Read Alladian 1 SAMUEL 25 Bible Online

1 SAMUEL 25 - Alladian bible

1 SAMUEL 25

¹Samuel sila, Israel kídí takame aadumsula, bíkke legape ankí-kenoto. Delo bulu bím bík doolung Ramahlo yuto. Sikepe irongem, Paran lok mongku-mooruk amonglo Dabid bí ento.

²Delo Kalebke odong lokke Nabal emnam amiko kato. Bí Maon doolung lokke, delokke bí Karmel dííte ampelo among kanakuai. Bí mére jarumko delokke sobéne éjarko kala miremna amikuai. Abigail, bík mimede kampola delokke ardanakuai. Idola bí mikitla aange atímala kaanyina amikuai. Nabalke Karmello bík mér kídíem amíd ngílenla inamem,

⁴mooruklo duudola Dabid bí tatto.

⁵Dekepeila, bí bík ami íyingko lulíkdola, Karmello gíla Nabalme kaaríksula bík ashéng lupoem pobidope lulíkto.

⁶Bí bulum Nabalme sikepe políkto, “Nok angong Dabid bí nom ashéng lupoem delokke bí nokke delo nok erang kídí delo nokke takam teyolo ai-asangem bilíkdung.

⁷Bí nok mér kídíem amíd ngíbomdung emla tatto, delokke bí nome nok mér kaabomna kídare ngoluke so lekope duutuai delo ngolu bulum atí adír bimato emla kénsudope míídung. Buluke Karmello duudung abungem bulu kelok atí koteng pyoobinam kamato.

⁸Bulum íngkítoka, delo bulu nom pobiyé. Ngolu domandí longe kolo píídung, delokke Dabid bí ngolum no aipe ayangla kaarík-torík sudope rogudung. Nokke béérang kídí ngolum lang nok ayabosunam angong Dabidme nok bilanam amanko bika.”

⁹Dabidke ami kídíe sim polík agom sim Dabidke amínpe Nabal me pobito. Delo buluke dooya dungem,

¹⁰méélam dem Nabal poyansuto, “Dabid, séko Dabid bí? Jesseke oo de séko? Ngo bík legangem tatkímang! Silo-melo among so deddína dugnyok kuna abíl kídíe kadung!

¹¹Ngo ngok mér amíd ngína kídí legape ettíng delo asi delokke taro arnam kídí sim ingko lokdín aadune dem kénmanam ami kídar dem ngo bimayé.”

¹²Dabidke ami kídíe gílat sulangkula, Nabalke ponam kídarem bím pobitoku.

¹³“Noluke yoksa kídíem tulík sugeto,” emla Dabid lulígla bulu takam depe ito. Dabid teng bík yoksaem tulíksula língko appi kope bík amiem gíbola bí gílento. Delokke bí língko annyiko bík amiem buluke ekurang kídíem kaabomdope mekutsuto.

¹⁴Nabalke béérang kone Nabalke mime Abigailme sipe poto, “No tattonía? Dabid bí bík kotoki eke mooruk elo ngoluke RUUTUM kepe ashéng lupoem podope melíkto, idola bí bulume lupu-luléto.

¹⁵Ngoluke teyolo bulu ai aloodungai, bulu edílokom ngolum ebínpe imato, delokke agínpe ngolu bulukíng lekope among kídí elo yémín getuai, delokke ngoluke ekurangem edílokom pyoobimato.

¹⁶iduem bulu ngolum longe-yohpe kaabomto.

¹⁷Sikesim míngíídola kape ipene dem mííbolangka. Demamílo si ngoluke ruutum delokke bík takam edung-erang legape loorímanampe iyé. Bí aang atímana gela sékoke emteng tatbimang.”

¹⁸Abigail lomla língko annyíko ettíngem delo ayo nyogon annyi bíína apongko delo mureenam mér pilngoko, kilogram íying kolang kínídko anam ali amíem, grébem língko abengko delokke ereena tapanglok monam ettíngem língko annyiko, amanpe iruula dem gado kídílo joolíkto.

¹⁹Delo bí béérang kídídem poto, “Nolu kerangem gígekai. Ngo noluke méélamlo enmínyé.” Idola bí bík milo dem atí popa sumato.

²⁰Abigailke gado teyolo duudola dííte delokke bilkén kukolo pííduem, delopak menang asak bí Dabid melang bík ami kídíem bíkke danpe aadope ríksuto.

²¹Dabid bí agí aapílo sipe mííto, “Kapei ngo elok ami elok ekurangem so mooruk among so asamrupe kaabom bitone? Bíkke ekurang atel koteng pyoonam kamato, delokke ngok igulem bí sipeya biyan sudung kune.

