Read Alladian BEROK BINAM 5 Bible Online

BEROK BINAM 5 - Alladian bible

BEROK BINAM 5

¹Delokrongem palenglo duuna delokke lakbíklo arot konemlang arot konem akor atnam kitabko ngo kaato delokke delo siil kínítko tuplíktung.

²Delokrongem ngo tolnarung teyong kotokiko kaato, bí ugonla sikepe podo, “Séko sim siil kídísim benké ladun delokke kitab sim sorka ladun?”

³Idakkom sékoteng teyong lokom delokke amolokom demangkom rumkí lokom sim kitab sim sorkalana kamang, arang lote kangalana kamang.

⁴Ngo kapla kapla kaptíto kapeila sékoteng kitab dem sorkalana katomang delokke aralo kaapete kaalana katomang.

⁵Delo miro akonde ngom sikepe pokai, “Kapmapeka! Dabidke leríng, Judahke opínlokke Myomure ikum tobong. Bí kitabem sorkaayé delokke siil kínídem iyaboyé.”

⁶Delokrongem ngo pettonam mérbeno kísanako paleng raadalo dakdope kaato. Bím turna atí appi delang miro kídíde daggo bomdo. Bí areng kínítko kado delokke amig kínítko kado. De Shédíke among tabuso megoolíknam aideke.

⁷Palengdelo duuna lakbík delokke bí kitabem laato.

⁸Delokrongem edílo bí dem laatodí, turna atí appi delang, miro íying annyi kolang appide mérbéno keradelo olíkdo. Mipile kéékung tapung kolang Shédíke amikídí kumnana uun batilo arí nampona mílípe bomdo.

⁹Bulu aní miriko gokdo: “Nomin kitab sim laabane delokke sokke siil tupnam sim iyabopene; kapeila nom petto, delokke nokke iyyilok no Shédí kepe amiem reto de takam opín delokke agom delokke ami delokke among takamlok reto.

¹⁰No bulum yékeng yétape delokke ngoluke Shédíme kumna miripe ito, delokke bulu tani amongem ruutum bomyé.”

¹¹Delokrongem ngo kaasudola teyong kotoki kídíke éjar éjar, lak lak adudem tatto. Bulu paleng dem delokke turna atí kídídem delokke miro kídídem gargong bomto.

¹²Bulu botterupe miri lukai: “Pettonam mérbénode moyék namko bí pauarem delokke sérangem delokke gyanem delokke ralnamem paabane delokke bí míngge pename delokke erkípename delokke koyit pename!”

¹³Delo teyong amolo delokke among teyoso delokke among rumkílo delokke asi aralo duuna turkí ngakína takame sikepe ludope ngo tatto: “Palenglo duuna bím delokke mérbénodem yénam daknam loope koyitname delokke mínggename delokke erkíname delokke pauare duumín daklangka!”

¹⁴Turna atí appide lukai, “Amen” delokrongem miro kídíde gubadola kumto.