Read Aghem Matìo 10 Bible Online

Matìo 10 - Aghem bible

Matìo 10

¹Yɛso n tɔŋɔ tsughu tsə̀təndə̄ghā tə wə̄n eghəm à ghè tò tə bə̀ghà, fughu tsughu ghee â dwaʼa wo â ghee aleshuaan səa zʉ̀ ù biigh wo, baaŋ ŋgòʼò dzàŋà tə̀n tə̀ dzə̀m àsùghò ndzughu to a te.

²Ghən lò zən a tsə̀təndə̄ghā tə Yɛso tən eghəm à ghè tò tə bə̀ghà; ù sûesʉ lò Sǎemòn, tɔɔŋ Pità, àsùghò Andùlù, wàazə̀; Dzɛ̂ms, wɛ ù Zɛbɛdîi, àsùghò Dzɔ̌n, wàazə̀;

³Àsughò Felêp, à Bàtòlòmîa; Tɔ̀mâs, à Matìo tɔɔŋ dzə̀akə̀mwàsòʼ, àsùghò Dzɛ̂ms, wɛ̀ ù Afìus, à Tàtîa;

⁴Sǎemòn, ghùw wəla ù fə̀ ŋeē ləghaa naʼ e wə̄n zo, àsùghò Dzudàs Eskàlìot wəla ù fə̀ fêe fughu Yɛso.

⁵Yɛso n tùm sə ndùw ghî ghən èghəm à ghè ghò a bə̀ghà mò ù ŋ ghee kûɛɛn tsùghù enyəa, “E kwo ghùw wɛʼɛ lô ndûuw an də̀ŋò təla Toʼò è lo a te, kà nyə sùghò nlò an nàʼà tə̀là ghî a Sàmalìa à mughu a fughu,

⁶Ghɛ̀ bɔɔm ki ko alenyə an lùʼu təla ghî ghə Ezə̀lɛ̂ ghəla ghe lo tò ndzì zəla è fə̀ lâʼ miaa mughu a fughu.

⁷E kəā nduw ghəa a Kəzə̀ ghò aŋghəa ghɛ̀ nduūw, dzàa ndùw enyəa, ‘Fɔ̂e ù kəwālā wə m bùghò.’

⁸E baaŋ nduw nlò ghî à dzaŋā gho, zòo nughùun kɔ̀ʼɔ ghì à kpuuwn gho, baaŋ ndùw ghì a tətsùghò, shùaan sə̌a ndùw sùghò zʉ̀ ù biigh wo. Mùghò mò ghɛ̀ â daʼa kə fughu kə̀nughùnùghù, fughu sə̀ ndùw sùghò nlǒ kə̀nughùnùghù.

⁹Aŋghəa ghɛ̀ nduūw, kà nlò fəgha kə̀ li ko am mbə̀ghà tə təndzʉ tɛʼɛ̄ dzə̂n tò ukʉa.

¹⁰ Nùghù ndùw ko nlò kûeekue: kǎ nlò mbə̀ghà nì, kà nlò ni ndzʉ to, à mìaa ko tìa ghɛ̀ ki a zəŋo e eghùe, kà gûw tə̀ nî ŋkāa mbàŋ è nyə̀nlo; nu ghùw wəla ù fwàʼa, ù kì nû alezə̄a.

¹¹Abugho ghɛ̀ nyə ndûw ko an nàʼ è ghɛ zo, kəŋ ndùw nlo ghùw wəla ù lò alenìi naŋa ghɛ̀, ghɛ̀ n dòʼò ndùw ghɛ̀ à ghee, tò ghɛ̀ ke bugho zəghā naʼ e te zo.

¹²Mò ghɛ̀ nyə ndùw am be kə ghûw, ghɛ̀ n tɔ̀ʼ tɔ̌ɔŋ zuw tsughu ghî a kəbe a te gho, dzɛ̀ â ghee enyəa, ‘Zə̀ kə̀ fughu ghɛ â bughuso zo.’

¹³Mo ghê mùghubè a te a nî nàŋa ghɛ̀, bughuun zɛʼɛ̄ zə n dòʼòdòʼò a fughu alo kəbē; mo ghe kâ ghɛ̀ kôʼ kɛ̀lɛ, ghɛ̀ n nùghù sùghò à bughuun zɛʼɛ̄ zo[4]:

¹⁴ Mo ghe kâ ghɛ̀ kpenì, ŋkāa mo ghe tue sùghò alezə̂ən shwaʼ wɛʼɛ, ghɛ̀ n zə̀ghàa be kə te ko ŋkāa naʼ e te zo, ghɛ̀ n nyuʼu tə̀dzəm a fughu.

