Read Alladian BEROK BINAM 22 Bible Online

BEROK BINAM 22 - Alladian bible

BEROK BINAM 22

¹Delokrongem teyong kotokide ngom Shédí kelang Mérbéno dungko palenglok benoorupe tokna turnam bina asi korongem lengkanto.

²De taon delokke bottena bedang raadalok tokdo. Korong delok robeng okékon teerelo turnam bina esiide duudo. De esiide poolo miyongem angu angu ayé éédola dítaglo lemying kolang lennyiko ayé éédo. Esing delokke anne kídarde ami kídíem ipínane.

³Delo béénam rolnam kayimayé. Shédí kelang Mérbénoke palenge taon delo duuyé, delokke bíkke béérang kídíe bím kumsuyé.

⁴Bulu bíkke mingmuem kaayé, delokke bíkke amínem buluke tuktalo geyé.

⁵Delo kaamo yoh kayimayé. Bulu meru angun demangkom doonyi angun mííyimayé, kapeila Ruutum Shédí bí bulum angunem biyé, delo bulu agínpe duuyaryé.

⁶Teyong kotokide ngom pokai, “Si agom kídarsi edíípe míída subaname delokke arue. Delokke kaaluna miri kídílo aid bina, Ruutum Shédí bí bíkke béérang kídíem menape aapena atí kídarem lengkan bidope emla bíkke teyong kotokiem melíktung.”

⁷“Kaatola, ngo menape aadakku! Sok kitab sokke polupoor binam agom kídarem bomgap nade gérne.”

⁸Ngo, Joan agímin, sim atii kídar sim tatnade delokke kaanade. Delokke edílo ngo sikesim tattodí delokke kaatodí, dekedem ngom lengkanna teyong kotoki delokke alelo gubadola ngo kumto.

⁹Idakkom ngom pokai, “Dekepe imangkom! Ngo nom delokke nokke bíro kaaluna miri kídíem delokke sok kitab sokke agom kídarem bomgap bosuna agér gérbosuna béérape komino Shédíme kumlangka!”

¹⁰Delokrongem bí ngom poto, “Sok kitab sokke polupoor binam agom kídar sim siil tupkap mapeka, kapeila moodíe anínkai.

¹¹Séko imemdudí bím imemkolok yéyar motoka, séko atímape yédudí bím atímalok yéyar motoka, séko ailok yédudí bím ailok yéyar motoka; delokke séko deela yédudí, bím deenampe yéyar motoka.”

¹²“Kaatola, ngo menape aadakku! Ngokke amande ngokkíng dung, delokke ngo mipilem mipil adulok biyéku.

¹³Ngomin Alpha elang Omega e, Kerang elang Méélame, Yélen elang Yéyine.

¹⁴“Séko bulu agíke egem etbín dudí bulu gérne, bulu turnam bina esing ayém dobaane delokke luyablok taonlo aabane.

¹⁵Idola luyudelo mipat kídíe, miri uyu jadu montrong ine, abír ajon ine, ami petna kídíe, esing elíng kumsuna kídíe delokke menam yadnamem yébomna mipíe dung.

¹⁶“Ngo, Jisu agíe, mondoli kídí keepe legang sim hakii bidope, ngokke teyong kotokiem nolukíng melíktung. Ngomin appíre delokke Dabidke otíng oyine delokke angunna roh puune.”

¹⁷Aidelang delokke Nyamenge, “Aatola” emperung aido, “Séko tíílí dudí, aamotoka, sékobulu míídudí turnam bina asi amanem asampe laamotoka.”

¹⁸Ngo sok kitabsok polupoor binam agom kídarem tatna mipíem lunoo bidung; Séko delo potem lutem líknako kayédí, so kitabso atkan binam kiliiem Shédí bí bíkkíng bitemlíkyé.

¹⁹Delokke séko sok kitab sok polu poor binam agomem laapak yédí, Shédí bím bíkke turnam bina esing ayé tarong emlang so kitabso atbinam, deena taon sokke tarongem laapak biyé.

²⁰Séko sim atíkídi sim hakii bidudí, bí sikepe podung, “Aropakpe, ngo menape aadakku.” Amen. Ruutum Jisua, Aatola.

²¹Ruutum Jisuke yanggonge Shédíke ami kídílo duudak langka. Amen.