Read Alladian 1 SAMUEL 27 Bible Online

1 SAMUEL 27 - Alladian bible

1 SAMUEL 27

¹Dabid agísuem posuto, “Ngom depekom longeko Saul bí petyé. Philistain among elo duunyok genamde ngokkepe aiyalumyé. Delo Saul bí ngom Israello matíyimayé delokke ngo mopítsuyé.”

²Dekepeila, Dabid lang bík língko akké sipaying kídíde delopak Maok ke oo, Gathlok roja Akish kelo gíto.

³Dabid lang bík ami kídíe delokke buluke erang kídíe lekope Gathlo duulíkto. Dabid bí bík méng annyiem, Jejreel lok Ahinoam delokke Karmellok Nabalke meyéng Abigailme duuboto.

⁴Edílo Saul Dabidke Gathpe ennyok genamem tattodí, bí bík méélamlo matíyimato.

⁵Dabid Akishme poto, “No ngok angonge mílo, ngome doolung aménako dungkepe bitoka. Nokkelo lekope rojalok dungko luune so, ngokke duumín gebom penam kamang.”

⁶Dekepeila Akish Dabidme Jiglak doolungem bito, delokke sok legape Jiglak luunede Judah lok roja kídí kepe iyarkai.

⁷Dabid Philistain amonglo poolo íying kolang akkéko duuto.

⁸Sikepe idudelo Dabid lang bík ami kídíe Geshur amiem, Girji amiem delokke Amalek ami kídíem mimagpe magabomto. Si ami kídísi, so among so akupe dungku sunekíai. Dabid bulum Shur doolung loope mimakpe magbomla, Ijipt beloope pííla,

⁹takamem mime milope petpakla, buluke bomnam taro kídíem, uut simon delokke mér delokke ege daadiem laato. Dekepe ipala, Bí Akish kíng gíayékuem,

¹⁰Akish bí, “So irumso no íngkolo mimakpe gítokan?” emyém, Dabid bí, bím lekonem Judahke sokkodan belo demangkom Jeramil opín ke among kídílo demangkom Kenit ami kídíke duungangko among kídílo emla podungai.

¹¹Dabid bí takamem mime-milope, sékoteng Gathlo gíalangkula, bíkke lang bík ami kídíke arope inamem lubikuna kamadope petpak yinto. Sikepemin Dabidke Philistain amonglo duudung abungem itítone.

¹²Idola Akish Dabidke teyonglo míídíngsula, agíem míísuto, “Bí agíem Israel ami keralo loorímadope míídope isutung, dekepeila, bík turdung tetengem ngom agér ibiyé.”