Read Alladian RUTH 2 Bible Online

RUTH 2 - Alladian bible

RUTH 2

¹Naomi bí bík milo Elimelek ke opín atíng-alelok, Boaj emnam mirem amiko kato.

²Longeko Moab mime Ruth bí Naomi me poto, “Ngom aríklo enmoika, delokke séko ngom ayang kaapayédí, bík méélamlo doona laangaknam aliem ngo títa-laata dope enmoika.” Naomi bí bím poto, “Aiyé, ngok ome no enkala.”

³Delo bí aríklo enla ayag gatna kídíke méélamlo langaknam abengem títaarepto. Dekepe tíla, bí Elimelek ke edung erang Boaj ke arík delo tíaato.

⁴Delopak Bethlehem lokke Boaj bí píílangkula, ayagem gatna kídídem ashéng agomem poto, “RUUTUM bí nolukelo yémín gedak langka.” Delo bulu poyansuto, “RUUTUM bí nom utepooroem bidaklangka.”

⁵Boaj bí ayag gatna kídíem yégebona dem íngkíto, “Si mimum si séko?”

⁶Yégebonade poyansuto, “Bí Moab lok Naomi kíng aamín gekuna Moab mimum demoko.

⁷‘Ayasula ayag gatna kídí méélamlo ngotsumla menam ayag aranglok ona abengem ngom títala leedum sumoika,’ emla bí rogula, aríklo enarongem siro rokom lokke supak loope ippolo duuno sukumape bí agér itídung.”

⁸Delo Boaj bí Ruth me poto, “Ngok ome, ngok ponamem tattola. Akon aríklo no gíla yakbeng títamapeka, delokke sokke gínyok kumapeka. Ngok agér iyabina mime kídíso yémín gelangka.

⁹Aríklo ingko danlo mime kídíe gaddudí dem kaasula, bulukelo yémín gelangka. Milokong kídíem, nom míílum madope, ngo potung. Delokke no edílo asi tíílíyédí, gíla milokong kídíke bomkunam asi pekinglok tíísu langka.”

¹⁰Delo Ruth bí amonglo migmue gubangdola, bím poto, “Ngo mibo among lokke kone, nok kangkolo kapeila sikena ayang yapegem pangkane?”

¹¹Boaj bím poyansuto, “Nok milo lok sirongem, nok ayo ane kepe no kape itodí, delokke no kape kísape nok agí ane-abu emlang agí ekum amongem metola kerangpe nok kénkímanam ami kídílo duumín gedope aatodí, delok legangem ngo tatyinto.

¹²No ingkuem itodí dem RUUTUM bí nom biyan langkuka, delokke RUUTUM, sékoke labbíng rumkínglo, nok duusi gekape angkeng, RUUTUM Israelke Shédíbí nom apíírupe amanem bidaklangka.”

¹³Delo bí poto, “Ngok ruutume, no ngom ayang rudo. Kapeila ngo nok agér iyabina mime koo kídísokke akon kope imalateng, no ngom ngiila aiyope luposuto.”

¹⁴Apim dodokuem Boaj bí bím poto, “So aatola. Ettíngko anyongko dola, nok ettíng pentungem onggur aponglo níknyom tola.” Edílo bí ayag gatna kídílo dunga míntodi, delo Boaj bí bím anam ayag eke bito. Bík doríko bí doto delokke dongat eteng anyongko kato.

¹⁵Bí yakbeng títape gerep rongkudem, Boaj bí bík ami kídíem políkto, “Bí ali ngotsumnam aranglok títadokom, bím luyang mapeka.

¹⁶Delok teyolo, ngotdum sunam yakbeng lok ayoko puulenla, bí dem títadope mebilangka, delokke bím atí noomapeka.”

¹⁷Yume loope Ruth bí yakbeng títato. Delo bí bík paadum sunam ayagem demlangkula kilogram íying píítana kope isito.

¹⁸Dem bí luunelo gealangkula, bík ayo anedem edítko bí laadum sutodí dem lengkantoku. Ruth bí bík dongat emkom bomtoku delokke bík ayo anedem bitoku.

¹⁹Bík ayo anede bím íngkíto, “No sim ingkolok itatone? Sékoke aríklo no agér iton? Nom ayana amidem Shédíbí aimodaklangka.” Delo Ruth bí bík ayo anedem bík agér ikuem pobisudola, “Ngok siloke agér imín geko ami delok amíne Boaj,” emla pobitoku.

²⁰“Turna lolang sinalo ayangem lengkanmape memana, RUUTUM kelok bí gérdaklangka,” Naomi bí bík nyamengdem podola, potemto, “De amide ngoluk erang raanín page. Bí ngoluke erangkone.”

²¹Delo Moab mime Ruth bí poto, “ ‘Ngok aliem laasing yinma tetengem ngok agér gérna kídíso yémín gelangka,’ emlangkom bí ngom poto.”

²²Naomi bí bík nyameng dem poto, “Ngok ome, bík mime koo kídílo gímín gemílo nok legape aiyayé, kapeila amikon aríklo imílo, nom ipusiléé langkom iyé.”

²³Dekepe ila Ruth bí ayag emlang géhuem gatyinmang tetengem laangaknamem paatadope, Boajke béérang mime koo kídí delo yégapmín geto. Delokke bí bík ayo ane delo duumín geto.