Read Alladian BEROK BINAM 15 Bible Online

BEROK BINAM 15 - Alladian bible

BEROK BINAM 15

¹Ngo teyong amotelo botteruna delokke irisinyo iyod konko kaato. De teyong kotoki kínítko méélam yalumna kilii ramponem kínítko bomaneke, kapeila bulu kelok Shédíke marlíngem iyinnato.

²Delokrongem ngo eme kataksuna siyénglo duuna arsi kísanako kaato. Monkírdem delokke bíkke mimangdem delokke bíkke iyod soktam genem ikumna kídíem siyéng asi robelo dakdope kaato. Bulu Shédíke bulum binam kéékung tapungem bomla,

³delokke Mérbéno lokke delokke Shédíke béérang Mosike miri kídíem sikepe gokdungai, “Tolya yalumna Shédí Ruutum, nokke agérde botterune delokke pesorunam irisinyue. No yénamlokke roje. Nokke bedange jonne delokke arone.

⁴Ruutum, séko nom pesomape idune delokke nokke amínem erkí gemanade? Kapeila no petommin deene. Takam opíne aayé delokke nokke keralo kumyé kapeila nokke aina agérem berok bitung.”

⁵Delokrongem ngo kaatoname teyong amolokke kumkeng ekumem siyya bikai.

⁶Delo kumkeng ekumlok kilii kínít bomna kotoki kínítko lendak. Bulu deenarung asire liplop ina egem gedo delokke uun kiijinem gedo.

⁷Delo turna atí appi delokke akone teyong kotoki kínít dem duuyarna Shédíke marlíngem bíísétna uun bati kínítko bito.

⁸Delokrongem kumkeng ekum dem Shédíke angun ralnam míkkíe delokke bíkke pauare bííbomkai, delo teyong kotoki kínít delokke kilii kínítde gíyin mang tetengem sékote kumkeng ekumdelo aalamato.