Read Alladian BEROK BINAM 7 Bible Online

BEROK BINAM 7 - Alladian bible

BEROK BINAM 7

¹Sok méélampe teyong kotoki appikone among sokke kéényung appiso dakdope ngo kaato. Bulu amosokke kéényung appisok mutna asarem amoso demangkom siyénglo demangkom esiilo mutmadope bomtumto.

²Delokrongem ngo teyong kotoki akonde turna Shédíke siilem bomla sanggo danlok aadope kaato. Moopí emlang asiem kusiipe inana pauarem binam teyong kotoki appidelo bí bottepe lukai;

³“Ngoluke béérang tukta kídarlo ngolu siilem tupket líkmang adape, amongem, asiem, esingem kusiipe ipe míípo mapeka.”

⁴Delo tupket líknam kídí isabem tatto: Israel opín takamem 144,000 ko tupto.

⁵Judahke opínlok 12,000 ko siil tupto, Reubenke opínlok 12,000 ko siil tupto, Gadke opínlok 12,000 ko siil tupto,

⁶Asherke opínlok 12,000 ko siil tupto, Naptalike opínlok 12,000 ko siil tupto, Manassehke opínlok 12,000 ko siil tupto,

⁷Simeonke opínlok 12,000 ko siil tupto, Lebike opínlok 12,000 ko siil tupto Issakarke opínlok 12,000 ko siil tupto,

⁸Jebulunke opínlok 12,000 ko siil tupto, Josephke opínlok 12,000 ko siil tupto, Benjaminke opínlok 12,000 ko siil tupto.

⁹Sok méélampe ngokke keralo kaatoname deddína sanam yimanam mitimilinge doolung doolung lokke opín opíne, angu angu amie delokke gomtí gomtí agom pone paleng keralo delokke mérbéno keradelo dakdo. Bulu ege yalunneke gedo delokke paam nemíngeke buluke alaglo bomdo.

¹⁰Bulu ugonla sikepe ludo: “Turnam bedade palenglo duuna ngoluke Shédíkelo delokke Mérbeno kelo dung.”

¹¹Teyong kotoki takamde palengem delokke mirokídíem delokke turna atí appidem dakgong bomdo. Bulu paleng keradelo buluke mingmue gubala delokke Shédíme kumdola,

¹²sikepe pokai, “Amen! Koyit namelang erkíname delokke gyane maniname, pauare delokke ralname ngoluke Shédíkíng yénam daknamlope duudaklangka. Amen.”

¹³Delo miro akonde ngom tatkído, “Punna ege genakídí si séko bulu, delokke ingkolok bulu aatone?”

¹⁴“Ngo kénmang, migome, nomin kénpene” ngo emto. Delo bí pokai, “Sikesimin peso yirírunam gumgolok batpok kune;” bulu buluke agí agí egem Mérbéno iyiilok etla punmotoku.

¹⁵Delok legape, “Bulu Shédíke paleng keralo dung delokke bíkke kumkeng ekumlo longe yohpe bím kumdung; delokke palenglo duuna bí bulum mosiiyé.

¹⁶Bulu edílokom lekoda keno yimayé; edílokom bulu lekoda tíílíng kayimayé. Doonyie bulum baaléémayé, doonyi pamki kokom kayimayé.

¹⁷Legade Mérbenode paleng raadalo duula buluke mér ruutumpe iyé; bí bulum turna sirunglo gílíkyé. Delokke Shédí bí buluke miksiem títbínyé.”