Read Alladian BEROK BINAM 10 Bible Online

BEROK BINAM 10 - Alladian bible

BEROK BINAM 10

¹Delokrongem ngo angukon teyong kotoki ralnako teyong telok tokdakpe kaato. Bím doomuglo yédbomdo delokke bíkke dumpodem murééyé garbomdo, bíkke mingmode doonyi kísa ido. Bí alede eme mepong kísa ido.

²Bí kitab aménako sorkaala bomdo. Bíkke lebíge siyéng asilo tuado delokke bíkke leké moopílo tudasudo,

³delo bí myomur uknam kísape séngéépe ukdo. Bíkke ukrodelo doomír kínítko mírdo.

⁴Edílo doomír kínít de mírtodí, delo ngo atpepak ido; idola delo teyong telok “Doomír kínítde ingkuem lutodí dem mesuptoka, atmapeka” emna agomko tatto.

⁵Delokrongem ngokke siyéng asi lolang moopílo dakdope kaanam teyong kotokide bíkke lakbíge talepe lengondo.

⁶Delo bí, yénam daknamlope duuyarna, among talengem delokke delo duuna kídíem, amongem delokke delo siyéngem delokke delo duuna takamem pína bíkkíng pélík sudola sikepe pokai, “Delo adol yimayé!

⁷Idokom kínít napena teyong kotokide bíkke bikul tapungem mutpe ido longedelo kénpí manam Shédíke arang atíem, bíkke béérang kaaluna miri kídílo lubinam kísape, bí iyinyé.”

⁸Delokrongem teyong telok agom podope ngokke tattonam agome lekoda sikepe podoku, “Siyéng lolang moopílo dakna teyong kotoki alaglo sorkaala bomnam kitabem gíla laato langka.”

⁹Depe iname teyong kotoki delo ngo gíla delokke bím kitab aménadem ngom bidope kokíto. Delo bí pokai, “Sim laala dotoka. Si nokke akii aadem kedíge imoyé, idakkom nokke nappalo ngullang kísape tííname iyé.”

¹⁰Ngo kitab ansoo nadem teyong kotoki alag delok laala doto. Si ngokke nappalo ngullang kísape tííname ido, idakkom edílo ngo méttodí, delo ngokke akiie díkname ikai.

¹¹Delokrongem ngom sikepe pokai, “No deddína ami kídílo, among amolo agom opéé kídílo delokke roja kídílo polu poorem pogong boperung aido.”