Read Alladian 1 SAMUEL 22 Bible Online

1 SAMUEL 22 - Alladian bible

1 SAMUEL 22

¹Dabid Gath delok duknyok langkula Adullam doolung anín lokke bupík kolo duuto. Edílo bík bíro kídíe lang abíd erang kídíe bím delo duudung emla tattodí, bulu bíkkíng aamín geto.

²Adír paana, ajéng gena delokke ankí-kenona ami kídíeteng handum sula língko appi kope milokonge bíkkíng lekope yémín gela, Dabid bí buluke ruutumpe ito.

³Dabid delok enlenla Moablok Mijpahlo gíla Moab rojadem roguto, “Ngok ane-abuem so nokkíng, Shédíke ngok teyolo ipenam em lengkanmang adape, duumo podak yika.”

⁴Dekepe ila, Dabid bík ane-abuem Moab roja kelo melíkto. Bulu Dabidke bupík delo rusi sudo loope delo duumín geto.

⁵Delo kaaluna miri Gad bí Dabid kíng aala poto, “So duumapeka; menape Judah kídíke amonglo gílangka.” Dekepeila, Dabid delokke gíla, Hereth moonamlo enlíkto.

⁶Longe konem Saul bí Gibeah lokke díítelo Tamarisk esing rumkíng kolo, bík alaglo gíníngem bomla duudungem delokke bík béérang kídíe bím gargo bomla dagdungem, bíme Dabid melang bík ami kídíem paato emla popa bitonam,

⁷bí bík béérang kídíem poto, “Tattola, Benjaminke ami kídía. Dabid bí nolum asi-among, onggur ríkséngem nolum takam bila, delokke nolum bík sipaying kídíke ruutumpe imoyé emla míídunía?

⁸Sok legapía nolu ngok mirupe idune? Nolu sékoteng ngom, ngok agí oosue Dabidme angong ngola pébosunamem pobikuna kamang. Supakke moodí so Dabid ngok agísu amie, ngom petpe em bedang matanam delokke ngok oosue erlíknam em sékoteng ngokkepe mííbila ngom pobina kamang!”

⁹Doeg bí delo Saulke béérang kídíem dagbo sudoai. Bí poto, “Ngo Dabid me Ahitubke oo Ahimelek me Nob doolunglo kaarík suduem kaato.

¹⁰Ahimelek RUUTUM kelok Dabidke ipenamem íngkípala, Dabidme donam ekelang Philistain Goliathke yoksaem bito.”

¹¹Dekepeila, roja Saul Ahimelek melang Nob doolunglo miripe ina bík erang takamem tomdope lulíkla, bulu takame bíkkíng aato.

¹²Saul Ahimelek me poto, “Ahimelek, tattola.” Ahimelek poyan suto, “E, ngok ruutum ngo tatdung.”

¹³Saul bím íngkíto, “Kapeda Dabid nonyi ngokke mirupe rungkup bosukan? Kapeda no bím donam ekelang yoksako bila, bík legape Shédíme íngkí bikan? Supak bí, ngok mirupe ila, ngom petpe em bedang matala toyadung!”

¹⁴Ahimelek poyansuto, “Dabid bí nok agom tatya yalumna béérange! Bí nok agísu magboe. Nok agí amíl suke sontori lokke ruutume, delokke nok ekum erang araloteng bím takame mínggedung.

¹⁵Ngo bíkke legape Shédíme silo tatkí binam de imem donía? Delokke nokke mirupe rungkupnam legang emdan, ruutum no ngom lang ngok erang lok séko mekom dai bimapeka. Ngo sok legang em atí koteng kénmang.”

¹⁶Rojade pokai, “Ahimelek, no lang nok erang takame siperung aiyé.”

¹⁷Delo bí bík ampenglo dakna sipaying kídídem lulíkto, “RUUTUM ke miri kídar sim petto! Bulu Dabid kíng lekope ngome rukupla bulu kéndo terílateng, ngom bík duunyok namem pobimato.” Idola sipaying kídíde RUUTUMke miri kídíem petpe alage lakrepmato.

¹⁸Dekepeila, Saul bí Doegme, “No bulum petto,” emla lulík kolok Doeg bulum takam petto. Delo longe delo bí Ephod ege gena miriem midum íying píínyi kolang pilngoko pakato.

¹⁹Delok teyong loteng Saul miri kídíke luune Nob lok abíd milokong, mime, koo-kíang, ojing kídí, delokke taro kídíem, gado kídíem, mér kídíem petyin dope lulígla petyinto.

²⁰Idola Ahimelek ke ookon Abiathar bí agíem mopísula, gíla Dabid kíng lekobosuto.

²¹Bí Dabidme kapekísa, Saul bí miri kídíem pakatodí dem popa bito.

²²Dabid bím poto, “Edílo ngo Doegme delo longe delo, elo kaatuadín, delo ngo depekom bí Saulme pokung yéku emla kénto. Depeila, ngo nok erang kídíem simonape ikai.

²³Ngokkíng so duumín gelangka, delokke pesomapeka. Saul bí ngonyimkai petpe míídung, idola no ngokkíng mopísula duuyé.”