Read Alladian 1 SAMUEL 12 Bible Online

1 SAMUEL 12 - Alladian bible

1 SAMUEL 12

¹Delo Samuel Israel ami kídarem poto, “Ngo noluke pokampe ibito. Nolum ruutum bodope ngo nolum rojako bito.

²Delokke supak lokke ila nolum bí yéboyé. Ngokke pedan, ngo mijingla dumpu gela ikai, delokke ngokke oo kídare nolu kíng yémín gedung. Ngo noluke mirope ngok yaamé siisa lokke ila, silo loope idung.

³Sina ngo. Ngok imemnamko katomílo, RUUTUMke lang bík ulsunam roja keraso supak ngom lutoka. Kape, ngo amike gooruko demangkom amike gadoko laabi kíton? Ngo amiko yadla demangkom adír mola ikíton? Kape, ngo aroem ikappe ami kolok abal langkíton? Ngo sikesim atel koteng inamko katumílo, ngo ngok laanamem bilat suyéku.”

⁴Ami kídíde emkai, “Ma. No ngolum yadmang delokke ngolum adír bipete bimang. Delo no séko kelokte íngko koteng laanam kamang.”

⁵Samuel poyansuto, “RUUTUM lang bík ullen sunam roja bínyi silo noluke ngok teyolo atí imem kaapamanam lokke hakiie.” “E, RUUTUM bí ngoluke hakiie,” emla bulu elíkto.

⁶Samuel poto, “RUUTUM agísuemin Mosi melang Aaron me ullensula, noluke buku kídíem Ijipt amonglok laalenkune.

⁷Supak nolu takam daklangka, delo ngo nolum RUUTUMke nolumla noluke buku kídíem mopítduem miram agér gérnam kídarem RUUTUMke keralo popabiyé.

⁸Edílo Jakob lang bík erange Ijiptlo tokla, Ijipt amie bulum adír motodí, delo noluk buku kídíe igulkola, RUUTUM kíng kapgusuto. Delo bí Mosi melang Aaronme melíkla, bulum Ijiptlok laalen langkula supakke dungko among so duumotoku.

⁹Idola ami kídíe RUUTUM buluke Shédíme mitpansuto. Dekepe ikolok bí Philistain kídíem, Moab lokkela Siseralok roja kídíem delokke Hajor luunelok sipaying ruutumem, noluke buku kídíem mimak ibom mola ikum moto.

¹⁰Delo bulu RUUTUM kíng igul legape kapgu sudola poto, ‘Ngolu yémemto, kapeila ngolu ruutum nokkelok mootengla Baal kelang Astarteke mimang kídíem kumsuto. Ngolum miru kídísok mopíttoi. Delo ngolu nom kumsuyéku.’

¹¹Dekepeila, RUUTUM bí Gideonme, Barakme, Jephthahme delo ngom teng melíkto. Ngolu takame nolum noluke mirulok mopítla, nolu ai-kampope duuyinto.

¹²Idola edílo nolu Ammonke Nahash rojabí nolum iyabompe inamem kaatodín, delo nolu RUUTUMme noluke rojape míípakla ngom poto, ‘Ngolum ruutum bodope ngolu rojako míídung.’

¹³“Supak sina noluke míínam rojae. Nolu bím kola, supak RUUTUM bí bím nolum bitung.

¹⁴Nolu RUUTUM noluke Shédíme pesola, agér gérbila, bík agomem tatbila, delokke bík lulíknamem ibila, delo nolu lang noluke rojae bík pokampe imílo, noluke takam agér-aname aiyé.

¹⁵Dekepe imape, nolu bík agomem tatmape bík lulígem ipat sumílo, bí noluke lang rojalok mirupe iyé.

¹⁶Dekepeila, asoope daklangka, delokke nolu RUUTUMke irisinyo agér gérpenamem kaayé.

¹⁷Si doreng-dosandí mangía? Idola, ngo kumyé delo RUUTUM bí doomír-yaari emla pedongem melíkyé. Edílo sikepe iyédí, delo nolu roja konam si botteruna imemko RUUTUMke keralo ito emla míísuyé.”

¹⁸Dekepeila Samuel kumto, delokke delo longe deloi RUUTUM bí pedong emla doomír-yaariem melíkto. Delo takam amie RUUTUM melang Samuelme pesoto.

¹⁹Delokke Samuelme bulu roguto, “RUUTUM nokke Shédí kelope ngolu simadope kumbiyika, ngolu supak míísudungku. Ngoluke abíd imem teyolo ngolu akoda roja kokoso imemtungku.”

²⁰“Pesomapeka,” Samuel poto, “Nolu sikena deemana agérko iduakom, RUUTUM kelok ngétpak kumapeka. Idola bím noluke aro aapílok apíngpe agér gérbilangka.

²¹Yadna kídí méélamlo gímapeka; bulu nolum igul lamayé, demangkom nolum mopít lamayé, kapeila bulu aromang.

²²RUUTUM bí deenampe togesudung, delokke bí nolum mepakmayé, kapeila bí nolum bíkke amisupe míísat sudung.

²³Ngokke pedan, noluke legape kumbiyimadope, dekena imemem RUUTUM bí ngom imomayika. Dekepe imape, ngo nolum ainem lang aroem ipenam kídarem poyil biyé.

²⁴RUUTUMke lulígem tatla bím arolok noluke aapí-aang takam lok bík agérem gérbilangka. Noluke legape bík botte-bottena agér gérbinamem míípa sulangka.

²⁵Idola, no deemana agér itíyémílo, nolum lang noluk roja em nyokmoyé.”