Read Alladian 1 SAMUEL 5 Bible Online

1 SAMUEL 5 - Alladian bible

1 SAMUEL 5

¹Philistain kídíke Daapong Sondugem bomrongem, bulu dem Ebenejer lokke buluke doolung luune Ashdod delo geatoku.

²Delokke buluke Dagon uyume kumsuko ekumlo bomala, mimang abe delo meto.

³Roh kondem rokompe Ashdod lok ami kídíe Dagon ke mimang dem, RUUTUM ke Daapong Sonduk kerang delo okupdope kaato. Dekepeila, bulu mimang dem kiirep langkula dakkeng delo kiilíktoku.

⁴Roh kon demteng rokomope bulu, Daapong Sonduk kerang delo okup dope kaato kukéng. So irum so mimang delokke dumpong elang alag annyie benla eyab lamgé delo doodo. Amíl petomde apíído.

⁵Dekepe ikolok silo loope Dagonke miri kídí elang, bím Ashdodlo kumsuna kídare delo moolop delo ale tuayimang.

⁶Ashdod lok ami kídí teyolo RUUTUM ke alage tebeg líkla, bulu peso yirípe mííto. Ashdod doolung lolang dei-degonglo duuna takamem tasut-tarípe geyin moto.

⁷Sike sim kaasula bulu, “Israel ke Shédímin ngolum lang ngoluke Dagon uyume itung-iré bomdune. Ngolu Daapong Sonduk sim ngolukíng duumolí yimang,” emla pobosuto.

⁸Dekepeila, bulu ami tomlíkla, Philistain roja pilngo dem gogdumsula bulum íngkíto, “Israel ke Shédíke Daapong Sonduk sim ngolu kape ipen?” “Gad among elo melík langka,” emla bulu pobosuto; dekepe ikolok bulu angukon Philistain among Gad lo Daapong Sondukdem bomato.

⁹Idola Daapong Sonduk lokke aarodem, dem luune demteng RUUTUM bí adír ilíkla botterupe pesola lomgo sumoto. Bí doolung delokke koodak, minedak, takamem atelpe amíl ole-olelok bíímola adírem ilíkto.

¹⁰Dekepe ikolok bulu angukon Philistain doolung, Ekron emnamlo Daapong Sonduk dem melíktoku; idola edílo Daapong Sondukde delo píítodín, delok ami kídíde ulo gogla, “Bulu so Israelke Shédíke Daapong Sonduk dem, ngolum takam mokape bomadung,” emto.

¹¹Dekepeila, bulu lekoda Philistain roja takam dem gogdumsula potoku, “Ngolum lang ngoluk erang kídíem petyin madope, Israel ke Daapong Sonduk sim bulu kelo melíktoku.” Doolung luune takam delokke ami kídíe pesola lomgo suto, kapeila, Shédíbí bulum yagorupe adírmoto.

¹²Simana kídí eteng amíl takamlo bííla, bulu buluke uyuem gogla iguldope kapgosuto.