Read Alladian BEROK BINAM 3 Bible Online

BEROK BINAM 3 - Alladian bible

BEROK BINAM 3

¹“Si Sardis mondolilo duuna teyong kotokilo[2] atname: “Sikesi Shédíke aid kínít em[3] delokke takar kínídem bomna bíkke agom kídíe. Ngo noluke inam saanamem kéndung!

²Simang adape míímo sutolangku. Kapeila ngo noluke agérem ngokke Shédíke keralo apíípe kaamang.

³Delok legape, ingkuem nolu paatodí delokke tattodí dem míípang sutolangku; dem igetola delokke míílat sutolangku. Idakkom nolu darngo suku mamílo, ngo pyoona kísape aayéku, delokke ngo edílo nolukíng aayékudí dem nolu kénmayé.

⁴Idakkom nolu Sardislo duuna ayokon amieke egem deenampe metung. Bulu punna egem gela ngokkíng yébosuyé; kapeila bulu punna egem gebane.

⁵Séko ikumla yéyédí, buluke kísape, bím punna egem gemoyé. Ngo bík amínem turnam bina kitab lokke moltít kumayé, idola ngokke Abu kelang delokke bíkke teyong kotoki kídí keralo ngo lukanbiyé.

⁶“Séko nyorung gedudí Aidke mondoli kídílo pobinam sim tatsu langka.

⁷“Si Philadelphia mondolilo duuna teyong kotokilo atname: “Sikesi deena delokke arona, Dabidke sabiem bomna lokke agom kídíe. Ingkuem bí siyya dudí, dem sékote sittum langkumang, delokke ingkuem bí sittum dudí, dem sékote siyya langkumang.

⁸Ngo noluke inam saanamem kéndung. Kaatola noluke legape sékote sittum lamadope eyabem siyyabila mebitung. Noluke ralname anyongoko, dem ngo kéndung, depe idokom nolu ngokke agomem bomsiito delokke ngokke amínem lupakmang.

⁹Agíem Judai amie emsudola menakídí, Soitanke opéé em noluke alelo gubadola kumsumoyé delokke ngokke nolum ayanamem ngo aala bulum lengkan biyé.

¹⁰Ngokke ngiitomem yémgapla bomsii nadem, ngokom nolum tani among tabulo bisar ipe namlokke mopít biyé. De bisarde tani amoso dungkína kídí tabung teyolo aro-menam kaanane.

¹¹Ngo menape aadakku. Sékote noluke gepenam roja dumlubem laabín madope, nolu ingkuem bomdudí dem bomgap sulangka.

¹²Ikumla yénadem ngo ngokke Shédíke kumkeng ekumlokke aane gaangpe imoyé. Edílokom bí dem lekoda mepak sukumayé. Ngo bíkke teyolo ngokke Shédíke amínem atlíkyé; delokke ngokke Shédíke bottena taon dungko amínem, ngokke Shédíkelok teyong telok tokna bottena aní Jirusalem amínem atlíkyé; delokke ngo bíkke teyolo ngokke aní amínemkom atlíkyé.

¹³“Séko nyorung gedudí Aidke mondoli kídílo ponamem tatsu langka.

¹⁴“Si Laodikia mondolilo duuna teyong kotokilo atname: “Sikesi míngkesuna delokke aro hakii, Shédíke pílen namem ruutum bomna, Amen emna lokke agom kídare.

¹⁵Ngo noluke inam saanamem kéndung, nolu ansii petemang pamki petemang. Nolu ansing mangke pamki berok duamílo aiduai.

¹⁶Nolu pamki petemang, ansing petemang, gapul gamulla iname ngokke nappalok nolum takilpe sukpak yébong.

¹⁷Nolu ‘Ngo mireme, ngo malem paato delokke atíyang mííyimang’ emsudung. Idakkom nolu ínpakne, opane, mingmane delokke pitkutsune, dem nolu kénsumang.

¹⁸Demílo ngo nolum emelo aro menam romkaanam ngokkelok aro uunem mirem nadope redope poyildung. Agíem gekom sudope delokke kanggotnam mílípe yénamem gekom sudope punna egem retola, delokke nolu kaabedope amiglo nyoolík sudope kuséreng emkom retola emdung.

¹⁹Séko bulum ngo ayang dudí ngo bulum lusudung. Dekepe iname mínggap langka delokke míílat sulangkuka.

²⁰Sina ngo, eyablo dakla pigadune. Séko ngok agomem taddudí delokke eyabem siyya bidudí, delo ngo aayé delokke bím dobo tííbosuyé delokke bíte ngokkíng depe iyé.

²¹Ngo agíe ikum geyéla ngokke Abuke umkélo duubo sukunam kísape, séko ikumla yédudí, bím ngokke umkélo duunam tarongem ngo bipe.

²²“Séko nyorung gedudí Aidke mondoli kídílo pobi tonamem tatsu langka.”