Read Alladian BEROK BINAM 13 Bible Online

BEROK BINAM 13 - Alladian bible

BEROK BINAM 13

¹Delokrongem ngo kaatoname monkírko siyéng asilok lendo. Bí areng íying kolang tukku kínítko gedo; areng mipídelo dumlup kodada gedo, delokke bíkke tukku mipídelo Shédíme lukaanam amíne dakdo.

²De monkírde simyo takar kísape ido, idola ale kídíde situm ale kísa ido, delokke nappade myomur nappang kísa ido. Dragonde bíkke pauarem bíkke umkéyém delokke bottepe ruutum genana ralnamem monkír delo bilíktung.

³Monkír delokke tukku akonde kaaname tarí ríbyangko gedo, idakkom ríbyade géédo kubong. Tani among tabunge kapei emla míngkai delokke monkír delo gímín gekai.

⁴Tanie Dragon dem kumkai, kapeila bí monkír delo ralnamem bilíktung, delokke monkír demteng bulu kumkai delokke sikepe lukai, “Séko monkír kísape iladun? Séko bím momín suladun?”

⁵Poolo íying appi kolang annyi legape adum alena agomem, Shédíme lukaa mankaanam agomem podope nappangem monkírdelo bitung delokke bíkke ralnamem igedope bitung.

⁶Bí Shédíme bíkke dungkuem, bíkke amínem delokke teyotelo duuna kídíem bíkke agí nappalok ngiléé sooléénam agomem polento.

⁷Shédíke ami kídíem mimak imín sudope pauarem delokke bulum ikum nana pauarem bitung. Delokrongem bím, opín kídíem, gompéé kídíem delokke among kídíem ruutum bomdope bitung.

⁸Amoso dungkína ami kídíe monkírem kumyé. Mérbéno kelo duuna, amínem turna kitablo atnam pílen ballendak delokai petnam kídí petome kummayé.

⁹“Séko nyorung gedudí, bím tatsu motoka.

¹⁰Sékome umpenampe idudí, bím umyérung, “Séko yoksalok papenampe idudí bí yoksalo silíkruyé. Si Shédíke ami kídí kepe yémgap delokke mínggap gepename.”

¹¹Delokrongem amoso monkír konko lendope ngo kaato. Bí Mérbéno kísape areng annyiko gedo, idola bí, Dragon kísape podo.

¹²Bí kerang monkír delokke ralnamem bíkke adumpe igedo, delokke ríbyang géngkap kuna kerang monkír dem tani amongela amikídíe kumsudope ito.

¹³Annyi napena monkírde pesonam irisinyuem ito. Bí tani keralo emem taleng telokke amoso otokdope ito.

¹⁴Kerangke monkír adumpe bím irisinyo iyod ilanana pauarem bikolok bí amoso duuna ami kídíem yatto. Yoksalok tarí paketnam idola turla duuna kerangke monkírdem míngge nape bí bulum mimangko modope lulíkto.

¹⁵Bím kerangke monkír mimang dem itur kunana pauarem bitung, depe inamde si agom poladope delokke bím kumsu pemang emla inakídíem petdope iname.

¹⁶Bí mipil miyongem amédak delokke borodak miremdak delokke opandak, ruutumdak delokke abíldak, buluke lakbíklo demangkom tuktalo soktam gedorupe itung;

¹⁷depe inamde sékote soktam gemadem rela demangkom kola imadope iname; de soktamde monkír delokke amíne demangkom bíkke amínlok soktam nombore.

¹⁸So gyanem míídung. Séko éérípe kéndudí monkír delokke nomborem isap kítoka, kapeila si tanike nombore. Bíkke nombore 666.