Read Alladian RUTH 3 Bible Online

RUTH 3 - Alladian bible

RUTH 3

¹Longe konem bík ayo ane Naomi bí bím poto, “Ngok ome, nok aipe duupe-dakpe koko nok legape ngo ekumko mata bikí mayénía?

²Béérang mime koo kídílo nok yémín geko, Boaj bí, ngoluk midín konmanía? Siyoke yoh so bík ayag yikpomlo kabbínyé.

³No agíe ursula delokke nampona tél molsula delokke nok gaiyalumna egem gelangka. Delo ali yikpomlo toklangka, idola bík doyin-tííyinma tetengem, no kénko sumapeka.

⁴Bí edílo ibaayédí, bík ipkodem an-gap langka. Delo gíla bík alelok egem lekyapala delo ketmín gelangka. Bí nom kape ipe aiyédí, dem nom pobiyé.”

⁵“Nok ponam takam dem ngo iyé,” emla Ruth bí poyansuto.

⁶Delo bí ali yikpomlo tokla, bík ayo aneke bím ponam pakpe iyinto.

⁷Boaj bí doyin-tííyin rongem ashéngrupe ila, yikpom kéényung delo gíla ketto. Ruth bí beiyope aala, bík ale delok egem lekyala ale ampeng delo kedaato.

⁸Yoh raajang delo amide darngo sulangkula, peldola kaasu dokudem bík aledan delo mimeko ketdupe kaasuto.

⁹“No séko?” emla amide íngkíto. Delo bí poyansuto, “Ngo nok béérang Ruth moko; no ngok erang raanín page, iname nok yambo delok ngomte pobotola.”

¹⁰“RUUTUM bí ngok ome nom aimo daklangka,” emla bí poyan sudola, “Nok kerang delo lengkan sunam dempemílo si ayang sunam si botteyadung. Miremlai, opanlai, no yaamé koo kídí méélamlo gímato.

¹¹Delo supak ome no pesomapeka. Nok konam takamem ngo nok legape ibiyé, kapeila luune sok ngok ami takame nok ai-asangem kaala aina mimeko emla kényindung.

¹²Aroe ngokom erang raanínsue, idokom ngom pemílo raanín yangko kadung.

¹³Yoh sim so duulangka, delokke nyampo rokomlo bí nok legangem togepe mííyémílo aiyé, bím togemotoka. Idola bí togemayémílo, berok rupe ngo Turna RUUTUM kelo pésudung; ngo kaayé. Paangmang tetengem so ippo langka,” emla poto.

¹⁴Dekepe ila bí paangmang tetedem, bík ale anínlo ipto. Idola ami atí kaabeng mangadape bí gerepla poto, “Ayag yikpomlo mimeko aatoka emla kénmomapeka.”

¹⁵Boaj bím poto, “Nok yambo genam dem so tamla puto.” Bí bík pokampe ito, delo bí kilogram íying annyi píítana kope ayagem yambo delo toolík bila, dem bíkkíng joolíkto. Delo bí luunelo gela enlat sutoku.

¹⁶Edílo Ruth bí bík ayo ane delo aatokudí, delo Naomi bí bím íngkíto, “Ngok ome no kape kísa itone?” Delo bí Boaj ke bík legape inam takamem bím pobitoku.

¹⁷Delokke bí potemto, “Bí ngom sim kilogram íying annyi píítana ayag sim, ‘Nok ayo ane kelo lakraape enlat kumapeka,’ emdola bilíktungku.”

¹⁸Delo Naomi bí poto, “Ngok ome, legang si kape iyédí. No kénbeemang tetengem doyalangka. Kapeila legang sim berokma tetengem amide silo apéémayé.”