Read Alladian BEROK BINAM 17 Bible Online

BEROK BINAM 17 - Alladian bible

BEROK BINAM 17

¹Bati kínít bomna teyong kotoki akonde ngom sikepe poto, “Aatola, asi robeng mipílo monam taonlo dunggona ingéé penam amín kanarung notiiem nom ngo sutlíkyé.

²Bíkkíng amosokke roja kídíe delokke bík abír ajonlo tíngír sukepe ito.”

³Delokrongem teyong kotokide ngom Aidlok mooruk amolo gíboto. Delo ngo kaatoname mimeko yalína monkír teyong kolo Shédíme lukaa luyéénam amínem gela delokke tukku kínít kolang delokke areng íyingko gela duudo.

⁴Mimede sémukdo delokke yalído ina egeko delokke asire liplop ina uunko, kampona tai tadok eke gedo. Bíkke alaglo kanggotnam atíeke batikolo bomdo, delo abír ajon inamete kado.

⁵Bíkke tukkulo sikepe attung: KÉNPÍMANAM BOTTENA BABILON LOKKE DELOKKE AMOSOKKE NOTII KÍDÍ KELANG BELUMNAKE ANE.

⁶Ngo kaatoname mimede Shédíke amikídí iyyilok, Jisume hakii bina kídí iyyilok tíngírsula dung. Ngo bím kaayédelo pesorunge ito.

⁷Delokrongem teyong kotokide ngom sikepe pokai: “No kapeila pesorupe míngkane? Areng íying gena delokke tukku kínít gena mime delokke kénpí manam arang atíemlang bíkke dungkeng monkír delokke legangem ngo nom pobiyé.

⁸De monkírde leko turla duuto, idakkom supak duuyimang delokke bíkke nyok pekolo gídak kubong. Pílen batlen delokke ilangala turna kitablo amín atmanam amoso duuna amikídíe monkírdem kaayém kapei emla mííyé. Bí leko turla duuto; supak duuyimang, idakkom bí lendakku.

⁹“Sim gyan delokke kénnam míídung. Tukku kínítde mime delokke dungko dííte kíníde. Bulu roja kínít kopekom ido.

¹⁰Pilngue nyokkai, akone duudung ada, akonde aamang ada; idakkom edílo bí aayédí bí anyongko duuyérung.

¹¹Leko turto, delokke supak duuyimana monkírde roja píínyie. Bí roja kínít delokke akone, bí nyokdak.

¹²“Areng íying kana, nokke kaatonamde among paamang adana idakkom gonta atel legape monkír delokke lekope roja akampe duubompena roja íyinge.

¹³Buluke mííbomnam atelde, buluke pauarem delokke ralnamem monkírso bilíkyé.

¹⁴Bulu Mérbéno sim mimak imínsuyé, idakkom Mérbénosi bulum ikumyé kapeila bí ruutum kídílokke Ruutume delokke roja kídí lokke Roje, delokke bíkkíng tomlennam kídíe, ullennam delokke míngkesula yémínna kídíe lekope dung.”

¹⁵Delokrongem teyong kotokide ngom sikepe pokai, “Nokke kaatonam notii dungko asi kídarde, angu angu amie, mibame, opín kídíe, delokke gompéé kídíe.

¹⁶Monkír delang nokke kaanam areng íyingde notii dem belumpene. Bulu bím inyokyé delokke bím mílípe meyé; bulu bíkke adínem doyé delokke bím emelo romyé.

¹⁷Kapeila Shédí bí buluke ainalo bíkke míínamem iyin bosudope itung, delo monkírdem Shédíke agome apíí mangadape monkírde ruutum bomdope pauarem bitung.

¹⁸Nokke kaatonam mimede tani among sokke roja kídíem ruutumna bottena taone.”