Read Alladian RUTH 1 Bible Online

RUTH 1 - Alladian bible

RUTH 1

¹Kebang ruutum kídíe ruutum bomdo longe delo, among delo dírí kenoko katuai. Dekepeila Judah lok Bethlehemlo duuna amiko, bík méng emlang oo annyiem, lekope ila, Moab amonglo oolko duudope ento.

²Ami delok amíne Elimelek, delokke bík méng delok amíne Naomi, delokke oo annyi delokke amíne, Mahlon delokke Kilion. Bulu Judah lokke Bethlehemlo duuna Ephrath amiekíai. Bulu Moablo ento delokke delo duuto.

³Delo duudoem Elimelek, Naomike milode sikai, delokke bí lang bík oo annyide duusuto.

⁴Bínyi Moab mimelok méngem laato. Akon lokke amíne Orpah delokke akon lokke Ruth. Delo bulu takying kope duurongem,

⁵Mahlon lang Kilion bínyiteng sikai. Delokke Naomi, oo annyie elang miloe kaimape duusuto.

⁶RUUTUM bí ayala bík ami kídíem, buluk legape donam-tíínamem ruubidungku emla bí Moablo tatyédem, Naomi lang bík nyameng annyide, Moab delok agí amongpe enlatkupe emla leemo lento.

⁷Bík dungko among dem metola, bík nyameng annyi delo lekope, Judah amonglo enlat kuko bedang delok enlentoku.

⁸Delo Naomi bí bík nyameng annyi dem poto, “Nonyi agí ane ekumlo enlat sulangkuka. RUUTUM bí nonyim ayang kalangka, kapeila nonyi ngom lang nonyim sinyonem ayato.

⁹Nonyim lekoda milo kalangkula ekum-rarung kasudope, RUUTUM bí ruudak langka.” Delo bí bínyim mumpupla, bulu yagorupe kabbosuto.

¹⁰Delokke bínyi bím poto, “Ngonyi nok ami kídílo nokkíng lekope enlatmín geyéku.”

¹¹Idola Naomi bí poto, “Ngok ome annyia, nonyi ekumpe enlat sulangkuka. Nonyi ingko legape ngokkíng enmín geyékune? Nonyike milope idope, ngo ueke kayékunía?

¹²Ekumpe enkalangku, ngok ome annyie. Ngote miloko kakupe supak eejo alongkai. Ngo míínam sudung emla ngo siyoh miloko ibbosula ueke odope idokom,

¹³buluk mine mang tetengem nonyi duuyalayédí? Nonyi buluk legape milo bommape duutíyénía? Ma, ngok ome annyie, nonyi kepe ngo yagorupe ankídung, kapeila RUUTUM ke alage ngok mirupe ikai.”

¹⁴Delo lekoda bulu séngépe kabbosutoku. Delo Orpah bí bík ayo anedem mumpup pala gípan sutoku, idola Ruth bí bíkkelo gígapmín geto.

¹⁵Naomi bí Ruth me poto, “Kaatola, nok belne, bík agí ami kídí lolang míngke subomnam shédí kídílo gíkaku. Bíkkíng ekumpe gímín getolangku.”

¹⁶Idola Ruth bí poyansuto, “Nom mepakla, nokke lok gílat dokupe ngom pomayika. No ingkolo gíyédí, delo ngo gíyé, delokke no ingkolo duuyédí delo ngo duuyé. Nok ami kídíde ngok amipe iyé, delokke nok Shédíbí ngok Shédípe iyé.

¹⁷No ingkolo siyédí delo ngo siyé, delokke delo ngom yuyé. Sinamem pomape atíkone ngom lang nom ipan suyémílo, RUUTUM bí ngom séngérupe ingéé daklangka.”

¹⁸Ruth bí bíkkelo gímín geperung emla inamem Naomi kénsuyédem, bí bím luya suyimato.

¹⁹Delok rongem bínyi Bethlehem em pííma tetengem enyartoku. Edílo bínyi Bethlehemlo píítokudí, delo luune tabungde bínyik legape lurepto, delokke mime kídíde íngkíto, “Si Naomi ya?”

²⁰“Ngom Naomi[1] emmapeka,” emla bí poto. “Ngom Marah [2] emlangka, kapeila RUUTUM bí ngok yénamem yagorupe adírmoto.

²¹Bíísétla ngo gílentuai, idola RUUTUM bí ngom araape aalat sumotungku. RUUTUM bí ngom adírem bila, gíímang-gérmangem ngok teyolo aamorodem, ngom kapeila Naomi emyéne?”

²²Sikepe Naomi bí bík Moab nyameng, Ruth me enbolangkula Moab lok enlat aatoku. Ayag gatlendí pakdem bínyi Bethlehem lo píídoku.