Read Alladian BEROK BINAM 20 Bible Online

BEROK BINAM 20 - Alladian bible

BEROK BINAM 20

¹Delokrongem ngo kaatoname teyong kotokiko doorum líísam lokke sabi emlang delokke bíkke alaglo bottena íkoliko bomla teyong telok tokdo.

²Konnying mennyingke tabípe baruna, Dragon, Piyyang uyu, soitandem bí umto delokke éjar dítag legape yééla meto.

³Bí bím doorum líísamlo yoplíkto, delokke ami kídíem yadyin madope emla éjar dítage gíyinmang tetengem, sabi etkapla delokke delo siil tuplíkla meto. Delokrongem bím moodí anyongo legape melenru pooyéku.

⁴Ngo kaatoname umkéé kídar delo duuna kídíem bisar ilanana ralnamem bitung. Delokrongem Jisume hakii bikolok delokke Shédíke agom legalok patunam ami kídí lokke aid kídarem ngo kaato. Bulu monkír dem demangkom bíkke mimangdem kummane delokke buluke tuktalo demangkom alaglo bíkke soktamem gemana kídíe. Bulu turlangkula dítag éjarko Kristome yébosutoku.

⁵Abíd sina kídíe éjar dítage gíyin mang tetengem turpong kumang. Simin kera yalumpe gerep kuname.

⁶Kerape gerep kunamso yémín gena kídíde gérne delokke deene. Lennyi napena sinamde bulum atí ilamang, idola buludan Shédí kelang Kristoke miripe iyé delokke dítag éjarkope bulu bím yébosuyé.

⁷Edílo dítag éjare pííyédí, Soitanem pateklok melenyéku

⁸delo bí among so rego regolo gígoola opín kídíem yadyé, de Gog delokke Magog emnam annyidem laadumsula mimakpe enbomyé. Buluke sipayinge sitong siiyé kísa bojéyé.

⁹Bulu among tabulo bííbomkai delokke Shédíke ami kídíke dungkuem delokke bíkke ayanam taon bottena dem gargong bomkai. Idakkom teyong telok eme oletla bulum gupakto.

¹⁰Monkír demlang mena kotoki kídíem salpar mepomlo yoplíkto, delo bulum yadna kídí emlang Piyyang uyudemte yoplíkto. Bulum longe yohpe agínpe irééla meyé.

¹¹Delokrongem ngo botteruna yalunna paleng kolang delo duuna dem kaato. among elang talenge bíkke lokke duggetoku, delokke buluke dungko kayimape ito.

¹²Delo sina kídíem, améédak bottedak paleng keradelo dakdope delokke kitabeke sorkaala dodope ngo kaato. Kitab konko soryapa, de turnam bina kitabe. Sina kídíem buluke inam saanam akorlok kitab kídarlo atnampe bisarem ito.

¹³Delo siyéng asie bíkkelo silíkna kídíem laalen bitoku, simo nyokmona kídíem melen bitoku, delokrongem takamem mipilke yékor dakkor isaplok bisarem ito.

¹⁴Delo sinam elang sina dungkuem mepomlo romlíkto. Mepomlo romlíknam demin lennyinape siname.

¹⁵Turnam bina kitab delo amín paamanam ayarem mepomlo romlíkto.