⁵⁰Depe irodem Abimelek bí Thebej doolung dem mimakpe aabomla gargoo bomla laato.

⁵¹Delo doolung delo kedonna tolna tawar ekumko kato. Delo doolung delokke mime milo pelang doolung miro kídíe dukyin anggela míílonglo rusisuyin gedola yapgoem aipakpe íkkarto.

⁵²Edílo Abimelek bí deme mimakpe aabomtodí, bí aabomla yapgo eyab dem eme rílíkpe emla aato.

⁵³Depe idoem mimekone elíng kiipar kolok bíkke dumpong teyong delo gelíkla bík tukkuem gekéto.

⁵⁴Depe irodem bíkke mimak ekurangem bomyabina yaamé koodem, “Ngome mime mokato emnam dem ngo tatsulímang. Iname no menape nok yoksa delok ngom mokatoi,” emla lulígla de yaaméde bím mokato.

⁵⁵Abimelek ke sinamem Israel kídíde kaasurodem, bulu agí-agí ekumpe enyin sutoku.

⁵⁶Sikepe, Abimelek agí bíro kídíem mokala, agí abu teyolo paab inam delokke aduem Shédíbí Abimelek ke teyolo edo ratoku.

⁵⁷Gideonke oo Jothamke béénam tuubupe, Shekhem ami kídíemkom buluke atímana paab agér legape Shédí bí itung-irétoku.