Read Alladian 1 SAMUEL 16 Bible Online

1 SAMUEL 16 - Alladian bible

1 SAMUEL 16

¹RUUTUM bí Samuelme poto, “No edít peda Saulke teyolo ankí yéne? Ngo bím Israel lok rojape míípakto. Idola supak olib tél anyongko laala Bethlehem lok Jesse emnam ami delo gílangka, kapeila ngo bík oo kídílok oo akonem rojape ullentung.”

²“Ngo kape kísa elo enyén?” emla Samuel íngkídola, “Saul bí sim tatmílo, bí ngom petyé” emto. RUUTUM bí poyansuto, “No rubílko gíbola elo RUUTUM kelo ipakpe ilíkyé emtoka.

³Jesse me ipak iko delo tomlangka, delo ngo nom ipenamem poyilyé. No ngok políknam amidem rojape tosak líklangka.”

⁴Samuel RUUTUM ke ponam pakpe ito. Bethlehemlo bíkke enangdodem doolung delokke miro kídíe bím pesolok dandola kaaríkla poto, “Kaana no, aina legang koya aabomdune?”

⁵Samuel poyansuto, “E, ngo so ipakko RUUTUM me ilíkpe aadung. Nolu agíem deebín-ibín sula ngokkíng aamín gelangka.” Bí Jesse melang bík oo kídí emteng deesudope pola ipak delo aadope tomto.

⁶Edílo bulu aatodín, Samuel Jesse ke oo Eliab me kaala agíe posuto, “Si RUUTUMke keralo dakna ami sima depekom bík ullen suname.”

⁷Idola RUUTUM bí bím poto, “Bíkke yaamé kolok delokke bodí-bottenam em kaala aang omapeka. Ngo bím míípakdung. Kapeila, ngo amilok kaanam kísape kaamang. Amie luyu lokke kaapanamem kaala idung, idola ngo aapí-aangem kaadung.”

⁸Delo Jesse bík oo Abinadab me tomla Samuelke keralo dagamoto. Idola Samuel pokai, “Ma. RUUTUM bí bímkom tomang.”

⁹Jesse bí delo Shammah me bomato. Deloteng Samuel, “Ma, RUUTUM bí bímkom tomang,” emto.

¹⁰Sikepe ila Jesse bí bík oo kíníd demkai Samuelke keralo bomabito. Idola Samuel poto, “Ma, RUUTUM bí buluke aralok séko meteng ullenmang.”

¹¹Delo bí Jesse me íngkíto, “Nok oo kídíe siría?” Jesse poyansuto, “Aní yalumko kadung, idola bí supak mér sobénem kaabomla yédung.” Samuel lulígto, “Bím so aadope tomato. Ngolu bíkke aamang tetengem ipak sim ilíkmayé.”

¹²Dekepe ila Jesse bím tomtoku. Bí amíle edíngla amig eteng kampola, yaamérunakuai. RUUTUM bí Samuelme poto, “Si moko ngok ullenname. Bík teyolo tél pílíkla tosak líklangka.”

¹³Depeila, Samuel olib téldem laala Dabidme bík abíng kídíke kerang delo pílíkla tosak líkto. Delopak, RUUTUM ke aide Dabid kíng aalíkla, delok longe delok ila bíkkíng duumín gekai. Depe irongem Samuel Ramahpe enlat sutoku.

¹⁴RUUTUMke aide Saulme mepakla gíkaku delokke RUUTUMke melíknam deemana aidkone Saulme adír moto.

¹⁵Bík béérang kídíde Saulme pobito, “Kaatola ngolu kéndung, Shédíke melíknam deemana aid komin nom adír modune.

¹⁶Dekepeila, ngolum no lulígtola, ngolu harp tapung batjina amiko matabiyé. Delo edílo deemana aide nokkíng aayédí, delo de amide harp tapungem batyém, nok aapí-aange gepoyéku.”

¹⁷Saul bulum lulígto, “Ngom batjina amiko mabila ngokkíng bomalangka.”

¹⁸Bíkke béérang kone pokai, “Bethlehemlo duuna Jesse bí, tapung batjina oo ko kadung. Bí miga-miramla, ralna rungko. Bí agom emteng pojila, kamporuna yaamé koo ko. Delokke RUUTUM bí bíkkíng duumín gedung.”

¹⁹Dekepeila, Saul bí Jesse kíng kotokieke melíkla sikepe pomoto, “Nokke mérem kaabomna nok oo Dabidme ngokke so melík langka.”

²⁰Jesse bí dekepeila, Dabidme Saul kíng, sobén oo kolang gado kolang burla goona ettíngeke eget kope delokke ayo nyogon kolo apong bíínako ila melíkto.

²¹Dabid Saul kíng aala bík agérlo gérabito. Saul bím yagorupe mííbala, bík gíníng yoksem geya binape ullensuto.

²²Delo Saul Jesse me agomko melíkdola poto, “Ngo Dabidme aipe míídung. Bím so ngok agérem gérbidope duumo langka.”

²³Delokke ila, edí-edílodín RUUTUMke melíknam deemana aide Saul kíng aatone delo, Dabid harp tapung dem laala batbi dungai. Dekepe iyém aidde Saul kelok gígéé langkula, Saulke aapí-ainange gepodungkuai.