Read Adilabad Gondi రోమ 12 Bible Online

రోమ 12 - Adilabad Gondi bible

రోమ 12

¹అదెన్ సాటి, దాదలిర్-బాయిక్నిట్! బగవంతల్ మాకున్ బెయ్ దయతె సూడ్వల్ ఆందుర్. అదెన్ హిందల్ మీకున్ నన కోర్వల్ బతల్ ఇత్తెకె, పవిత్ర అర్పన సీతపినయ్, మిరట్ బర్పుర్ దిల్దె మీవ జిన్గనితున్ బగవంతన్ సీసి వాటట్. ఇహిన్ కియ్వల్ వోన్ ఆనంద్ సీంత అని వోన సేవ సత్నె కియ్వల్ ఇదె తరిక ఆంద్.

²బగవంతనగ బరొస ఇర్మకి వూర్ మోడి పిస్మట్. బతి పడనంగ్ సోంచ్-విచర్క్‌నల్ బగవంతల్ మీకున్ మార్యుసీతపినయ్ పూన తరికతె పిసట్. అహన్ పిస్తెకె, బగవంతన ఇచ తీర్ తాక్వలిర్ ఆంతిట్. అద్ ఇచ బెయ్ చొకొట్న, వొప్నల్ మన్వల్ అని జర గిర్ గల్తి సెలె అద్ బర్పుర్ వాలె ఆంద్.

³బగవంతన పెర్మత-దయతె నన అపొస్‌తుల్‌త ఆతొన్. ఇదెన్ హిందల్, మీకున్ దమ్కి సియ్వల్ బతల్ ఇత్తెకె, మిరట్ మన్వడున్ తెర్ అదిక్ ఆందుమ్ ఇంజి, సోంచ్ కియ్మట్. మావ మేందొడగ వెలె బాగల్క్ మంతంగ్. ఉంది ఉంది బాగమ్ ఉంది ఉంది కామ్ కీంతంగ్. అదె తీర్దె, మరట్ దుస్రుర్ దుస్రుర్ వెలెటిర్ మంతట్ తెర్ బతి, కిరిస్తునగ బరొస ఇర్వడున్ హిందల్, మాకున్ ఉందియ్ మేందొడంగ్ బాగల్కున్ మోడి మీరి కీసి, ఇర్తొర్. తె బగవంతల్ మీకున్ సీతొర్ అవ్ తీర్-తీర్దంగ్ వరమ్కున్ బారెతె, దిహన్తె సోంచ్ కీసెర్ పిసట్.

⁶తె బగవంతన పెర్మత-దయతున్ పియ్సి, మాకున్ దుస్రొక్ దుస్రొక్ వరమ్క్ పుడ్తంగ్. నమునత్, బగవంతల్ తొహ్త తీరె అద్ గొస్టి దుస్రుర్‌కున్ వెహ్వల్ వరమ్ నీకున్ పుడ్సి మత్తెకె, అదెన్ నిమె బరొసతె బరొబర్ వాడకమ్ కీమ్.

⁷మదత్ కియ్వల్ వరమ్ నీకున్ పుడ్సి మత్తెకె, నిమె తప్వక్ మదత్ కియన. బోద కరుస్వల్ వరమ్ నీకున్ పుడ్సి మత్తెకె, నిమె తప్వక్ బోద కరుసన.

⁸దుస్రుర్‌కున్ గటి-దీర్య సియ్వల్ వరమ్ నీకున్ పుడ్సి మత్తెకె, అదెన్ తప్వక్ వాడకమ్ కియన. నిహ్గ మన్వడున్ తూస్వల్ వరమ్ నీకున్ పుడ్సి మత్తెకె, నీవ బర్పుర్ దిల్తె ఉండె ఇచుర్ వెలె తూసన. దుస్రుర్‌కున్ తాకుస్వల్ వరమ్ నీకున్ పుడ్సి మత్తెకె, కాయ-కస్టమ్ కీసెర్ తెర్ బతి, దిహన్తె వూర్కున్ తాకుసన. దయతె సూడ్వల్ వరమ్ నీకున్ పుడ్సి మత్తెకె, వెలె ఆనంద్నె వూర్కున్ దయతె సూడన.

