Read Alladian BEROK BINAM 16 Bible Online

BEROK BINAM 16 - Alladian bible

BEROK BINAM 16

¹Delokrongem ngo kumkeng ekum delok teyong kotoki kínít delo ponamem “Gíkala, Shédíke marlíng bati kínídem among teyoso pílíktoka” emdope tatto.

²Kerayalumke teyong kotokide gíla delokke bíkke bati delok amoso pílíkto, delo monkír mimang dem kumsuna delokke monkír delokke soktamem gena ami kídídelo bayikrupe kina taríeke lenkai.

³Annyi napena teyong kotokide bíkke bati delok siyéng teyolo pílíkto, delo de ami sina iyyi kísana iyyipe ikai delokke siyéng aradelo dungkína takame siyinkai.

⁴Angum napena teyong kotokide bíkke bati delok korong lolang sirung asilo pílíkkai, delo de iyyipe ikai.

⁵Delo asiem yébomna teyong kotokiem ngo tattoname sikepe lukai, “Yéduuna delokke yétona nokke bisartonam bisarde jonne E, Deena no, kapeila no arorulok bisarto.

⁶Kapeila bulu nokke ami kídíem kaaluna miri kídíem yilíng bídmoto, delokke kísape nokom bulum iyyiem tíímoto.”

⁷Delokrongem ngo kumko baari lok sikepe podope tatto: “Tolya yalumna Ruutum Shédía, no arue delokke nokke bisarde jonne.”

⁸Appi napena teyong kotokide bíkke batilok doonyilo pílíkto, delo doonyie taniem emepe baasan nana pauarem bito.

⁹Bulum doonyi pamkie baasanto delokke bulu sim kilii kídí sim ruutum bomna, Shédíme bééto, ilate bulu bursu kumang delokke bím erkí gemang.

¹⁰Pilngo napena teyong kotokide bíkke bati delok monkír delokke umkéélo pílíkto, delo bíkke amonge kaamo ruruge ikai. Tani kídíe kinam dosigem buluke ayuem kéjém sukai

¹¹delo buluke kikolok delokke buluke tarí kinam dosigem teyongke Shédíme béénato, depe idorungkom bulu buluke imemem bursu tokupe imang.

¹²Akké napena teyong kotokide bíkke bati delok Euphrat asidelo pílíkto, delo Sanggo lokke roja kídíe aadope emla sokke asie onggekai.

¹³Delokrongem ngo deemana Aideke tatík kísa ineke angumko kaato; bulu Dragon nappang loklang, monkír nappang loklang, delokke mena kotoki nappalok lento.

¹⁴Dekepe inade uyulokke irisinyo iyod kídíe, delokke bulu tani amosokke roja kídílo dumsula bulum Tolya yalumna Shédíke longelo mimak imínsupe emla gílen bosukai.

¹⁵“Kaatola, ngo doppyona kísape aadakku! Séko darla duududí bí mílípe yémadope delokke annyingem lengkan sumadope bíkke ege galugem bomrusula duududí de gérne.”

¹⁶Delokrongem Hibrulokke Armageddon emnam amolo bulu roja kídídem gokdum sukai.

¹⁷Kínít napena teyong kotokide bíkke bati delok asarlo pílíkto, delo kumkeng ekumlo duuna paleng delok agom bottenako, “Sim iyin tobong” emnako pokai.

¹⁸Delokrongem yaari elang, rímnamelang, doomírelang delokke séngééna mooton tarone tonto. Tani ballen delokke ilangala tani amoso sikena mooton taron kakí mangai, si botteruna mooton taronko.

¹⁹Botteruna taonde angumkope benpan sukai, delokke opín kídí lokke taon borona kídíe bénletkai. Shédí bí Bottena Babilon dem míípang sulangkula bím bíkke bíísétna marlíng alang batiem tíímoto.

²⁰Siyénglok moopí takame kayimang delokke dííte kídíem paala yimato.

²¹Taleng telok tebege íying pilngo kilogramna tapíe tani teyoso ojém líkto. Delo bulu tapí omodo emla Shédíme gééto, kapeila de pedong tapíde peso runameke.