Read Alladian 1 SAMUEL 24 Bible Online

1 SAMUEL 24 - Alladian bible

1 SAMUEL 24

¹Saulke Philistain kídarem mimak ipala aadokuem, Engedi mongku-mooruk amonglo Dabid bí dung emla pobito.

²Delo Saul bí Israelke sipaying aralok beréyalumna jarum sipaying ko gíbola Dabid melang bík ami kídíem Moonam Sobén Lííreng emnam sanggodanlok matalento.

³Saul bí sobén lokke bedang gípom abe lokke bupík kolo aala apééto. Delo Dabid lang bík ami kídíe bupík delokke aranglo rusisula duudo.

⁴Bulu Dabid me poto, “Sina nokke aina moodíe! RUUTUM bí nok miruem nok alaglo melíkyé embitung. Delokke no bík teyolo nok míínamem ilayé.” Dabid bí beiyope egala Saulke ipnge sudungem, Saulke genam ege delokke alopko gatlento.

⁵Idola delo Dabidke mííyi-míísange bím adír molenla,

⁶bí bík ami kídíem poto, “RUUTUM bí bík ullensunam roja, ngok ruutumke teyolo atímana agér ilík madope gagbom daklangla! Ngo bím anyong koteng atímape ilíímang, kapeila, bí RUUTUM agísuke ullensunam rojae.”

⁷Dekepe pola Dabid bík ami kídíem Saulme mimakpe iyamadope míímoto. Saul gerep langkula, bupík delok lenlangkula bedang delok enlen kupem ito.

⁸Delo Dabid, bík méélam delo gímín gedola, Saulme gogla poto, “Ngok ruutuma!” Saul billat sudokuem, Dabid bí Saul me míngge dola amonglo gubala,

⁹“No kapeda, ami kídíke, nom ngo atímape ipe ibomdung, emla ponamem arope tatdun?

¹⁰No supakteng agíe RUUTUMke nom ngok alag aralo bupík arang elo melíknamem kaasulado. Ngok ami ayokone nom peddope ngome potuai, idola ngo nokke legape aapíe kila, nom anyong koteng adír iketmayé emto, kapeila, nomin RUUTUMke ullen sunam roje.

¹¹Kaatola, ngok abua. Kaatol ngom, nokke ege alopko bomnam sim! Ngo nom petlatuai, idola ngo ege alop petom sim min gatlentone. Sikepe ngok inam si ngo nok mirupe demangke ngo nom petpe imang emnamem kénmope aidung. Ngo nok kaabamape atí imalateng, no ngom petpe emla montíbomdung.

¹²RUUTUM bí ngonyik aralok sékodín imemdune, bím lengkan daklangka. RUUTUM bí nokke ngok teyolo inam kídí legape ajéng luket daklangka. Kapeila, ngodan nom anyong koteng adír ilíkmayé.

¹³Deemana ami lokmin deemange lendune emla gomkuem no kéndung.

¹⁴Israelke rojalok petpe ibomnam sim kaatola! Bíkke monbomnam sim kaatola! Bí sina ekii kísana komin, tamid kísana komin.

¹⁵RUUTUM bí íngkí-bengkíyé, delokke bí ngonyike aralok séko imem dune dem kaalenyé. Bí sikesim kaadola, ngom deepít bila, nokkelok mosi daklangka.”

¹⁶Edílo Dabid bí sipe poyin todín delo Saul pokai, “Arorupe noya ngok oo Dabid?” emla bí kapkai.

¹⁷Delo bí Dabidme poto, “No arodung, delokke ngo imemdung. Ngokke sikepe nok teyonglo imem lateng, no ngok teyolo edítko ainamem itune.

¹⁸Silo nokke ngok teyolo aipe míínamem ngom lengkanto, kapeila, RUUTUM ke ngom nok alaglo melík bilateng no ngom petmato.

¹⁹Kapeila, ami kone bík miruem umpala, petmape emmumpe melík yékunía? RUUTUM bí nom silo ngok teyolo sipe inam legape utepooroem melík daklangka!

²⁰Supak ngo peebepe kénkai. No Israelke rojape ila, nokke ruutum aralo among si duuyéku.

²¹Idola ngom RUUTUMke amínlok ngok otíng-oyinem, ngok amín elang erang amínem mitpan sumadope, ayala mesamyé emla pésuto.”

²²Dabid bí depe iyé emla pésuto. Delo Saul bík ekumpe enlat sutoku, delokke Dabid lang bík ami kídíe buluke rusi suko mooloppe gílat sutoku.