Read Alladian BEROK BINAM 14 Bible Online

BEROK BINAM 14 - Alladian bible

BEROK BINAM 14

¹Delokrongem ngo kaatoname ngokke keradelo Mérbénode Jayon díítelo dakdo, delokke bíkke lekope 1,44,000 amie agí amínem lang Abuke amínem buluke tuktalo atlík suneke dakdo.

²Delokrongem ngo teyong telok asi ngomdud kísana delokke doomír mírdut bottena adutko tatto. Ngokke tatnam adudde tapung munnake agí tapungem mudnam adud kísado.

³Delokrongem bulu paleng keradelo delokke turna atí appi delokke mirokídí keralo miri aníko lukai. Tani amosokke repít kunam 1,44,000 kékon delo sékote miri dem kénlana kamang.

⁴Sikesi agísuem mimelo ibulsumana kídíe, kapeila bulu agíe deenampe duusuto. Ingkolo Mérbénode gítodí, delo bulu mamín geto. Bulum tani gooralok rename delokke Shédíkílang Mérbénokíng bilíksuna obínge.

⁵Bulum sékoteng menam yadnam ludope tatpamang; bulum lukaa penam kamang.

⁶Delokrongem ngo kaatoname teyong kotoki konko among taleng pénsam telo yobdak, delokke tani amoso duuna among takamlo, opín takamlo, gompéé takamlo delokke ami takamlo turyarna ngiitomem pogong bipename bíkkelo kado.

⁷Bí bottepe pokai, “Shédíme peso gelangka, kapeila bíkke bisardíku moodíe píídak. Talengem, amongem, siyéngem delokke sirung asiem pílenna bím kumlangka.”

⁸Annyi napena teyong kotokidete lenmín gela lukai, “Babilonde nyokdak! Bí ami takamem tíngír sumoto, kedíkna onggur alang tíngkolok abír imem moto.”

⁹Angum napena teyong kotokidete lenmín gela bottepe poto, “Séko monkírdem delokke bíkke mimang dem kumla delokke bíkke tuktalo demangkom alaglo soktam ilík suyédí,

¹⁰bíkom Shédíke marlíng alangem, bíkke kedíkruna marlíngem batilo tíítak sudung. Deena teyong kotoki kídí delokke Mérbéno keralo bím eme dorna salparlok baapu baaléyé.

¹¹Delo bulum ingéénam míkkíe yénam daknamlope ungon saayé. Monkír demlang bíkke mimang kumsuna kepe, demangkom soktamlo bíkke amínem gena kídíde longe yohpe duunosudí kayimayé.”

¹²Si Shédíke ngiitomem igenalok kepe delokke Jisukíng míngkesula duuna Shédíke amikídí kepe yémgapla dongge pename.

¹³Delokrongem ngo teyong telok sikepe agom ponako tatto, “Sim attola: Supak kelokke ilangala Ruutum kepe sina kídíe gérne.” “Derung” emla Aide tolíkdola poto, “Bulu buluke ankírupe agér gérnam lokke duuno suyéku, kapeila buluke agérde bulum mamín geyé.”

¹⁴Ngo kaasu toname, ngokke keralo doomug yalunnako dakdo, delokke doomug aradelo “Tani oo kísanako” dumpolo uun dumlup gela delokke kassi ratnako bíkke alaglo bomla duudo.

¹⁵Delokrongem angukon teyong kotokiko kumkeng ekum delok lenla doomuglo duuna dem bottepe goklento, “Nokke kassiem bomtola delokke gattola, kapeila gaddíe píngkai, amosokke gatpename minkabong.”

¹⁶Depe iname doomuglo duunade amoso kassiem lengorla gatpe namem gatto.

¹⁷Angukon teyong kotokiko teyong telo kumkeng ekumlok lendak, delokke bíkom kassi ratnako kado.

¹⁸Teyong kotoki akonko aado kukéng. Bí emem ruutum bomla kumko baarilok lendo, delokke kassi ratna bomnadem ugonla tomla ludo, “Nokke kassi ratnem bomla delokke amosok onggur baganlok onggur ayém píltoka, kapeila onggur kídíde minkai.”

¹⁹Teyong kotokide bíkke kassiem lengorla amosokke onggur ayém laadumsula delokke dekedem botteruna Shédíke marko onggur alang sépkolo gelíkto.

²⁰Dekedem taon luyulo onggur alang sépkolo samjém líkto, delokke sépko delokke língko angum kilo mitar kokai delokke eeríe lakdu appi kokai iyyie biilento.