Read Alladian BEROK BINAM 18 Bible Online

BEROK BINAM 18 - Alladian bible

BEROK BINAM 18

¹Sok méélamlo teyong kotoki konko teyong telok tokdope kaato. Bíkke botteruna ralnamko kado, delokke tani amongem bíkke asirlok angunmoto.

²Bí bottepe lukai: “Nyokdakbong! Botteruna Babilonde nyokdakbong! Bí uyuke ekumpe ikai delokke belumna aid takam kelang takam belumna atí delokke deemana pettang yéman mankepe ikai.

³Legade takam opíne bíkke alangem tííto bíkke abírlo tíngírsuto. Tani among sokke roje bím abír ibosuto delokke tani among sokke pesikoret ine bím abír ibosukolok mirem lenkai.”

⁴Delokrongem angukon agomko teyong telok sikepe podope tatto: “Ngokke ami kídía bíkkelok lento langku, demílomin bíkke paab tarongem nolu paabo sumayéne, demílomin nolu bíkke kiliem paabo sumayéne.

⁵Kapeila bíkke paab kídarem teyong amolo megaptung, delokke Shédí bí bíkke imemem míípang sutídung.

⁶Bí kape bitodí depe biyan sutokuka. Bíkke imemem mangkam yape iyan sutokuka. Bíkke nom tííyépe emla iruu binamem Kedík yadope ila bíkke batilo píbíng líktoka.

⁷Bí kape agíe amín kamotodí delokke miremtodí dekepe edítko paklayédí bím ipusilééla adír motoka. Bíkke aanglo bí sikepe adum ale podung, ‘Ngo mime roja kísape idung, ngo meyémang delokke ngo edílokom ankímayé’.

⁸Delok legape bíkke kiliie longeko bím aabomyé; siname, ankí kenue delokke dírí kenue aabomyé. Bím emelo romyé, kapeila bím bisarna Shédí Ruutum bí tolne.”

⁹Edílo abír ibosuna delokke mirem rembosuna amosokke roja kídíe, bím romnamem kaayédí, bulu kabbomyé delokke ankíyé.

¹⁰Bím iréé namem pesola, bulu mooteng lokke dakdola sikepe kapyé: “Gérmange! Gérmange! E, Bottena taona: E, Babilon, pauar kana doolunga! Gonta atellok nokke gíímange aadubong!”

¹¹Amoso pesikoret inakídíe kapyé delokke bím ankíyé kapeila sékote buluke sérangem rebi yimang

¹²de sérang kídarde uune, areme tai tadoge, kampona ege, yamukne, remakne delokke yalína ege; sondon toktange, atí atí areng alonge, arekanarung esinge, murkong adíne, yogíre delokke yaorna elínge;

¹³elínglok pínam edunge delokke siri pooriyé, nampona atíe, namoona téle delokke arí namna atíe, onggur alange delokke olib téle, patír nyattíre delokke gehue, eso éége delokke gooru sobéne, gurée delokke guré gaarie, delokke abíle, tani amíle delokke aide.

¹⁴Bulu sikepe luyé, “Nok ankí bomnam ayé nokkelok gípakkai. Nokke mirem remnam takame delokke kampo tayyue nyokkai, edílokom paalat kuimayé.”

¹⁵Bíkkíng sim atí kídar sim kolíkna delokke bíkkelok paane done bíkke lokke mootenglo dakdola, bím iréénamem kaala pesue iyé. Bulu kapla rííla iyé

¹⁶delokke sikepe kapla luyé: “Gérmange! Bottena taon lokke Gérmange, gasor sémukna delokke yalína gene delokke uun asire benyi benyona lunggu lakrum gena nokke gérmange!

¹⁷Gonta atellok sikena bottena ekum arígem nyokmodak!” Asi jaji ruutum takame delokke jajilok enna gínakídíe, jaji solaina kídíe, delokke asilo paala dola yéna kídíe mootengoope yéyéku.

¹⁸Edílo bulu, bím romnam míkkíem kaayédí, bulu sikepe mííyé “Sikepakpe bottena taon kerape kape rulanga?”

¹⁹Bulu ankíem kapla rííla buluke dumpolo deemul pyaklík sula sikepe kapyé: “Gérmange! Bottena taon nokke gérmange: nokkelok siyénglo jajilo yéna kídíe buluke miremem bíkke séranglok remke natuai! Gonta atellok bím nyokyin motoku!”

²⁰Bíkke teyolo ashéng toka, teyong amonge Shédíke ami kídíe delokke tomlíknam kídíe delokke kaaluna mirikídíe ashélangka! Shédí bí bíkke nolum inam kísapakpe bím bisarem itoku.

²¹Delokrongem teyong kotoki tolnakone botteruna lííbyangko siyéng teyolo gelíkdola sikepe pokai; “Sikepena bottena taon Babilon dem gepak yéne lekokom paayi kumayé.

²²Kéékung tapung miriem delokke miri luna kídíem, puruli munna kídíem delokke bikul tapung munna kídíem nokkelo lekoda edílokom tatpang yimayé. Pesikoret ibona ami nokkelo lekoda edílokom tatpang yimayé.

²³Meru angune nokkelo lekoda edílokom angun yimayé. Duune makbo agom nokkelo edílokom tatpang yimayé. Nokke pesikoret inakídíde tani amosokke bottena amiekíai. Nokke jadu montrong agomlok takam opín kídíem gínyokboto.”

²⁴Bíkkímin kaaluna mirikídí delokke Shédíke ami kídí iyyiem delokke among teyoso petnam takam iyyiem paadungane.