Read Alladian BEROK BINAM 19 Bible Online

BEROK BINAM 19 - Alladian bible

BEROK BINAM 19

¹Sok Méélamlo teyong telo sikepe mibam bamdí ngomdut kísanako tatto: “Halleluyah! Turpe kuelang, angun ralnam elang delokke pauarde ngoluke Shédíke,

²kapeila bíkke bisarde aruelang delokke jonne. Tani amongem abírlok ibulbona notiiem bí inyokboto. Bíkke béérang midumem bí edo rayan sutoku.”

³Delo lekoda lukakune sikepe lukai; “Halleluyah! Bíkkelok míkkí saane saayar abungkai.”

⁴Miro íying annyi kolang appide palenglo duuna Shédíme gubadola kumto. Delo bulu bottepe pokai: “Amen, Halleluyah!”

⁵Delokrongem paleng delok agomko sikepe pokai: “Bíkke béérang kídí nolu takam, bím pesona kídí takam améédak delokke borodak ngoluke Shédíme yidgetoka!”

⁶Delokrongem ngo tattoname bottena mibam ngomdud, dínggo adud delokke doomír mírdut kísanako sikepe pokai: “Halleluyah! Kapeila ngoluke ralnarung Shédí ruutum bí yébomdung.

⁷Kaju ngolu erbom laju delokke ashélaju delokke bím erkí laju! Legade Mérbéno lokke nyamrane píídak, delokke bíkke nyamenge leemo sutobong.

⁸Kampona, angunna delokke deena egeke bím gedope bitung.” (Kampona egede Shédíke ami kídílokke aina agére.)

⁹Delo teyong kotokide ngom sikepe pokai, “Sim attola: ‘Mérbénoke nyamranlo tomnam kídíde gérne!’ ” Delo bí sikepe lukai, “Sikesi Shédíke agom arue.”

¹⁰Ngo bíkke alelo bím kumsupe emla olíkto. Idakkom bí ngom pokai, “Dekepe imapeka! Ngo nom igul nemino, delokke Jisume hakii bina nokke bíro kídíem agér gérbosune mino. Shédíme kumtoka! Kapeila Jisuke hakiide polu poor lokke aide.”

¹¹Ngo kaatoname teyong among eyabe siyyala duudo, delo ngokke keralo yalunna guréko kado delokke dem dukbom nadem Míngkeng delokke arue emdo. Bí jonnamlok bisarem idung delokke mimagem idung.

¹²Bíkke amigde meyo kísa ido, delokke bíkke dumpode dumlup mílí ido. Bíkke kékonlo sékote kénmanam amínko bí gedo.

¹³Bíkke genam egede iyyi mílí ido, delokke bíkke amínem Shédíke Agome emdo.

¹⁴Teyong among lokke sipaying kídíe, yalunna guré kídarlo duula delokke kampona egem gela, punnam elang deename ila bím mamín gedo.

¹⁵Bíkke nappalok opín kídíem papak nana ratnarung yoksako lendo. “Bí bulum arem boyiklok yéboyé.” Bí tolya yalumna Shédíke marlíngko onggur alang sépjin namem tujémyé.

¹⁶Bíkke ege lolang arbyalo sikepe atnam amínsim gedo: ROJA KÍDÍ LOKKETE ROJE DELOKKE RUUTUM KÍDÍ LOKKETE RUUTUME.

¹⁷Delokrongem ngo kaatoname teyong kotokiko doonyilo dakla yobna pettang kídarlo ulo jérla sikepe podope tatto, “Aatola, Shédíke bottena doman duusumlo aadum sutola,

¹⁸delokke roja kídíke, mimak ruutum kídíke, delokke sipaying kídíke, guré kídarlokke bulum dukbomna kídílokke, amikídí lokke, abíl delokke ruutum kídílokke, aména delokke borona kídí takam lokke adínem dodope Shédíke domanlo dumsutola.”

¹⁹Delo ngo kaatoname monkír delang among sokke roja kídíelang buluke sipayinge gídumsula guré delo duuna ami delokke bíkke sipayingem mimak enbomdo.

²⁰Idakkom monkírdem umto, delokke bíkke lekope bíkkepe irisinyo iyod ibona mena kotokidem umtaksuto. Sok irisinyo sokmin monkír lokke soktam gena kídíem delokke monkír lokke mimangem kumsuna kídíem bí yadnatone. Annyidem turdope salparlok eme dorna mepomlo yoplíkto.

²¹Abídem guré delo duuna lokke nappalok lenna yoksalok petyinto, delokke pettang takame buluke simang teyolo duula duam tíngam yimadope ito.