¹⁵ Kùmkùm, aŋghəa Ǹ dzâa wô fɛ â ghɛ̀, abugho tsuʼ u təsaʼ u kê kpe tsughu, naʼ zə̀a ghɛ̀ nyuʼū dzə̀m a te, Zə̀ kə̀ kê kwùso nù se zo a zəŋò naʼ e Sodòm zò, àsùghò e Gòmolà zò, tsə̀ghàsə̀ aŋghəa kə kê kwuso se zo â naʼ e te zo.”

¹⁶ Alenùghù ndûw â sə ko, Yɛso n dzɛ̀ â tsə̀təndə̄ghā tə wə̄n ti to enyəa, “Koʼô nlò! Ŋ̀ ghɛ fɛ tuu sə̄a ndùw tò təndzì am bvʉa e ubʉ̄ghā; e fi lo enyəa ghɛ̀ ki alenaŋso tsughu ghuw kə ebwìi kɛʼɛ, ghɛ̀e e kuŋu bwiī tò təzughu, ghɛ̀ bughunlo â fə̀ŋ tò, tò embuŋū.

¹⁷E ghoōm tsughu nlò, tɔŋlo enyəa ghî à lo nû ghe kê nîi ndûw tsəghà ghɛ̀ alo tə̀kaŋsì, ghe e tsɔʼɔ sa ghɛʼɛ gho an Ndughutə̀ne tə Tə̀dzûu to,

¹⁸ghe e kwuu seē nduw ghɛ a vʉ̀a kala, àsùghò a vʉ̀a dwə̀ŋ u nàʼà tə̀ li tən bòʼ ghəa zaŋa, ghɛ̀ ke e fəghaan tɔʼɔ̄ teso dzaā nduw Làbəlà è dzùŋ e te â ghee, àsùghò â Tòʼò zò.

¹⁹Abugho ghe kwu fughu nyə ndûw ghɛ, e kwo ghɛ̀ lô ndôʼò fəmsō ghue zo enyəa ghɛ̀ lô ghəa a kə̂aa ndùw ênzə̂n ŋkāa ghɛ̀ lô yia dzâa ndùw èndugho a; tɔŋlo enyəa Tsele ù sɛ̀ wəla ù lò alo kəwālā lo dzə̀là wò ushwaʼ an dzughu ghɛʼɛ̄ an nə̀gha e te zo.

²⁰Shwaʼ wən lo yò shwaʼ wɛʼɛ; à kè lo Zuʼ tə Tsele wɛʼɛ tə kê kə̂aa səā wô ghəa gho a zəŋò ghɛ̀.

²¹ Chìa lo e feēn fughuu nduw wàazə̀ enyəa ghe wī, tsele m fèe fùghù ndùw wɛ̀, wɛghêtùghu a kê nughù kɔʼ an tuw u ghê tsele àsùghò ghê zə̀, ghe ŋ wiin ghee.

²² Ghî ghə̀n à dzə̀m ke e baā ghɛ enyəa so à lò ghəa zaŋa. Yia a bugho ghùw wəla ù kuūwn kɔlɔ tsughu ko fə̀ŋ ndùw tɛ̀ è nduw, ù lo zəa nù tuw ko.

²³Abugho ghe ndzaŋso kaāŋ ghɛ an naʼ è li zo, ghɛ̀ n ti ndùw an naʼ è nughù zò; M̀ fɛ kùum dzàa wò nù â ghɛ̀ enyəa, ghɛ̀ lo yò aletsə̀ghàa ŋgəaa mɛʼɛ̀ nàʼà tə Ezə̀lɛ̂ tə̀n tə̀ dzə̀m, mò Wɛ̀ ù Ghùw kà bùghò.

²⁴ Wàakə̀mwàʼsò ù lì yo dzə̂ ù tsəghàsə wàdè ù wə̄n, kɔ̂ɔ fə̀ li fə yo sughò fə tsəghàsə mughùbè ù wə̄n.

²⁵ Wàakə̀mwàʼsò bɔ̌ɔm mìaa kùm tsughu ko aledòʼò tǒ wàdè ù wə̄n, kɔ̂ɔ fə̀ e lo sugho aledòʼò tsughu tò mughùbè ù wə̄n. Abugho ghe zɔŋɔ̀ mughùbè enyəa ù lò Bɛzɛbùl[5], ghe n tso kuuwn tɔŋɔ kèndughu kə wə̄n enyəa à lǒ kwò!”

²⁶ “À fi lo enyəa ghɛ̀ ka e tsəŋo ghî ghò; nu ghəa è li e yo ghe tsən naŋā mo lo tsʉa dèe fùghu yo ghue wo, nàn ke eghəa kə̀ li yo sughò mo kə kê sə̌a yo an ndɛ.

²⁷Ghəa ghəla Ŋ̀ kə̂a fɛ aŋ ghùe e sɛ̀, ghɛ̀ ki alebɔɔm səa kə̂a sughò êzə̀ â ghì ghò, ghəa ghəla Ǹ tsɔŋ dzɛ̂ wô fɛ â ghɛ̀, sə nduw kɔʼ kɔʼ nlò aŋ gɔ̀ŋ kə ndughu ghɛ nàʼa nduw â ghì gho.

