Read Alladian BEROK BINAM 2 Bible Online

BEROK BINAM 2 - Alladian bible

BEROK BINAM 2

¹“Si Epheso mondolilo duuna teyong kotokilo atname: Takar kínítko lakbíklo bomdola delokke uun meru kínít delo gígoona bíkke agom ponam kídíe sikesi.

²Noluke agérem, noluke ankípe ibomsunam agérem delokke yémgap teteng genam agérem ngo kéndung. Atímana ami kídíem noluke doolang gema namem, tomlíknam amie emla lusudola ikang kíname menampe ina kídíem ngo kéndung.

³Noludan yémgapto delokke ngokke amín legape yényi yésuem donggap geto, delokke míídír sugemato.

⁴Depe idakkom ngo sim nolum ludung: Nolu noluke kerangke ayang kísape ngom supak ayang yimang.

⁵Míípang sutolangku, edítna kedonna lokke olet tokun! Míílat sutokuka delokke noluke kerangke inamem itokuka. Idakkom nolu darngo suku mamílo, ngo nolukíng aalangkula noluke meruem laabín yéku.

⁶Idakkom si noluke ainame; depe emnamde ngokke aknam Nikolaitan kídíke inam agérem nolute akdung.

⁷“Sékoke nyorung kadudí, Aide mondolilo lubinamem tatsu langka. Séko ikumdudí bím Shédíke baarilokke turna esing ayém ngo domoyé.

⁸“Si Smyrna Mondolilo duuna teyong kotokilo atname: “Sikesi Kerayalumna delokke Méélam yalumna, delokke sipala turkuna bíkke agom ponam kídíe.

⁹Ngo noluke arééyém kéndung, ngo noluke opanem kéndung idola aropak nolu miremne! Séko bulu Judai amie emsudula Soitanke opéépe idola nolum lukang dudí dem ngo kéndung.

¹⁰Noluke adír penam legadem nolu pesue emla míítí gemapeka. Ngo lubidung uyue nolum ayoko aro menam ikaape emla pateklo meyé, delokke nolu looying kope taronang paayé. Sidak nyokdakkom míngkesula duulangka, delokrongem ngo nolum roja dumlubem biyé.

¹¹“Sékoke nyorung kadudí, mondoli kídílo Aidke lubinam sim tatsu langka. Séko ikumla yéyédí, bí lennyinape sipenamlo atí duuk paapenam kamayé.

¹²“Si Pergamum mondolilo duuna teyong kotokilo atname: “Sikesi orgíng annyie aarkana bíkke agom kídíe.

¹³Nolu ingkolo duududí ngo kéndung. Soitanke roja umké dungkuemkom ngo kéndung. Depe idokom noludan ngokke amínlo arope míngkesuto. Nolute bottena taon Soitanke dungkolo, ngokke míngkesuna ajon Antipame petdo longe kídar deloteng nolu ngom míngkengem mepak sumang.

¹⁴Depe ilate ngokke nolum lupe nameke kadung teteng: Israel ami kídíem ipak adín dodope delokke abír ajon imem bosudope paab imona, Balaamke luyillok yéna ami kídíemkom nolu yébosudung.

¹⁵Dekepakpe Nikolaitanke luyilem bomna ami kídíemkom nolu yébosudung.

¹⁶Delok legape míílat sulangkuka! Demamílo, ngo nolukíng menape aayéku delokke ngokke nappalok lenna yoksalok bulum imín suyéku.

¹⁷“Séko nyorung gedudí, Aidlokke mondoli kídílo ponamem tatsu langka. Ikumla yénem, ngo tíína ngamna manna ayokonem bipe. Punna elíng kokom biyé, delo elíng delo aní amínemkom attung dem laaríksuna petome kénsudung.

¹⁸“Si Thytira mondolilo duuna teyong kotokilo atname: “Sikesi Shédíke Oo, amige eme dorna delokke yogír ale gena bíkke agome.

¹⁹Noluke agérem, noluke ayang delokke míngkengem, noluke igulem delokke yémgabem, delokke kerang kempemílo noluke supak bojéyape inamem ngo kéndung.

²⁰Depe idokom si ngokke nolum lupename: Nolu, agíem Shédíke mime kotoki emsuna Jijibel emnam mime dem asoope kaayuto. Bíkke luyillok bí ngokke béérang kídíem abír ajon agérlo yémoto delokke ipak saamo adínem domoto.

²¹Ngo bím bíkke abír ajon inam lokke bursu dokupe moodíem bituai, idakkom bí depe ilíímato.

²²Depe ila bulu bím atímape ibosunamem mepak sulangkula míílat suku mamílo, ngo bím adír ippulo melíkyé delokke bím abír ibosuna kídíemkom anka sumoyé.

²³Bíkke ome-uem ngo dempet biyé. Delokrongem mondoli takame ngom aapí ainangem matane emla kényé. Ngo nolum mipilem noluke ikor sangorlok iyan suyéku.

²⁴“Idakkom Thytiralo duuna abíd kídí nolu sim atímana luyil sim mata mínmang; ayokone Soitanke eerína atí emnamdem kénmín getomang. Ngo nolum podung ngo nolukíng abíd abíd egedem pyalík mayé.

²⁵Nolu ingkuem bomdudí dem ngokke angkuma tetengem bomyar langka.

²⁶Séko ikumla yéyédí delokke yéyinlope ngokke míínamem ibiyédí, bím opín kídí teyolokke ruutumpe biyé.

²⁷“Bí bulum arem banggénlok yéboyé; bí kédeng peking kísape bulum demmíkyé. De ngokke Abukelok yébona ruutumem ponam kísape iyé.

²⁸Ngo bím roh puunepe imoyé.

²⁹“Séko nyorung gedudí, Aidke mondoli kídílo ponamem tatsu langka.