Read Alladian 1 SAMUEL 11 Bible Online

1 SAMUEL 11 - Alladian bible

1 SAMUEL 11

¹Poolo kope idungem Ammon kídíke roja Nahash bí agíke sipaying em gíbola Jabesh Gileadem gargooto. Jabeshlok ami kídíde Nahash me poto, “Bonyingko ngolukíng ibosutola. Dekepe imílo, ngolu nokke rumkílo duuyé.”

²Nahash sipe bulum poyansuto, “Noluke mikbígem ngo rooyin lenla Israel takamke keralo nolum annyidope inam dem nolu tolík yémílo, ngo nolum bonying sim ibosulado.”

³Jabeshke ruutum kídíe, “Ngolum longe kínídko among rego mipílo pogoonem melíkdope bika. Sékoteng ngolum igulna kamayémílo, ngolu nokke aralo duuyé,” emla poyansuto.

⁴Pogoona kídíde, Saulke dungko Gibeahlo pííla, legang dem bulu pobitoname, ami kídíde adírla kapto.

⁵Saul bí aríklok gooruem enbo langkula píídopakku. Delo bí íngkíto, “Íngkoko ikan? Kape takame kapyin duune?” Bulu Jabeshlok aala pogoona kídíke pobinamem pobito.

⁶Edílo Saul bí dem tattodí, Shédíke aide bíkkíng pííla, bí yagorupe marto.

⁷Bí gooru annyiko laala, tarong-tarongpe tekpala pogoona kídíem tarongem bomla Israel among takamlo oryin godola sim lutor agom sim podope lulíkto. “Sékodín Saul kíng lang Samuel kíng mimaklo enmín gemayéne, bíme sikepe gooru sim panam kísape payé.” Israel ami kídíe RUUTUMke ipenamem pesola, takame gílenla dumsuto.

⁸Saul bulum Bejeklo laadumsuto; delo aradelo 300,000 ko Israel lokke delo Judah lok 30,000 ko kato.

⁹Bulu Jabesh lokke pogoona kídídem poto, “Noluke ami kídíem nyampoke longe raadamang adape mopítyé emlangkuka.” Edílo Jabeshlok ami kídíe dem agom dem tattodí, bulu yagorupe ashéng dola,

¹⁰Nahash me poto, “Nyampo ngolu agíem nokke rumkílo melíksuyé, nokke míínampe no ngolum ilado.”

¹¹Delo yume delo Saul bíkke ami kídíem opéé angum kope ipan sula, rokom ngargo delo miru notko kídí delo aabomla Ammon kídídem mimak iyabomto. Longe raadang deloope bulu Ammon ami kídídem petto. Mopítsuna kídíde dugpit-dugyitla sékokom midum annyipe ila dugbosuna kaimato.

¹²Delo Israel ami kídíe Samuel me poto, “Saul me ngoluke rojape míímang emna kídarde ingkolo? Bulum mokadope ngolukíng melíktoi.”

¹³Idola Saul bí emto. “Silo séko memkom petmayé. Kapeila, si longe simin Israelem RUUTUMke mopítdí longe.”

¹⁴Delo Samuel bulum poto, “Kaju ngolu takam Gilgal elo gíla, lekoda Saul me ngoluke rojape ullíklaju.”

¹⁵Dekepeila, bulu takam Gilgallo gíla, delo deena moolop kolo Saul me rojape ullík bosutoku. Bulu ashéng aman ipagem ilíkla, Saul lang takam Israel ami kídíe dem longe dem ashéngpe loodum bosuto.