Read Alladian BEROK BINAM 6 Bible Online

BEROK BINAM 6 - Alladian bible

BEROK BINAM 6

¹Kínít lokke kerayalum siilem Mérbenode iya yédem ngo kangíto. Delokrongem turna atí appi delokke akone gumdut kísape “Aatola” emnamem ngo tatto,

²Ngo kaaname ngokke keralo yalunna guréko dakdo! Sim solainade ityiko bomdo delokke bím dumlubem bitung, delokke bí mimaklo ikumna amipe ila ikum gongkape emla dukdak.

³Edílo mérbénode annyi napena siilem iyatodí annyi napena turna atíde “aatola” emdope tatto.

⁴Delokrongem guré akonde yalí líísi ila lendo. Sim dukbomna dem amosokke yépe namem laabín langkula delokke tani eelenem petmín sudope bilíktung. Bím bottena yoksako bitung.

⁵Edílo Mérbénode angum napena siil dem iyatodi, angum napena turna atíde “Aatola” emdope ngo tatto. Ngo kaasu toname ngokke keradelo yoraana guréko dakdo! Sim solainade bíkke alaglo sér kíkí nana pallako bomdo.

⁶Delokrongem ngo tatbom doname turna atí appi delokke agome “Sapa sérde longelokke hajirange[5] delokke anyat sérde longe lokke hajirange,[6] delokke tél demlang onggur alangem ipit mapeka” emdope tatto.

⁷Edílo Mérbénode appi napena siildem iyatodí appi napena turna atídelok agome “aatola” emdope ngo tatto.

⁸Ngo kaasu toname ngokke keradelo yadééna guréko dakdo! Sim solai nadem siname emdo, delokke gíímange bím anín bomdo. Bulum tani among kéényung kereng takamlo yoksalok, dírí kenolok kilii ramponlok nyomrang simon siliilo petgoodope pauarem bitung.

⁹Edílo bí pilngo napena siildem iyatodí, ngo kaaname kumko baari rumkídelo Shédíke agom legape petnam kídí lokke aid kídare delokke buluke mínggap bosunam hakii agére dung.

¹⁰Bulu agome bottepe polenkai, “Edíí yalumna Ruutum, deena delokke arona! Nokke among teyoso taniem bisar ikumang adape delokke ngolum petnem ingéé yansu kumang adape edítko adolyéne?”

¹¹Delo bulum mipilem punna ege kodada bito, delokke bulum buluke agér ibosunam kídíem delokke bíro kídíem. bulum petnam kísape, apíípe petyin mang tetengem anyongoko duuno supong langka emto.

¹²Akké napena siil dem bí iyayédem ngo kanggapto. Mooton tarone tonkai. Sobén amítlok omnam muun kísape doonyie yorange ikai, poolo tabunge yalí líísi ikai,

¹³delokke tapang ayé yamoona kídíe gumnam asar mutyém dílpaknam kísa, taleng telokke takar kídíe amoso oletkai.

¹⁴Talenge ippu kísape títsum sukai delokke dííte takame delokke asi raadalok moopíe dungkollo duuyimang.

¹⁵Delo amosok rojakídíe, roja ookídíe, sipaying ruutum kídíe, mireme, ralne, delokke abíl takame delokke ruutum kídíe líípík arulo delokke dííte kídarlo, lííreng aralo rusigekai.

¹⁶Bulu dííte kídarem delokke lííne lííreng kídarem sikepe poto, “Ngolum ojémtola delokke palenglo duuna bíkke mingmo lokke delokke mérbénoke aklíng lokke ngolum mesuptola!

¹⁷Kapeila buluke botteruna marlínge píídak, delo séko dakka sulayéne?”