²²Shédí bí ngom, rokommang adape, ami kídar esim takam em petyin mamílo simo daklangka!”

²³Edílo Abigail Dabidme kaatodí; delo menape bí gado delok oila agíe

²⁴Dabidke aledelo olík dola bím poto, “Ngok ruutuma, ngom tatbi dakyika! Loorímanam sim ngom togemoi.

²⁵Aang atímana Nabalke agomem tatpakbika! Bí bík Nabal[8] amín genam pakpe bopolko. Ngok ruutum, nok béérang kídíe aaduem, ngo delo kamato.

²⁶Nokke edo rayansula nok miru kídíem petla imadope inam si RUUTUMke iname mino, delokke supak ngo turna RUUTUMke amínlok pésula podung. Nok mirue lang delokke Nabalme santaksula nom séko amiedí atímape ipe em mííyéne, bulum takam ajéngem ilíkdak langka.

²⁷Ruutum, nom ngokke aman boma binam sim torík sudola nok ami kídar sim bitoika.

²⁸Delokke ruutuma, ngok imemko katomílo ngom ayang mesam daklangka. RUUTUM bí nomlang nok otíng-oyinem rojape imoyé, kapeila no bíkke mimak kídíem magbidung delokke nok turdo loope, no atí deemana agér imayé.

²⁹Sékokom nom mirupe iyabomla nom petpe em itokom, are kana mirem ekurangem sontori lokke kaabomnam kísape RUUTUM, nokke Shédí bí nom mopítyé. Nok miru kídí kepedan elíngem iyilok appaknam kísape bí bulum appakyé.

³⁰Delokke edílo RUUTUM bí nok teyolo pélík sunam takam agér sim ila nom Israel lok rojape imoyédí,

³¹delo no legang kamape petla, delokke edorayan sunamlok legape no aapíe kigela míídír supenam kamayé, ngok ruutuma. Delokke edílo RUUTUM bí nom utepooroem ruubiyédí, ruutuma delo ngom mitpan sumayika.”

³²Dabid bím poyansuto, “RUUTUM me yidgedung, nom silo ngom kaarík sudope melíkna, Israelke Shédíme yitgedung.

³³Shédíme nok ainam legape rínggedung, delokke ngom silo edo rayansudo langkula amiko petpenam imemlok mopítnam legape rínggedo.

³⁴Ngo turna Shédíke amínlok pésudola podung, no ngom menape kaarík sumanga mílo Nabalke ami takame nyampoke rohlo siyin duape!”

³⁵Delo Dabid Abigailke boma binamem torík sudola poto, “No ekumpe míídír mape gílangkuka. Ngo nok míínampe ibiyé.”

³⁶Abigail Nabal kíng aadokudem, Nabal rojalok tíípe-dopenamem tííla-dola duudo. Nabal bí yagorupe tíngírsula, ikolok Abigail bím rokom mang adape atí pomato.

³⁷Delokke Nabalke peebeng rongkuem, Abigail bím legang takamem pokan biyintoku. Dem tatla Nabalke aapíe loorímape alempe ila amíle líídung kísape tolkai.

³⁸Looying kope doorongem RUUTUMke alage Nabalke teyolo pííla, bí sikai.

³⁹Edílo Nabalke sinamem Dabid tattodí bí delo, “RUUTUM me yidge dung. Bí ngom Nabalke lupu-lulénam legape Nabalme edo rayan subito delokke, bík béérang ngom atímape ipe kolok mopítto. RUUTUM bí Nabalme bík imem legape ajéng laato,” emto. Delo Dabid Abigailme bíkkíng nyamran ibosudope tatkímoto.

⁴⁰Bík béérang kídíe Karmello Abigail kíng gíla bím poto, “Dabid bí nom bík méngpe lape emla ngolum melíktung.”

⁴¹Abigail among delo gubadola, “Ngo bík béérange, bík béérang kídíke ale kídí emteng mobínpe irusudung,” emto.

⁴²Bí menape gerepla bík gado teyolo duulíkto. Bíkke béérang mime pilngo dem lekope bí Dabidke béérang kídí delo enbo sulangkula, Dabidke méngpe bí ito.

⁴³Dabid Jejreel among lok Ahinoam me méngpe bomdola, supak Abigail meteng méngpe bomtoku.

⁴⁴Sikepe idoso, Saul bí agí ome, Dabidke méngpe inam Mikal me, Gallim doolung lokke Laishke oo Palti kíng bito.