Read Alladian RUTH 4 Bible Online

RUTH 4 - Alladian bible

RUTH 4

¹Boaj bí luune yapgo delo gíla duuto. Bíkke lupanam Elimelek ke erang raanín amidem delok bedang delok gíangdupe kaayédem, Boaj bí bím gogla poto, “Hina ngok angonga, so aala, dungapotola.” Delo bí gíala dungato.

²Boaj bí luune delok miro íyingko tomto delokke bulumte delo duunga míndope pola bulu dungamínto.

³Delo Ruth me kaasipena dem poto, “Moab lok aalatkuna Naomi bí, ngoluk bíro Elimelek ke among alop konem kope míídung.

⁴Ngo sim legang sim nom kénmope mííto, delokke so duuna kídí solang ngok ami lok miro kídí kerang so, no sim redope emla ngo míídung. No repítpe míídomílo, sim repíttola. Idola no remayémílo ngom kéndope polangka. Kapeila nok kékonlo sim rebaanape ngo idung.” Delo bí “Ngo repítyé,” emla poto.

⁵Delo Boaj bí poto, “Naomi kelok among dem nok redo longe delo, no sinyonam meyéng Ruth memkom, bík ekuranglo lekope sina ami delok amínem bomdope retaksuyé.”

⁶Delo kaasing kupena amide poto, “Dekemílo sim ngo repít lamayé, kapeila ngok agíke asi-amongem aimang ipaasupelo. No agíe sim repíttola. Ngo sim ilamayé.”

⁷Mennying-konnying Israello, ato repítnam legangem delokke ekurangem akonlo melík yinnam legape, ato kona amide agíke leyugem pítsula renadem bidungai. Si Israel lok pesi-koret inam ayon séguíai.

⁸Dekepeila kaasing kupena amide Boajme poto, “No sim resutola.” Delokke bí bík leyugem yugbínsuto.

⁹Delo Boaj bí miri kídí demlang ami takam dem pokansuto, “Elimelek, Kilion delokke Mahlon buluk ekurang takamem Naomi kelok ngo reto, emla silo nolu takame hakiipe idung.

¹⁰Delok teyolo Mahlon ke meyéng, Moab mime Ruth me, ngok méngpe laato. Si sina delok amínem bík ekuranglo lekope bomla bík luunelok delokke bík erang kídílok bík amínem nyokmomayé. Silo nolu sok hakii kídíe.”

¹¹Delo miro kídíe lang yabgo delo duuna kídíe poto, “Em. Ngolu hakii kídíe. Israel lok ekumem lekope morepna, Rasel delokke Leah bínyik kísape, nok ekumlo aana mimedem RUUTUM bí imodaklangka. Ephrath lo no edíng daklangka, delokke Bethlehem lo tatyinnampe idak langka.

¹²So mime so RUUTUM ke nom ome-oo binamde Tamar kelang Judah bínyike oo Perej ke erang kísape nok erange idak langka.”

¹³Dekep ila Boaj bí Ruth me méngpe laala ekumlo aabotoku. Delo RUUTUM bí bím koo gedope ruulíkla oo ko oto.

¹⁴Mime kídíde Naomi me poto, “RUUTUM me yidge langka. Kapeila silo bí nome kaabomdope otenko bitung, delokke bím Israel tabunglo tatyin daklangka!

¹⁵Bí nok yénamem aimoyéku, delokke nok eejoyém nom usiyéku. Kapeila oo kínídem pemílo aiyadope nok míísunam, nom ayang suna nyamenge oo dem otung.”

¹⁶Delo Naomi bí koodem bola, bík angkeng keralo bola bím aipe kaabomsuto.

¹⁷Kumrípe duuna mime ane kídíde, “Naomi kelo oo ko oto,” emdola bulu bím Obed emla amínem mínlíkto. Bí Dabid me ona Jesse ke abue.

¹⁸Simoko Perejke otíng-oyine: Perejke ue Hejron,

¹⁹Hejronke ue Ram, Ramke ue Amminadab,

²⁰Amminadabke ue Nahshon, Nahshonke ue Salmon,

²¹Salmonke ue Boaj, Boajke ue Obed,

²²Obedke ue Jesse, Jesseke ue Dabid.