Read Alladian 1 SAMUEL 21 Bible Online

1 SAMUEL 21 - Alladian bible

1 SAMUEL 21

¹Dabid Noblo Ahimelek kíng gíato. Ahimelek dandola bím kaarík supe lenla, íngkíto, “Kape no agí atele so aadun?”

²“Ngo so rojalok agér kolo aadung,” emla Dabid poyan sudola, “Roja bí ngom bík tomlíkgang sim séko meteng kénmo mapeka emlíktung. Ngok ami kídí kepedan, bulum rego kolo ngom kaarík sudope potung.

³Demílo supak, nokkíng ingkue keda kadun? Ngom burla goona ettíng lok pilngoko demangke nokkíng ingko kodí kadun, dem bitola!” emto.

⁴Miride pokai, “Ngokkíng moomem ettíng kamang. Deena ettíng petome mino kadune! Nok ami kídíde anínpe méngem ketbosuma mílo no sim laalado.”

⁵Dabid poyansuto, “Aropekom bulu ketbosumang, ngok ami kídar si agínpe emmum moomem tomlík loteng dormo ayonlok deenampe mesurodem, so apekrupe tomlíknam so ngolu edítko deela duudun!”

⁶Dekepe mankolok miride Dabid me deena ettíng delok bito. Kapeila bíkking Shédí kíng tolíknam ettíng petome kato. Bí deme deena lengkeng delok laabínla iigaana aní ettíng lok meyan líktoku.

⁷Saulke mér kaabomna ruutum, Edom lok Doeg bí delo longe delo, dormo ayonko ipíng mope emla delo yégoto.

⁸Dabid Ahimelekme íngkíto, “Nokkíng gíníng demangke yoksa ko ngom bipenam kadudí? Rojalok tomlík kídíde ngom lomla gílen mokolok, ngo lomla yoksa emlang mimak ekurangem laadíku kamato.”

⁹Ahimelek poyansuto, “Ngokkíng nokke Elah among elo petnam Goliathke yoksae kadung; deme Ephod méélam esi ege kolok yétlumla metung. No míídumílo laatoka, de petom mai so yoksape duudun.” Dabid poto, “Deme ngom bitoka. Sok yoksa sok kísana abíd yoksa ingko loteng kamang!”

¹⁰Dekepe Dabid Saul kelok duggela Gath lok roja Akish kíng aato.

¹¹Delo Akishke béérang kídíe bím poto, “Bí sok among sokke roja Dabid mangía? Si ami si lal mime ane kídíke paksong soola, miripe: Saul éjar-éjarem petto, idola Dabid bí jarying-jaryingem petto, emla goggename.”

¹²Buluke agom kídí sim Dabid aapí aralo míngge dola, bí Gathlok roja Akish me yagorupe pesolento.

¹³Dekepeila, ami kídíke keralo bí tumrula, luyablo gítmanla bík sokmurlo sokyolem bítkat-bítyatsula tumna ami kísape ito.

¹⁴Dekepe ikolok, roja Akish bík béérang kídíem poto, “Kaatola, si ami si tumnako! Kapeila, nolu bím ngokkelo bomadune?

¹⁵Ngokkíng deddína tumna amie kerapekai kamanía? Kapeda akoteng bomtem líkla, ngokke ekum soi, bík bedu-belenglok ngom agu-aak mokan?”