⁹అదెన్ సాటి, మీవ పెర్మ కపట్ సెల్వక్‌నె మందన. అద్ బహన్ ఇత్తెకె, కరబ్నల్ లంగ్ మంజెర్, చొకొట్నతున్ పియ్సి తాకట్.

¹⁰ఉంది కుటుంబతుర్ మోడి పెర్మతె మంట్. వొరొన్ వొరొర్ అదిక్ మాని కీసెర్ తాకట్.

¹¹గహ్లలిర్ ఆయ్వక్‌నె మీవ బర్పుర్ దిల్తె, యేసు పర్బున సేవ కీమ్ట్.

¹²పర్బునగ మిరట్ ఆస ఇర్త కాడ్కి గట్ నిల్సి, ఆనంద్నె మంట్. దుక్సంగ్ వాతెకె అవెన్ వోర్చి తాకట్. బరొసతె బస్కెట్ పార్తన కీసెర్ మంట్.

¹³బగవంతనుర్ లోకుర్ బూరె జురత్నె మత్తెకె, వూర జురతున్ పూరి కీమ్ట్. వాతుర్ వెర్తలిర్‌కున్ మాన్-పాన్ కీసెర్ మంట్.

¹⁴మీకున్ దుక్స సియ్వలిర్‌కున్ ఆసిర్‌వాద్ సీమ్ ఇంజెర్ బగవంతన్ కోరట్. బతి సాపెన సీమ్ ఇంజెర్ మాత్రమ్ కోర్మట్.

¹⁵ఆనంద్నె మన్వలిర్ సంగ ఆనంద్నె మంట్. ఆడ్వలిర్ సంగ ఆడట్.

¹⁶వొరొన్ సంగ వొరొర్ మన్దగ యెకి ఆసి మంట్. గర్వతె మన్మట్ బతి, బద్ తీర్ద కామ్ కియ్లె గిర్ పెజె వాయ్మట్.[27] మీవ మిరట్ బెయ్ గియన్ వాలిర్ ఇన్మట్.

¹⁷వాయుట్ కీతొర్ వోన్ బస్కెన్ వాయుట్ కియ్మట్. బతి సమ్దిర్ మాని కీనల్ మన్వలిక్ కామ్కున్ బారెతె దిహన్తె సోంచ్ కీమ్ట్.

¹⁸మీ సంగ ఆయర్తె, హర్ వొరొన్ సంగ సాంతితె మన్లె, కోసిద్ కీమ్ట్.

¹⁹లాడ్నుర్ దాదలిర్-బాయిక్నిట్! మీవ మిరట్ బోన్ పొరొన్ పగ యేత్మట్. వూర్ పొరొ తన్వ సోంగున్ తొహ్లె, బగవంతన్ మోక సీమ్ట్. బారితెకె దర్మ-గ్రంత్‌నగ, “పగ యేత్వల్ కామ్ నావ ఆంద్. తాన బర్పెయ్ కియ్వన ననయ్ ఆందున్” ఇంజెర్ పర్బు వెహ్తొర్.

²⁰అని ఉండె ఉంది జాగ, “మీ పగ-దారన్ కర్ వస్తెకె తప్వక్ కానె దొసట్. యేర్ వట్క్‌సి మన్వన్ తప్వక్ యేర్ సీమ్ట్. ఇహిన్ కియ్వడున్ హిందల్ వోర్ పగ-దారల్ లజె మాంతొర్” ఇంజెర్ గిర్ లిహి కీసి మంత.

²¹ఇదెనల్ నన వెహ్వల్ బతల్ ఇత్తెకె, బోరె మీకున్ వాయుట్ కీతెకె, వోన్ వాయుట్ కియ్మట్. బతి చొకొట్ కియ్వడున్ హిందల్, వాయుటున్ మెయట్.