Read Alladian BEROK BINAM 9 Bible Online

BEROK BINAM 9 - Alladian bible

BEROK BINAM 9

¹Pilngo napena teyong kotokide bíkke bikul tapungem mutkai. Delo ngo takarko taleng telok amoso oletdope kaato. Delo takar delo doorum líísam amolokke sabiem bilíktung.

²Edílo bí doorum líísamdem etyatodí, mepom botteruna míkkí lenna eme kísape míkkíe sangkai. Doonyielang delokke talengem doorum líísam amolokke míkkíe ungkap bomkai.

³Delokrongem míkkí delok among teyoso takome lenkai delokke bulum amosokke képkong kísape pauarem bitung.

⁴Bulum amosokke ííngem demangkom neyi neyangem demangkom esingem, katmadope lutung, idakkom séko bulu agíke tuktalo Shédíke soktam tupket sunamem paamadí buluke petomem katlado.

⁵Takom kídí dem sim amikídí sim petdope bimang, idakkom poolo pilngo petomko ipusiléé dope bitung. Delo buluke kiname képkonge taniem sépnam kinam kísape kiyé.

⁶Dekepe ido longe kídí delo amie sinamem matayé, idakkom dem paamayé; bulu silínge iyé idakla siname bulum duggeyé.

⁷Takom kídarde kaaname mimak ipena guré kísape leemosudo. Buluke dumpong teyolo uun dumlub kísa ineke gedo, delokke buluke mingmue tani mingmuem gesudo.

⁸Buluke dumíd kídíde mime dumíd kísa ido, delokke buluke iipang kídarde myomur iipang kísado.

⁹Buluke nambíde yogír nambí kísado, delokke buluke alap yopdude mimaklo dukna guré gaari adud kísado.

¹⁰Bulu tamé gedo delokke képkong kísape sépdo delokke buluke tamédelo taniem poolo pilngoko anngéé sudope inana pauare kado.

¹¹Buluke ruutumbona rojako kado, de doorum líísam kaabomna doorum líísam kotokie; dem Hibru agomlo Abaddon, delokke Griklo, Apollon[7] emdo.

¹²Kerangke gérmange gíkai, abídkon gérma penam annyie aapename dungada.

¹³Akké napena teyong kotokide bíkke bikul tapungem mutkai. Delo Shédíke keralo duuna uun baari lokke aranglok agom[8] posul lendope ngo tatto.

¹⁴De akké napena teyong kotoki bikul tapung bomnadem, “Bottena Euphrat asi koronglo yééla menam teyong kotoki appidem melentokui” emla pokai.

¹⁵Teyong kotoki appidem melentoku; kapeila delok dítag delokke poolo, longe, gonta pakdelo tani takam angum lokke olekonem petpakdope bulum leemo líktung.

¹⁶Sipaying kídí lokke isabe língko annyi millionko idobong. Buluke isabem ngo tatto.

¹⁷Guré kídare delokke solaina kídíe ngokke kaarí kaanyolo kaaname sikepe ido; buluke nambíde meyo kísape yalínge, yorang yayinge, delokke salpar kísape yagé ido. guré dumpong kídare myomur tukkuem gesudo, delokke buluke nappalok eme, míkkíe delokke salpare lenkai.

¹⁸Tani takam angum lokke olekonem buluke nappalok lenna míkkí delokke salpar sok mokato.

¹⁹Guré kídar delokke pauare buluke nappang lolang buluke tamélo duudo. Buluke taméde tukku kataksula tabí kísa neke delogei bulu taniem tarí iketnado.

²⁰Tani abíd so gííma mona angumsok petmanam kídíde, depe ilate buluke inam kídarlokke míílat sukumang; bulu uyu kumsu namem mepak kumang delokke uun mimangem, aremem, pakrangem, esing delokke elíngem kaapamana demangkom tatpa mana demangkom gíkénmana mimangem kumsu namem mepakmang.

²¹Bulu níknam panam, jari montrong, abír ajon delokke buluke pyoonam donam takam emkom mepak kumang.