²⁸Kà nlò tsəŋ ghî ghəla ghe lô alewiī tsughuu kô gwən e ughùe e ghûw, mo ghe yo alewī fə̀ŋ è ghùw, laam tsə̄ŋ ndùw nlǒ Zə̀ kò, kəla kə lô alewi gwən e ughùe e ghûw àsùghò fə̀ŋ è wə̄n, Kə nîi kpâa ndûw am kpǎaghùw

²⁹To ghe mgbaŋa fènlò nndzaŋlo m bə̀ghà an yàaŋ fə fəghà ènyə a tò twəla a? Fə mɔ̀ʼ bùʼ yò aletsughūu tsəghàa bvʉ̂a kôʼ mo Tsele wɛʼɛ alo kəwālā kâ tsə̀m.

³⁰Ghuūghùe u nyùŋ tɛʼɛ alo kətūw tə dzə̀m, Zə̀ kə̀ n tāŋ.

³¹À fi lo enyəa ghɛ̀ ki yo aletsə̄ŋ; tɔŋlo enyəa â Zə̀ kò ghɛ̀ tsəghàtàʼà sə saʼ kə nndzaŋlo.”

³²“Ghùw wəla boō fughu â mugho an sə kə aghì enyəa e lo ghùw waŋa, Ǹ lo bɔɔm boom sùghò wə̄n êzə̀ e an sə kə Bəghà alo kəwālā.

³³Ghùw wəla ù kuūwn tue maʼà mugho an sə kə aghì, Ǹ lo tuu màʼn sùghò wə̄n êzə̀ an sə kə Bəghà alo kəwālā.”

³⁴“E kwo ghɛ̀ lô moʼò enyəa M̀ bughò â bughuun zo fɛ am mbī; Ŋ̀ kâ bùghò dzə̀ â bughuun zo, M̀ bughò â tsàm.

³⁵Nu M̀ bughò alebùghò sôʼ enyəa wɛ à nûu ghə̀ è ti an ndɔ̀ŋɔ̀ n tə̀ghùw ghèe ghê tsele, wɛ à zən ghə e dzʉa koʼō ghue zo ghèe ghê zə̀, yi ghə a awɛ ghə e koʼō yo kàʼ mə̀ èsʉ mò ghèe ghê ènùm;

³⁶Ghîikətuw a ghûw ghə̀ è lo ko waazə̂ gho an ndùm e mɔ̀ʼ.

³⁷Ghùw wəla ù ləghaa tsele ŋkāa zə̂ tsə̀ghàsə̀ aŋghəa ù ləghaa mugho a te kâ kɔ̀ʼ kpè tò ù è doʼò tsə̀ndə̄ghā zaŋā; wəla ù ləghaa sughò wɛ̀ ù wə̄n ù nùu ŋkāa ù zən tsə̀ghàsə̀ aŋghəa ù ləghaa mugho a te kà kɔ̀ʼ kpè sùghò tò ù è doʼò tsə̀ndə̄ghā zaŋā.

³⁸Ghùw wəla ù dòʼŋkè boō tsughu evʉ aŋ ghəa zaŋā, ù kà kɔ̀ʼ kpè tò ù è doʼò tsə̀ndə̄ghā zaŋā.

³⁹Ghùw wəla ù tsàʼ tuw kə wə̄n ko, ù lo gùuŋ nù; wəla ù gùŋù tsughu tuw kə wə̄n ko bòʼ mùghò, ù lo kuūwn zə kə̄tūw.”

⁴⁰ “Ghùw wəla ù nì naŋā ghɛ, ù fi nî nàŋa sùghò mùghò, mo e lo enyəa, abugho ghùw nì naŋa mugho, ù fi nî nàŋa sùghò ghùw wəla ù tum sə wô mugho.

⁴¹Ghùw wəla ù nì naŋā ghùwshʉ̀ghà bòʼ ghəa e ghûwshʉ̀ghà zə̀, ù lo kelê namso kə ghûwshʉ̀ghà ù te; wəla ù nì naŋā ghùw ù tsəghatsəgha aŋ ghəa e ghûw tsəghatsəgha zə̀ èzə̀, ù lo kele sughò namso kəla ghî a tsəghatsəgha a lo kele.

⁴²Ǹ so Ǹ kûm dzâa wô â ghɛ̀ enyəa, ghùw wəla ù tso kɛsò tuūw fughu ko wʉ̀a zə̀ m̀mùghu è sǎa â wɛ̂ɛtughu bòʼ wɛ̂ɛtùghu ù te, ghùw u te lo tsə̀ndə̄ghā zaŋā, ù lo gùuŋ yò namso kə wə̄n ko.”