Read Alladian 1 SAMUEL 30 Bible Online

1 SAMUEL 30 - Alladian bible

1 SAMUEL 30

¹Loonyiko irongem Dabid lang bík ami kídíe Jiglaklo píítoku. Amalek kídíe sokkodan Judah em lííla, Jiglagem mimak iyato.

²Mime takam dem laayinla, séko meteng petmape, takamem bulu kelo lekope gíbotoku.

³Edílo Dabid lang bík ami kídíe píítokudín, buluke doolung dem rompaknam demlang, buluke mime kídí, ome-oo kídíem umnyok bomkunam dem kaato.

⁴Dabid lang bík ami kídare yagorupe kapla-rííla ila, adeng loope kapto.

⁵Dabidke méng annyi Ahinoam melang Abigail, bínyimteng umnyok bomkaku.

⁶Depeila, Dabid bí yagorupe míídírto. Kapeila, bík ami kídar de buluke ome-oo kídíem umnyok bomkunam legape yagorupe Dabidke teyolo aklíla bím elínglok gepetpe pínbosuto. Idola, Dabid me RUUTUMbí aapí edíngem bito.

⁷Dabid Ahimelekke miripe ina oo Abiatharme, “Ngom Ephod dem bomabi,” emkolok Abiathar bíme bomabito.

⁸Dabid RUUTUM me íngkíto, “Ngo itung-iréna kídí méélamlo gímíloya, delokke ngo bulume umla yénaya?” Shédí poyansuto, “Bulum mamín getola. No bulum umlayé, delokke erang kídí emteng mopít layéku.”

⁹Dekepeila, Dabid lang bík língko akké amide gílenla, edílo bulu Besorlok siirung dem píítodín, ayokone delo duuto.

¹⁰Dabid lang língko appi amide endan tetengto; língko annyi ami kídarde siirung dem apéé aloola kooramla delo dungkut suto.

¹¹Dabid kíng yémín gena ami kídarde delo among delo Ijiptlok koo ko kaarík sula Dabid kíng bím aaboto. Bulu bíme, apim anyong kolang asi ko,

¹²ereena tapang ayé, delokke loreenam onggur ayé abeng annyiko bito. Dorongem, bík amíle raltoku, kapeila longum kokai apíngpe bí, doyi-tííyimape dope-tíípenam kamala duutuai.

¹³Dabid bím íngkíto, “Séko nok atoe, delokke no íngko lokke?” “Ngo Ijipt koo ko. Amalek ami kolo abílpe yédung,” bí podan tete dola, “Ngok amíle kikolok, ngok atoe ngom longum kerape so mepaktung.

¹⁴Ngolu Khereth kídíke Judah sokkolo duuna emla Kaleb opínke amongem lííto delokke Jiglak luune me rompakto.”

¹⁵“No ngom línggoona kídí elo gílík layén,” emla bím Dabid íngkíto. Bí poyansuto, “No ngom Shédíke amínlok pésudola, ngom petmayé, delokke ngok atolo melík kumayé emla pomílo ngo gílíklayé.”

¹⁶Delo bí Dabidme bulukíng gíaboto. Líína kídíde moolop-moolop delo dola-tííla, ashéng-angampe, buluke Philistain loklang Judah lok líínam ekurang legape doman-tíímanla duudo.

¹⁷Rokomdem rokomope Dabid bulum mimak iyabomla, yume kaamo loope ilíkto. Língko appi amiko uut teyolo duula duknyokkuna dem mela sékoteng bulu turna kamato.

¹⁸Dabid takam amiem delokke Amalek kídíke líínam ekurang kídíem mopít yintoku. Delokke bík méng annyi emteng bí mopíttoku,

¹⁹delokke ingkona ato koteng nyokna kamato. Dabid bík ami kídíke ome-oo kídíem delokke Amalek kídíke laasinam ato kídíem paalat suyin botoku.

²⁰Bí buluke taro kídíemteng laatoku, delokke dem bík keradelo yébom bikuna kídarde, “Si Dabid ke lííname,” emla poto.

²¹Delo Dabid enlat sudolangkula adung-apéé kolok enram mínla Besor siirunglo duuyana, língko annyi ami kídí delo aatoku. Delo bulu Dabid melang bík ami kídíem kaarík supe gílento, delokke Dabid bulukíng gíadola bulum iigang-apampe ríksutoku.

²²Idola, Dabid kíng gímín gena míísin-míímínna, nena ami ekene pokai, “Bulu ngolukíng gímín gemang. Dekepeila, ngoluke líínam ekurang sim atí bisumayé. Bulu agíke méng ome-oo kídíem laala gíladoku.”

²³Idola Dabid poyansuto, “Ngok bíro kídara, RUUTUMke binam ekurang kídí legape no dekepe ilamang! Bí min ngolum kaabomla, ngoluke ekurangem lííbina teyolo ikum motone.

²⁴Sékokom noluke ponam dem tolamayé! Takame akam pakpe tarongem paape aiyé; ekuserangem bomla méélampe dungkutsuna delang mimak lo ennade akampe tarongem paape aiyé.”

²⁵Dabid dem ayon kope bomla delokke ila supak loope Israello dem igela yédung.

²⁶Edílo Dabid Jiglaklo píítokudín, bí bík bomkunam ekurangem tarong ila, Judahlok kebang ruutumpe ina bík angong kídíem sipe pola melíkto, “Sina noluke legape, ngoluke RUUTUMke miru kídílok lanam ekurang kídílok amanko.”

²⁷Bí Bethel lok ami, Judah sokkolo duuna Ramah amiem, Jattir,

²⁸Aroer, Siphmot, Eshtemoa,

²⁹delo Rakal luunelok amiem, Jeramilke opín amiem, Kenit amiem,

³⁰delokke Hormah, Borashan, Athak,

³¹delokke Hibron luunelok amiem tarong melíkto. Bí bíkke lang bík ami kídíke magongko takam among kídílo tarong melíkyinto.