Read Alladian BEROK BINAM 11 Bible Online

BEROK BINAM 11 - Alladian bible

BEROK BINAM 11

¹Delo ngom kíkí nana arem ool kísanako boyikko bidola ngom sikepe poto, “Gíkala Shédíke kumkeng ekum emlang kumko baariem kítoka, delokke kumsuna kídíe edítko idudí sankítoka.

²Idola kumkeng ekumlokke luyuem kímape metoka, kapeila dem Mipak ami kídíem bitung. Bulu deena taonem poolo íying appi kolang annyiko samjémla yéyé.

³Delo ngo ngokke hakii annyidem pauarem biyé, delo bínyi 1,260 longe kokai, muun egem gedola polupoor agomem poyé.”

⁴Si hakii annyi simin olib esinge delokke among sokke Ruutum keralo dakna meru annyie.

⁵Séko bínyim míílo aabomdudí, dem bínyike nappanglok eme lenbomla bínyike mibo miruem gupakdo. Sikepemin bínyim míílona kídíe silikrupe aiyéne.

⁶Si ami annyi si buluke polupoor moodílo pedong opong madope emla talengem pitum nana pauare kadung; bulu asiem iyyipe ikunana pauarekom delokke amongem leko leko angu angu gíímang gérmang monana pauare kadung.

⁷Edílo bínyike hakii agérem iyintodí, delo monkírde doorum líísam amolok lenbomla bínyim mimak ila, delo bínyim ikumla rekpetyé.

⁸Bottena taon delo bínyike simange bedalo dooyé, dem amodem aid agompe lumílo Sodom, demangkom Ijipt emdungai; delomin buluke Ruutum mekom pettone.

⁹Kapeila longum kolang lootung kope angu angu amie, opíne agom opéye delokke doolunge buluke simadem yumape kaamanyé.

¹⁰Tani amosok amie bínyike sinamem ashébomla, bulu írga muape akone akonem aman bipéé sula iyé, kapeila, si ami annyi si polu poor bokolok tani gíídangem míídír sumodungai.

¹¹Idakkom longum kolang lootungko doorongem Shédí kelok turmokuna ngayabe bínyikíng angkaku, delo bínyi dakrep sukaku, delokke bínyim kaana takame pesorunge ikai.

¹²Teyong telok bulum, “So aatola” emnam agomko bínyi tatsuto. Delokrongem bínyi teyope doomug aralok sangkaku, delo buluke mibo miru kídíde kaatíla dungai.

¹³Dekepe idopakdem pesorunam mooton tarone tonkai delokke taon bottena íying lokke olekone bénpakkai. éjar kínítkope mooton taronlo amiem petto, delokke turna kídíe pesokai delokke teyongke Shédíme erkígeto.

¹⁴Gérmang annyie gíbongkai; angumnana gérmange menape píídak.

¹⁵Kínít napena teyong kotokide bíkke tapungem mutkai. Delo bottepe pona agomko teyong amolok lenkai, dekede sikepe lukai, “Tani among yétade ngoluke Ruutumke delokke bíkke Kristoke yétape ikai, delokke bí yénam daknamlope yébomyé.”

¹⁶Delokrongem Shédíke keralo agí umkélo duuna miro íying annyi kolang appide buluke mingmue gubadola delokke Shédíme kumdola,

¹⁷lukai: “Ngolu Ralya yalumna Ruutum Shédíme koyitdung, no duudung delokke yéto, kapeila nokke bottena pauarem laasuto delokke yélen bodak.

¹⁸Mipak kídíe marto; delokke nokke aklínge píngkai. Sinem bisardí longe píngkai, delokke nokke béérang kaaluna mirikídíem aman bidíkue píngkai. Delokke nokke ami kídíe delokke nokke amínem pesona kídíe, améne delokke bottene delokke amosim nyokmonem nyokmo díkue píngkai.”

¹⁹Delokrongem teyolo duuna Shédíke kumkeng ekumem siyyabito, delokke bíkke kumkeng ekum aradelo daapong sondugem kaato. Delokrongem yaarie, rímname, doomíre, mooton tarone delokke botteruna tapíe oto.