Read Alladian BEROK BINAM 21 Bible Online

BEROK BINAM 21 - Alladian bible

BEROK BINAM 21

¹Delokrongem teyong among aní kolang tani among aníko ngo kaato, kapeila kerangke teyong among elang kerangke tani amonge nyokkai delokke delo siyéng kayimang.

²Deena taon, Jirusalem aníem Shédíkelok teyong amolok miluem kaaríksupe emla kamporupe leemosula ina nyameng kísape tokdakpe ngo kaato.

³Delo ngo paleng delokke botterupe sikepe agom polennako tatto, “Supak Shédíke ekumde tani dungkepe ibosukai, delokke bí bulum duubosuyé. Bulu bíkke amipe iyéku, delokke Shédí bí agíe bulum duubosuyé delokke buluke Shédípe iyéku.

⁴Bí buluke miksi takamem títbín yéku. Delo sinam nyoknam, gííma siimo, ankí keno, kinam ramnam kayimape iyé, kapeila aku yéname gíbongkai.”

⁵Palenglo duunade pokai, “Ngo atí takamem aní modungku!” Delokrongem bí pokai, “Sim atgap langka, kapeila si agom kídí si míída subangkue delokke arue.”

⁶Bí ngom poto, “Sim iyinto! Ngomino Kerange delokke Méélame; Yélene delokke Yéyine. Asi tíílíng nadem ngo atí are lumape turnam bina sirunglok tíídope biyé.

⁷Séko ikumla yétodí bí sim takam sim ruutum dogeyé, delokke ngo bíkke Shédípe delokke bíte ngokke oope iyé.

⁸Idakkom pesona, arope míímana, ipatsuna, petna mona, abír ajon, miri uyu, jadu montrong ina, mimang kumsuna delokke mena yadna takamke amode salparlo eme dorna mepompe iyé. Si lennyinape sikuname.”

⁹Teyong kotoki kínít ara delokke bati kínítlo kitíl yalum kilii kínít bíídope bomnade aala ngom sikepe poto, “Aatola, ngo nom Nyameng, Mérbénolokke méngem lengkanyé.”

¹⁰Delokrongem bí ngom Aidlok gakbomla bottena delokke kedonnam díítekolo gaklíkto. De Deena taon, Jirusalem em Shédí kelok teyong telok oyidakpe lengkanto.

¹¹Sim Shédíke angun ralname ngunbomdo, delokke sokke asire ardana tai tadok, yaorna elíng kísa, deenampe kangore ido.

¹²Si bottena íying kolang annyiko luyabe ina, kedonna etorko kado, delo luyab kídí delo teyong kotokie íying kolang annyiko duudo. Luyab delo íying kolang annyi Israel opín amínem attung.

¹³Sanggo danlo luyab angumko, línggí danlo luyab angumko, sokko danlo luyab angumko, delokke anggo danlo luyab angumko kado.

¹⁴Taon delokke etorde gaange, íying kolang annyiko ido, delo dekedelok teyolo Mérbénoke tomlíknam íying kolang annyi amínem attung.

¹⁵Ngom luposuna teyong kotokide taon demlang luyab delokke etordem kíkí nape uun asékko bomdo.

¹⁶Taondem ape adonge akampak sudope itung. Bí taondem asék kolok kíkíname de ape adongelang, kedone idumsula 2400 kilomitarko ido.

¹⁷Bí etordem kíkíname lakdu 200 ko bíkke aro kínam isaplok iname ido.

¹⁸Etordem yaorna elílok píto, delokke taon agídem uun aro, arsi kísa deename idope pítung.

¹⁹Taon delokke gaang kídíem kampona elínglok leemotung. Kera yalumpe yaor nalok, annyinape yai nalok, angum nape líímonalok, appinape punna yayii nalok,

²⁰pilngo nape soyélsuna yalok, akkénape tadok kísa nalok, kínít nape yagé nalok, píínyinape yayii yiteng nalok, konang nape kangor nalok, íyingnape losun kísana yalok, íying kolang atel nape yayii dolang yiimo nalok delokke íying kolang annyinape yiimona elínglok pínameke.[9]

²¹Luyab íying kolang annyide, íying kolang annyi tadoge. Luyab mipíde tadok atellok pínampe ido. Taon delokke bedade kangorna arsi kísana uunlok píname.

²²Ngo taondelo kumkeng ekum kaamang, kapeila Tolya yalumna Shédí Ruutum delokke Mérbénode sokke kumkeng ekum sue.

²³Taondem angundope doonyi demangkom poolo míímang, kapeila Shédíke angun ralname delok angunsue, delokke Mérbénode sokke merusue.

²⁴Ami kídíe sok angunlok yéyé, delokke among sokke roja kídíe buluke sérangem so bomabiyé.

²⁵Sok luyabde siyyala duuyaryé, kapeila delo kaamo kayimayé.

²⁶Amikídí lokke erkínam amínem delokke malem so bomayé.

²⁷Deemana atíe delo edílokom aalamayé, menam yadnam demangkom annyiinam agér ina amiekom delo aalamayé, idakla Mérbénoke turnam bina kitablo amín atla menam kídí petome delo aalayé.