Read Alladian 1 SAMUEL 7 Bible Online

1 SAMUEL 7 - Alladian bible

1 SAMUEL 7

¹Dekepeila, Kiriath Jearim ami kídíe RUUTUM ke Daapong Sondugem laala bomlangkula Abinadab emnam, díítelo duuna ami ekumkolo meto. Bulu bík oo Eleajar me dem kaabom-tatbom dope kumdéélíkto.

²Kiriath Jearimlo RUUTUMke Daapong Sonduge dítak takying annyi kope duuto. So moodí so takam Israel ami kídíe RUUTUM kíng kapla-rííla igulem koto.

³Samuel bí Israel ami kídíem, “Nolu RUUTUM kíngdan noluke takam aapí-aanglok angkupemílo, angu ami lokke uyu, delo mime uyu Astarteke mimang kídíem mepakpe aido. RUUTUM kíng apíngpe nolu agíem tolíksula bím petom kumsulangka, delo bí nolum Philistain kídíke ralnamlok nolum mopítyé,” emla poto.

⁴Dekepeila, Israel ami kídíde Baal delokke Astarteke mimang kídíem mepakla RUUTUM petomme kumsula yétoku.

⁵Delo Samuel bí, “Nolu takamke legape RUUTUM kíng ngo kumbiyé. Iname takam ami kídíem Mijpahlo gídum sumolangka,” emla Israel opín-buang takamem políkto.

⁶Dekepeila, bulu takam Mijpahlo gídumsuto. Bulu asi anyongko laala RUUTUMke keralo amanpe purlíkla delo longe rubuung dem doma-tíímape duuto. “Ngolu RUUTUMke mííbamape yéto,” emla bulu posuto. (Samuel bí Mijpahlo Israel ami kídíke ebín-ebonem kebang lubidungai.)

⁷Edílo Philistain ami kídíde Israel ami kídíke Mijpahlo gídum sunamdem tattodí, delo Philistain roja pilngode buluk amiem enbola Israel kídíem mimak ipe emla aabomto. Israel ami kídíde dem tatla pesola,

⁸Samuel me poto, “RUUTUM ngoluke Shédíme ngolum Philistain kídísok mopítdope kumtí bilangka.”

⁹Samuel bí méro ko pala dem apíngpe RUUTUMme rombila ipakpe ilíkto. Delo bí Israelem iguldope RUUTUM kíng kumto, dem RUUTUM bí tatbito.

¹⁰Samuelke ipagem ilíkdungem, Philistain kídíe mimakpe imínsupe emla aabomto; idola delopak RUUTUM bí buluke teyolo, teyong among lok doomír-yaarí adud bottepe ibomto. Bulu yagorupe míílalsula pesolok lomgosula duggetoku.

¹¹Delo Israel kídíe mimakpe maglenla Bethkar doolung kékon loope Philistain kídíem petmín geto.

¹²Delo Samuelbí elíngko laala Mijpah kelang Jeshanahke pénsam delo ulíkdola, “RUUTUM bí ngolum bedang rubuung sim igulto,” emdola dem Ebenejer [1] emla mínlíkto.

¹³Dekepeila, Philistain kídarem ikumla, RUUTUM bí bulum Israellok degong takamem, Samuelke turdung tetengem mimakpe iyabomla moyimato.

¹⁴Ekron kelang Gadke pénsamlo duuna Philistain kídíke rotnam takam doolung kídí emlang asi among kídíem paamo langkula, Israel kídíe buluk takam degongem paasutoku. Delokke teyolo Israel ami kídíke pénsam loteng aapí-aang aibosue kato.

¹⁵Samuel bí bík turdung tetengem Israelem yéboto.

¹⁶Dítak mipíem bí Bethel, Gilgal delokke Mijpahlo en-gongla, so among kídíso ebín-ebon kebang kídíem luyin bodungai.

¹⁷Dekepeila, bí Ramahlo ekumpe enlangkula deloteng kebang ruutumpe idungai. Ramahlo bí RUUTUMke legape Deena rungguko morep bito.