Read Alladian 1 SAMUEL 19 Bible Online

1 SAMUEL 19 - Alladian bible

1 SAMUEL 19

¹Saul bík oo Jonathan melang takam béérang kídíem Dabidme petpe míínamem poto. Idola, Jonathan Dabidme yagorupe mííba sukolok,

²Dabidme pobito, “Ngok abue, nom petpe em idung. Nyampoke roem no ansulangka; ami kénmangko among kolo gíla rusi sulangka.

³Ngo nokke rusi suko among delo, abuem gíbosula, bík ampe delo dakla, nokke legang eke poyé. Delo ngo atíko kénlen yémílo, dem nom ngo kénmoyéku.”

⁴Jonathan bí Dabidme yidbom dola Saulme poto, “Roja no nok béérang Dabidke teyolo imem mapeka. Bí edíloteng nom atí loorímana agér ikímang; dekepe imape bík agér gérnam takam de nok ainam legape ito.

⁵Bí agíke sinamem pesomape Goliathme petla, RUUTUM bí Israel legape ikumem bito. Edílo no dem kaatodí, no ashéto. Demílo, supak kapeda no atí loorímape imana Dabidme atí legang kamape petpe emla míídun?”

⁶Saul Jonathanke agom kídídem airupe tatgappala, Dabidme petmayé emla RUUTUMke amínlok pésuto.

⁷Dekepeila, Jonathan bí Dabidme goglen langkula, takam legí-sigangem pobito; delo bí Dabid me Saul kíng gíabo langkula, Dabid bí kerape rojadem agér ibinam kísa ibitoku.

⁸Lekoda, Philistain kídíe mimak ibom tokukéng. Dabid bulum imín sula bíkkelok takame dugyin getoku.

⁹Longe konem, Saulke ekumlo, bík alaglo gíníng dem bomla delokke Dabidke Saulke legape harp tapungem batbila duudungem, RUUTUM kelok deemana aidko Saul kíng aalíkto.

¹⁰Delo Saul Dabidme suppi delo gíníng delok geket líkpe gelíkto. Idola Dabid gubgela, gíníngde suppilo geket líkla dakkai. Dabid bí duknyok gela agíem mopísuto.

¹¹Delo yume deloi Saul bík amieke melíkla Dabidke ekum dem kaabomdola, rokom dem Dabidme petdope lulíkto. Dabidke méng, Mikal bí bím lutor bito, “No siyum duknyok gemamílo nyampo no siyé.”

¹²Delo bí Dabidme kirki kolok letyi lenla, Dabid duknyokla mopísuto.

¹³Delo Mikal bí ekum delokke uyu mimang dem laala, ketko delo ketmola, bénmíd lok monam dumtenko dumpong rumkí delo melíkpala, egeko polum líkto.

¹⁴Edílo Saulke ami kídíe Dabidme umpe em aabomtodí, delo Mikal Dabid me kidung embito.

¹⁵Idola Saul bí bulum gílangkula, bulu agísue Dabid me kangkí dope lulígla poto, “Dabid me bík ketpu delok yétla so bomatoku, ngo bím petyé.”

¹⁶Bulu ekum delo gíala, merunam ekum delokke uyu mimangem ketke delo dumpong rumkínglo bénmíd dumtenko bomdupe kaato.

¹⁷Saul Mikal me íngkíto, “Kapeda no ngom sikepe yadla, ngok miruem, mopísudope duknyok mokan?” Bí poyansuto, “Bí ngom, bím igul mamílo petyé emkolokmin ngo sikepe itone.”

¹⁸Dabid bí agíem mopísula, Samuel kíng Ramahlo dugang gela Saulke bík teyolo inam takamem pobito. Delo bí lang Samuel gíla Naioth amonglo duuto.

¹⁹Dabidke Ramahlok Naioth amonglo duunamem Saulme pobineke kala,

²⁰Saul Dabidme umdope amieke melíkto. Kaaluna miri alung konem yagorupe miri lula kaalu-kangor agom pola paksong soola delokke Samuelme buluke igebonape bulu kaato. Delo Shédíke aide Saulke ami kídí deloteng aalíkla buluteng paksong soola, kaalu-kangor agom poto.

²¹Sok legangem edílo Saul tattodí, delo bí bojéyangko kotokiem melíkto. Idola buluteng depe paksong soola, érla ikai. Delo Saul lengumnape kotokilok melíktoku. Idola, buluteng akampe ilíkkai.

²²Delo Saul agísue Ramah doolungpe enlento. Edílo bí Seku doolung lokke bottena asi déérung delo píítodí, delo bí Samuel melang Dabid me paarík supekuem íngkí toname, Naiothlo kadung emnamem tatpaato.

²³Saulke Naioth pe gídagem, Shédíke aide bímteng gagbomla bíteng Naioth lok bedang rubudem, paksong soola, miri lula kaalu-kangor agomem pola pííto.

²⁴Bí agíke egem pítbínsula Samuelke keralo paksong soola, érla ito, delokke delo longe delolang yoh ruubudem, mílípe ketto. Sikepe ila, “Saulteng kaaluna miripe ikanaya?” emla ponam gomli agome lenkai.